ରୁକୁଣାରଥ ପାଇଁ ଓଡ଼ଗାଁ ଅଞ୍ଚଳରୁ ଗଲାକାଠ

ଓଡ଼ଗାଁ,୨୧।୩(ଶ୍ରୀକାନ୍ତ କୁମାର ମିଶ୍ର): ଓଡ଼ଗାଁ ବାନାଞ୍ଚଳ ରଘୁନାଥ ସମବାୟ ମହାବିଦ୍ୟାଳୟ ପଛପାଖ ଆମ୍ବବଗିଚା ନିକଟରୁ ପ୍ରଭୁ ଲିଙ୍ଗରାଜଙ୍କ ରୁକୁଣାରଥ ନିର୍ମାଣ ପାଇଁ ୭ଗଣ୍ଡି କାଠ ସଂଗ୍ରହ କରାଯାଇଛି।ବନକର୍ମଚାରୀ ଓ ସ୍ଥାନୀୟ ଜନସାଧାରଣଙ୍କ ଉପସ୍ଥିତିରେ ରଥକାଠ ଛେଦନ କରାଯାଇଥିଲା। ରଥ ନିମନ୍ତେ ଆବଶ୍ୟକ ମାହଳ ଓ ଶୀମିଳିଗଛ ଚିହ୍ନଟ କରାଯାଇ ସାଢେ଼ ୫ଫୁଟ ଗୋଲେଇ ଓ ୧୬ଫୁଟ ଲମ୍ବରେ କାଠ ଛେଦନ କରାଯାଇଥିଲା। ସୋମବାର ଓଡ଼ଗାଁ ରେଞ୍ଜର ନିଖିଳେଶ ମଲ୍ଲିକ, ବନପାଳ ସନ୍ଧ୍ୟାରାଣୀ ନାୟକ ଓ ଅନ୍ୟ ସମସ୍ତ କର୍ମଚାରୀଙ୍କ ସହିତ ସ୍ଥାନୀୟ ଲୋକଙ୍କ ଉପସ୍ଥିତିରେ କାଠ ଛେଦନ ସମୟରେ ପରିବେଶ ଆଧ୍ୟାତ୍ମିକ ମୟ ହୋଇଥିଲା।ସମୁଦାୟ ୭ଖଣ୍ଡ କାଠଗଣ୍ଡିକୁ ସ୍ୱତନ୍ତ୍ର ଟ୍ରକଯୋଗେ ସୋମବାର ବିଳମ୍ବିତ ରାତିରେ ଲିଙ୍ଗରାଜ ମହାପ୍ରଭୁଙ୍କ ରଥଖଳାକୁ ପଠାଇ ଦିଆଯାଇଥିବା ସୂଚନା ମିଳିଛି।