ଗ୍ରାମ୍ୟ ଉନ୍ନୟନ ମନ୍ତ୍ରୀଙ୍କ ନିର୍ବାଚନମଣ୍ଡଳୀରେ ବିକାଶର ନଗ୍ନ ଚିତ୍ର

ରାସ୍ତା ମରାମତି ପାଇଁ ଲୋକଙ୍କଠାରୁ ଚାନ୍ଦା!”

ସରକାରୀ ବିଭାଗର ଦାୟିତ୍ୱ କ’ଣ?

ମନ୍ତ୍ରୀ ରବିନାରାୟଣ ନାଏକଙ୍କ ଦୃଷ୍ଟି ପଡ଼ିବ କେବେ?

ସମ୍ବଲପୁର: (ଲିପନ ନାଏକ ): ରାଜ୍ୟରେ ବିକାଶର ବଡ଼ ବଡ଼ ଦାବି, ଗ୍ରାମାଞ୍ଚଳରେ ରାସ୍ତା ନିର୍ମାଣ ଓ ଉନ୍ନତି ପାଇଁ କୋଟି କୋଟି ଟଙ୍କାର ଯୋଜନା। ହେଲେ ମନ୍ତ୍ରୀଙ୍କ ନିଜ ନିର୍ବାଚନମଣ୍ଡଳୀରେ ଯଦି ଗ୍ରାମବାସୀଙ୍କୁ ନିଜ ଗାଁର ରାସ୍ତା ମରାମତି ପାଇଁ ଚାନ୍ଦା ଆଦାୟ କରିବାକୁ ପଡ଼ୁଛି, ତେବେ ସରକାରୀ ବିକାଶର ବାସ୍ତବ ଚିତ୍ର କ’ଣ? ଏହା କେବଳ ଏକ ରାସ୍ତାର ଦୁରବସ୍ଥା ନୁହେଁ, ବରଂ ସମ୍ପୃକ୍ତ ବିଭାଗ ଓ ପ୍ରଶାସନର କାର୍ଯ୍ୟଦକ୍ଷତା ଉପରେ ଏକ ବଡ଼ ପ୍ରଶ୍ନଚିହ୍ନ।
ସମ୍ବଲପୁର ଜିଲ୍ଲା ଜମନକିରା ବ୍ଲକ ଅନ୍ତର୍ଗତ ବନ୍ଧପାଲି ଗ୍ରାମର ରାସ୍ତା ସମସ୍ୟା ଏବେ ସରକାରୀ ବିକାଶର ଦାବିକୁ କାଠଗଡ଼ାରେ ଠିଆ କରିଛି। ଦୀର୍ଘ ବର୍ଷ ଧରି ଗ୍ରାମ୍ୟ ଉନ୍ନୟନ (RD) ବିଭାଗ ଅଧୀନରେ ଥିବା ଏହି ରାସ୍ତା ଶୋଚନୀୟ ଅବସ୍ଥାରେ ପଡ଼ିରହିଛି। ରାସ୍ତାରେ ବଡ଼ ବଡ଼ ଖାଲଖମା, କାଦୁଅ ଓ ଜମି ରହୁଥିବା ପାଣି ଯୋଗୁଁ ସାଧାରଣ ଯାତାୟାତ ଦୁର୍ବିଷହ ହୋଇପଡ଼ିଛି। ବର୍ଷା ଦିନେ ଏହି ରାସ୍ତା ଦେଇ ଯିବା ଅର୍ଥ ଦୁର୍ଘଟଣାକୁ ଆମନ୍ତ୍ରଣ କରିବା।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ରାସ୍ତା ମରାମତି ପାଇଁ ବାରମ୍ବାର ଗୁହାରି କରାଯାଇଛି। ଗଣମାଧ୍ୟମ ଜରିଆରେ ମଧ୍ୟ ପ୍ରଶାସନ ଓ ସମ୍ପୃକ୍ତ ବିଭାଗକୁ ଅବଗତ କରାଯାଇଛି। କିନ୍ତୁ ଦୁର୍ଭାଗ୍ୟର ବିଷୟ, ଏତେ ଦିନ ପରେ ମଧ୍ୟ ସମସ୍ୟାର ସ୍ଥାୟୀ ସମାଧାନ ହୋଇପାରିନାହିଁ।
ଶେଷରେ ପ୍ରଶାସନର ନିରବତାରେ ଅତିଷ୍ଠ ହୋଇ ଗ୍ରାମବାସୀ ନିଜେ ରାସ୍ତା ମରାମତି କରିବାକୁ ଅଣ୍ଟା ଭିଡ଼ିଛନ୍ତି। ଗାଁରୁ ଚାନ୍ଦା ଆଦାୟ କରି ନିଜସ୍ୱ ଅର୍ଥରେ JCB ଓ ଟ୍ରାକ୍ଟର ନିୟୋଜିତ କରି ରାସ୍ତାର ଖାଲଖମା ପୋତିବା କାମ ଆରମ୍ଭ କରିଛନ୍ତି। ଯେଉଁ କାମ ସରକାରୀ ବିଭାଗର ଦାୟିତ୍ୱ ହେବା କଥା, ସେହି କାମ ପାଇଁ ଗ୍ରାମବାସୀଙ୍କୁ ନିଜ ପକେଟରୁ ଟଙ୍କା ଖର୍ଚ୍ଚ କରିବାକୁ ପଡ଼ୁଛି।

ସବୁଠାରୁ ବଡ଼ କଥା ହେଉଛି, ଏହି ଅଞ୍ଚଳ ରାଜ୍ୟର ମନ୍ତ୍ରୀ ରବିନାରାୟଣ ନାଏକଙ୍କ ନିର୍ବାଚନମଣ୍ଡଳୀ ଅନ୍ତର୍ଗତ। ନିଜ ନିର୍ବାଚନମଣ୍ଡଳୀର ଗୋଟିଏ ଗ୍ରାମରେ ରାସ୍ତା ମରାମତି ପାଇଁ ଲୋକଙ୍କୁ ଚାନ୍ଦା ଉଠାଇବାକୁ ପଡ଼ିବା ଘଟଣା ନିଶ୍ଚିତ ଭାବେ ଜନପ୍ରତିନିଧି ଓ ପ୍ରଶାସନ ପାଇଁ ଆତ୍ମସମୀକ୍ଷାର ବିଷୟ।
ପ୍ରଶ୍ନ ଉଠୁଛି, ନିର୍ବାଚନ ସମୟରେ ବିକାଶର ପ୍ରତିଶ୍ରୁତି ଦେଉଥିବା ନେତାମାନେ ଏଭଳି ମୌଳିକ ସମସ୍ୟା ସମୟରେ କେଉଁଠି? RD ବିଭାଗ କାହିଁକି ନିଜ ଦାୟିତ୍ୱ ନିର୍ବାହ କରୁନାହିଁ? ବ୍ଲକ ଓ ଜିଲ୍ଲା ପ୍ରଶାସନ କେତେଥର ଏହି ରାସ୍ତାର ସ୍ଥିତି ଅନୁଧ୍ୟାନ କରିଛି? ଏହି ରାସ୍ତାର ସ୍ଥାୟୀ ମରାମତି ପାଇଁ କେବେ ଅର୍ଥ ମଞ୍ଜୁର ହେବ?
ବନ୍ଧପାଲି ଗ୍ରାମବାସୀଙ୍କ ଏକତା ପ୍ରଶଂସନୀୟ, କିନ୍ତୁ ନିଜ ଗାଁର ସରକାରୀ ରାସ୍ତା ମରାମତି ପାଇଁ ଗ୍ରାମବାସୀଙ୍କୁ ଚାନ୍ଦା ଆଦାୟ କରିବାକୁ ପଡ଼ିବା ସରକାରୀ ବ୍ୟବସ୍ଥା ପାଇଁ ଏକ ଲଜ୍ଜାଜନକ ପରିସ୍ଥିତି। ଏହା ପ୍ରଶାସନର ଗାଲରେ ଶକ୍ତ ଚାପୁଡ଼ା ସଦୃଶ।
ଏବେ ଅପେକ୍ଷା, ମନ୍ତ୍ରୀ ରବିନାରାୟଣ ନାଏକ ଏହି ଘଟଣାକୁ କେତେ ଗୁରୁତ୍ୱ ଦେଉଛନ୍ତି ଏବଂ ସମ୍ପୃକ୍ତ RD ବିଭାଗ ରାସ୍ତାର ସ୍ଥାୟୀ ନିର୍ମାଣ ପାଇଁ କେବେ ପଦକ୍ଷେପ ନେଉଛି। ନା ଏହି ଗ୍ରାମବାସୀଙ୍କ ଦୁର୍ଦ୍ଦଶା ଆଗକୁ ମଧ୍ୟ ଏମିତି ଜାରି ରହିବ?