ଏଏନ୍ଆର୍ଏଫ୍ ଓ ଏନ୍ଆଇଟି ରାଉରକେଲା ପକ୍ଷରୁ ‘ରିସର୍ଚ୍ଚ ଏକ୍ସ ଇମ୍ପାକ୍ଟ କନକ୍ଲେଭ୍-୨୦୨୬’ ଉଦ୍ଘାଟିତ
‘ସ୍ଥାୟୀ ବିକାଶ ପାଇଁ ସମନ୍ୱୟ’ ଶୀର୍ଷକ ଦୁଇଦିନିଆ ସମ୍ମିଳନୀରେ ଦେଶର ୩୦୦ରୁ ଊର୍ଦ୍ଧ୍ୱ ଶିକ୍ଷାବିତ୍ ଓ ଗବେଷକଙ୍କ ଯୋଗଦାନ
ରାଉରକେଲା, ୧୬/୧୦ (ବସନ୍ତ କୁମାର ଜେନା, ଶାସକ ପ୍ରଶାସକ ): ଗବେଷଣା କ୍ଷେତ୍ରରେ ସହଯୋଗ ବୃଦ୍ଧି, ଶିଳ୍ପ ଓ ଶିକ୍ଷାନୁଷ୍ଠାନ ମଧ୍ୟରେ ସମନ୍ୱୟ ସ୍ଥାପନ ତଥା ଗବେଷଣାର ଫଳାଫଳକୁ ସମାଜ ଓ ଅର୍ଥନୀତିର ବିକାଶରେ ଉପଯୋଗ କରିବା ଲକ୍ଷ୍ୟରେ ଏଏନ୍ଆର୍ଏଫ୍ ଓ ଏନ୍ଆଇଟି ରାଉରକେଲା ପକ୍ଷରୁ ‘ରିସର୍ଚ୍ଚ ଏକ୍ସ ଇମ୍ପାକ୍ଟ କନକ୍ଲେଭ୍-୨୦୨୬’ ଆୟୋଜିତ ହୋଇଛି। ଅକ୍ଟୋବର ୧୫ ତାରିଖରେ ଏନ୍ଆଇଟି ରାଉରକେଲା ପରିସରରେ ଏହି ଦୁଇଦିନିଆ ସମ୍ମିଳନୀ ଉଦ୍ଘାଟିତ ହୋଇଥିଲା। ‘ସ୍ଥାୟୀ ବିକାଶ ପାଇଁ ସମନ୍ୱୟ’ ବିଷୟବସ୍ତୁକୁ ଆଧାର କରି ଆୟୋଜିତ ଏହି ସମ୍ମିଳନୀରେ ଦେଶର ବିଭିନ୍ନ ଅନୁଷ୍ଠାନରୁ ୩୦୦ରୁ ଊର୍ଦ୍ଧ୍ୱ ଶିକ୍ଷାବିତ୍ ଓ ଗବେଷକ ଯୋଗ ଦେଇଛନ୍ତି।
ଉଦ୍ଘାଟନୀ ଅଧିବେଶନରେ ଆନୁସନ୍ଧାନ ନ୍ୟାସନାଲ ରିସର୍ଚ୍ଚ ଫାଉଣ୍ଡେସନ୍ (ଏଏନ୍ଆର୍ଏଫ୍)ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଡ. ଶିବକୁମାର କଲ୍ୟାଣରମଣ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ଏନ୍ଆଇଟି ରାଉରକେଲାର ନିର୍ଦ୍ଦେଶକ ପ୍ରଫେସର କେ. ଉମାମହେଶ୍ୱର ରାଓ, ଆୟୋଜନ କମିଟିର ଅଧ୍ୟକ୍ଷ ପ୍ରଫେସର ହିମାଂଶୁ ଭୂଷଣ ସାହୁ, ସହ-ଅଧ୍ୟକ୍ଷ ପ୍ରଫେସର ସ୍ୱଦେଶ କୁମାର ପରତିହାରଙ୍କ ସମେତ ଅନୁଷ୍ଠାନର ବିଭିନ୍ନ ଡିନ୍ ଓ ରେଜିଷ୍ଟ୍ରାର ଉପସ୍ଥିତ ଥିଲେ।
ସ୍ୱାଗତ ଭାଷଣ ଦେଇ ପ୍ରଫେସର ହିମାଂଶୁ ଭୂଷଣ ସାହୁ କହିଥିଲେ ଯେ, ଗବେଷକ, ଶିଳ୍ପ ବିଶେଷଜ୍ଞ, ଅଧ୍ୟାପକ ଓ ଯୁବ ଗବେଷକମାନଙ୍କ ମଧ୍ୟରେ ଭାବ ବିନିମୟ, ନୂତନ ଉଦ୍ଭାବନର ପ୍ରଦର୍ଶନ ଏବଂ ଗବେଷଣା କ୍ଷେତ୍ରରେ ସହଯୋଗ ସ୍ଥାପନ ପାଇଁ ଏହି ସମ୍ମିଳନୀ ଏକ ଉତ୍ତମ ମଞ୍ଚ। କୃଷି, ସ୍ୱାସ୍ଥ୍ୟସେବା, ଶକ୍ତି, ପରିବେଶ ସୁରକ୍ଷା ଓ ଜଳବାୟୁ ସହନଶୀଳତା ଭଳି ଜଟିଳ ସମସ୍ୟାର ସମାଧାନ ପାଇଁ ବିଭିନ୍ନ ବିଷୟର ଗବେଷକଙ୍କ ମଧ୍ୟରେ ସମନ୍ୱୟ ଏବଂ ଶିକ୍ଷାନୁଷ୍ଠାନ, ଶିଳ୍ପ ଓ ସମାଜ ମଧ୍ୟରେ ପାରସ୍ପରିକ ସହଯୋଗ ଅତ୍ୟନ୍ତ ଜରୁରୀ ବୋଲି ସେ ମତ ଦେଇଥିଲେ।
ମୁଖ୍ୟ ଅତିଥି ଡ. କଲ୍ୟାଣରମଣ ନିଜ ଅଭିଭାଷଣରେ କହିଥିଲେ ଯେ, ଗବେଷଣା କେବଳ ପ୍ରକାଶିତ ଗବେଷଣା ପତ୍ର କିମ୍ବା ପରୀକ୍ଷାଗାର ମଧ୍ୟରେ ସୀମିତ ରହିବା ଉଚିତ ନୁହେଁ। ଏହାର ପ୍ରଭାବ ସମାଜରେ ଦୃଶ୍ୟମାନ ହେବା ସହ ମାପଯୋଗ୍ୟ ଫଳାଫଳ ସୃଷ୍ଟି କରିବା ଆବଶ୍ୟକ। ଗବେଷକମାନେ ଉଚ୍ଚାକାଂକ୍ଷୀ ବୈଜ୍ଞାନିକ ଲକ୍ଷ୍ୟ ନେଇ କାର୍ଯ୍ୟ କରିବା ସହ ବିଭିନ୍ନ ଅନୁଷ୍ଠାନ ଓ ବିଷୟ ମଧ୍ୟରେ ସହଯୋଗ ବଢ଼ାଇବା ଉଚିତ। ଶିଳ୍ପ ସଂସ୍ଥାଗୁଡ଼ିକ ସହ ମିଶି ନୂତନ ଆବିଷ୍କାରକୁ ପ୍ରଯୁକ୍ତିବିଦ୍ୟା, ଉଦ୍ୟୋଗ ଓ ସାମାଜିକ ସମସ୍ୟାର ସମାଧାନରେ ପରିଣତ କରିବାକୁ ସେ ଗବେଷକମାନଙ୍କୁ ଆହ୍ୱାନ ଦେଇଥିଲେ।
ଏନ୍ଆଇଟି ରାଉରକେଲାର ନିର୍ଦ୍ଦେଶକ ପ୍ରଫେସର କେ. ଉମାମହେଶ୍ୱର ରାଓ ନିଜ ଅଭିଭାଷଣରେ ଭାରତର ଗବେଷଣା ଓ ନବସୃଜନ କ୍ଷେତ୍ରରେ ଏନ୍ଆଇଟି ରାଉରକେଲା ଏବଂ ଏହାର ସହଯୋଗୀ ଅନୁଷ୍ଠାନଗୁଡ଼ିକର ଅବଦାନ ସମ୍ପର୍କରେ ଆଲୋକପାତ କରିଥିଲେ। ‘ପାର୍ଟନରସିପ୍ସ ଫର୍ ଆକ୍ସିଲେରେଟେଡ୍ ଇନୋଭେସନ୍ ଆଣ୍ଡ୍ ରିସର୍ଚ୍ଚ’ (PAIR) ଯୋଜନା ଅନ୍ତର୍ଗତ ମୁଖ୍ୟ ଅନୁଷ୍ଠାନ ଓ ସହଯୋଗୀ ଅନୁଷ୍ଠାନଗୁଡ଼ିକ ମଧ୍ୟରେ ସମନ୍ୱୟର ଗୁରୁତ୍ୱକୁ ସେ ଉଲ୍ଲେଖ କରିଥିଲେ। ଉପଯୁକ୍ତ ସହାୟତା ଓ ସୁଯୋଗ ମିଳିଲେ ଉତ୍କୃଷ୍ଟ ଗବେଷଣା କେନ୍ଦ୍ର ବାହାରେ ଥିବା ଅନୁଷ୍ଠାନଗୁଡ଼ିକ ମଧ୍ୟ ଉଚ୍ଚମାନର ଗବେଷଣା ଫଳାଫଳ ଦେବାର କ୍ଷମତା ରଖନ୍ତି ବୋଲି ସେ କହିଥିଲେ। ଏଥିସହ ଏନ୍ଆଇଟି ଓ ଅନ୍ୟାନ୍ୟ ଶିକ୍ଷାନୁଷ୍ଠାନଗୁଡ଼ିକୁ ନିଜର ଗବେଷଣା ଦକ୍ଷତା ପ୍ରଦର୍ଶନ ଓ ବୃହତ୍ ପ୍ରକଳ୍ପ ହାତକୁ ନେବା ପାଇଁ ଅଧିକ ସୁଯୋଗ ଦେବାକୁ ସେ ଗୁରୁତ୍ୱ ଦେଇଥିଲେ।
ଏହି ଅବସରରେ ବିଭିନ୍ନ ଅନୁଷ୍ଠାନ ଓ ସଂସ୍ଥାରୁ ଆସିଥିବା ଏଏନ୍ଆର୍ଏଫ୍ର ୩୦ ଜଣ ଅନୁଦାନପ୍ରାପ୍ତ ଗବେଷକ ନିଜ ଗବେଷଣା ଓ ଏହାର ସାମାଜିକ ପ୍ରଭାବ ସମ୍ପର୍କରେ ପ୍ରଦର୍ଶନ କରିଥିଲେ। ଏକ ଖୋଲା ମଞ୍ଚରେ ସେମାନେ ନିଜର ଗବେଷଣା ଉପସ୍ଥାପନ କରିବା ସହ ଡ. କଲ୍ୟାଣରମଣଙ୍କଠାରୁ ମୂଲ୍ୟବାନ ପରାମର୍ଶ ଓ ମତାମତ ଗ୍ରହଣ କରିଥିଲେ।
ସମ୍ମିଳନୀର ଏକ ଉଲ୍ଲେଖନୀୟ ଫଳାଫଳ ହେଉଛି ଶିଳ୍ପ ସଂସ୍ଥାଗୁଡ଼ିକ ପକ୍ଷରୁ ଗବେଷଣାକୁ ସହଯୋଗ କରିବା ପାଇଁ ପ୍ରତିଶ୍ରୁତି। ଏଥିରେ ଇଫ୍କୋ ଇ-ବଜାର ଲିମିଟେଡ୍ର ସିଇଓ ମଧୁଲିକା ଶୁକ୍ଳା, ଆଦିତ୍ୟ ଆଲୁମିନିୟମ୍ (ହିଣ୍ଡାଲ୍କୋ)ର ସଭାପତି ତଥା ୟୁନିଟ୍ ମୁଖ୍ୟ ଇଞ୍ଜିନିୟର ଜଗନ୍ନାଥ ପି. ନାୟକ, ଜେଏସ୍ଡବ୍ଲ୍ୟୁ ଏନର୍ଜି ଲିମିଟେଡ୍ର ଗବେଷଣା ଓ ବିକାଶ ବିଭାଗ ମୁଖ୍ୟ ଦୀପକ ଖୁଲେ ଏବଂ ଥେଟାବେଟା ଆଲଗୋରିଦମ୍ସ ପ୍ରାଇଭେଟ୍ ଲିମିଟେଡ୍ର ପ୍ରତିଷ୍ଠାତା ତଥା ପରିଚାଳନା ନିର୍ଦ୍ଦେଶକ ପ୍ରଦୀପ ବେହେରା ପ୍ରମୁଖ ଗବେଷକଙ୍କ ସହ ମିଶି ଗବେଷଣା ଓ ବିକାଶମୂଳକ ପ୍ରକଳ୍ପ ଏବଂ ପାଇଲଟ୍ ପର୍ଯ୍ୟାୟର ଅଧ୍ୟୟନକୁ ସହଯୋଗ କରିବା ପାଇଁ ଆଗ୍ରହ ପ୍ରକାଶ କରିଥିଲେ।
ଏହି ସମ୍ମିଳନୀରେ ଏଏନ୍ଆର୍ଏଫ୍ର ଭିଜିଟିଂ ସାଇଣ୍ଟିଷ୍ଟ ପ୍ରଫେସର ପି. କୁମାରଗୁରୁ ‘ସାରଳ ଏଆଇ’ (SARAL AI) ବ୍ୟବହାର କରି ବିଭିନ୍ନ ଭାଷାରେ ଗବେଷଣାକୁ ସାଧାରଣ ଲୋକଙ୍କ ପାଖରେ ପହଞ୍ଚାଇବା ସମ୍ପର୍କରେ ଏକ କର୍ମଶାଳା ପରିଚାଳନା କରିଥିଲେ। କୃତ୍ରିମ ବୁଦ୍ଧିମତ୍ତା (ଏଆଇ) ଆଧାରିତ ଉପକରଣ କିପରି ଗବେଷଣାର ଫଳାଫଳକୁ ଅଧିକ ସରଳ ଓ ସହଜରେ ବୁଝିହେବା ଭଳି କରି ସାଧାରଣ ଜନତାଙ୍କ ନିକଟରେ ପହଞ୍ଚାଇପାରିବ, ସେନେଇ ଆଲୋଚନା ହୋଇଥିଲା।
ଏହାସହ ସ୍ଥାୟୀ କୃଷି, ସ୍ୱାସ୍ଥ୍ୟସେବା ଓ ଚିକିତ୍ସା ପ୍ରଯୁକ୍ତିବିଦ୍ୟା, ଶକ୍ତି ପ୍ରଯୁକ୍ତିବିଦ୍ୟା ଏବଂ ପରିବେଶ ସ୍ଥାୟୀତ୍ୱ ଭଳି ଚାରିଟି ପ୍ରମୁଖ ବିଷୟବସ୍ତୁ ଉପରେ ଗବେଷଣାରତ ଛାତ୍ରଛାତ୍ରୀମାନେ ପୋଷ୍ଟର ମାଧ୍ୟମରେ ନିଜର ଗବେଷଣା ଉପସ୍ଥାପନ କରିଥିଲେ। ପ୍ରତ୍ୟେକ ବିଷୟବସ୍ତୁରେ ଶ୍ରେଷ୍ଠ ଗବେଷଣା ପୋଷ୍ଟର ପାଇଁ ପୁରସ୍କାର ପ୍ରଦାନ କରାଯାଇଥିଲା।
ସମ୍ମିଳନୀର ବିଭିନ୍ନ କାର୍ଯ୍ୟକ୍ରମକୁ ପ୍ରଫେସର ଶାନ୍ତନୁ ବେହେରା, ପ୍ରଫେସର ପଙ୍କଜ ସା, ପ୍ରଫେସର ଦେବେନ୍ଦ୍ର ବର୍ମା, ପ୍ରଫେସର ହରେକୃଷ୍ଣ ସାହୁ, ପ୍ରଫେସର ଶେଖ୍ ମହମ୍ମଦ ଇକ୍ୱିନୁଦ୍ଦିନ, ପ୍ରଫେସର ପ୍ରବତ ରାୟ, ପ୍ରଫେସର ବିନୋଦ ବିହାରୀ ସାହୁ ଏବଂ ପ୍ରଫେସର ପାର୍ଥ ସାହା ପ୍ରମୁଖ ସଂଯୋଜନା କରିଥିଲେ।