ପାଠପଢା ପରେ ଏବେ ନୃତ୍ୟର ଯାଦୁ : ଅବସରପ୍ରାପ୍ତ ଶିକ୍ଷକଙ୍କ ଠୁମକାରେ ଝୁମିଲେ ଛାତ୍ରଛାତ୍ରୀ ଓ ଦର୍ଶକ

ଗୁଣପୁର ରୁ ସନ୍ତୋଷ କୁମାର ସୁବୁଦ୍ଧି: ବୟସ କେବଳ ଏକ ସଂଖ୍ୟା ମାତ୍ର, ଏହାକୁ ପୁଣି ଥରେ ସତ ପ୍ରମାଣିତ କରି ଦେଖାଇଛନ୍ତି ଜଣେ ଅବସରପ୍ରାପ୍ତ ଶିକ୍ଷକ ଶ୍ରୀ ହରିଶ୍ ଚନ୍ଦ୍ର ଗୌଡ଼ । ଗୁଣପୁର ବ୍ଲକ ଟଳଣା ପଞ୍ଚାୟତ ଅନ୍ତର୍ଗତ କିତୁଙ୍ଗ ଉଚ୍ଚ ପ୍ରାଥମିକ ବିଦ୍ୟାଳୟରେ ହୋଇଥିବା କ୍ଲଷ୍ଟର ସ୍ତରୀୟ ସୁରଭି କାର୍ଯ୍ୟକ୍ରମ ରେ ଅବସରପ୍ରାପ୍ତ ଶିକ୍ଷକ ଶ୍ରୀ ହରିଶ୍ ଚନ୍ଦ୍ର ଗୌଡ଼ଙ୍କ ଏକ ଦମଦାର ନୃତ୍ୟ ଏବେ ସାରା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଛାତ୍ରଛାତ୍ରୀଙ୍କ ମଧ୍ୟରେ ଲୁକ୍କାୟିତ ପ୍ରତିଭାର ବିକାଶ ପାଇଁ ଆୟୋଜିତ ବ୍ଲକ ସ୍ତରୀୟ ‘ସୁରଭି’ କାର୍ଯ୍ୟକ୍ରମରେ ସେ ସମ୍ମାନିତ ଅତିଥି ଭାବେ ଯୋଗ ଦେଇଥିବା ବେଳେ ତାଙ୍କର ଏହି ନୃତ୍ୟ ସଭିଙ୍କ ମନ ମୋହିଛି।
ସୂଚନା ଅନୁଯାୟୀ, କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ମଞ୍ଚାସୀନ ଥିବା ୬୫ ବର୍ଷୀୟ ଶ୍ରୀ ଗୌଡ଼ଙ୍କୁ ଯେତେବେଳେ ନୃତ୍ୟ ପାଇଁ ଅନୁରୋଧ କରାଯାଇଥିଲା, ସେ ନିଜକୁ ଅଟକାଇ ପାରିନଥିଲେ। ସେ ମଞ୍ଚ ଉପରକୁ ଆସିବା ମାତ୍ରେ ନିଜର ପାରମ୍ପରିକ ଏବଂ ଆକର୍ଷଣୀୟ ନୃତ୍ୟ ଶୈଳୀରେ ସେଠାରେ ଉପସ୍ଥିତ ସମସ୍ତ ଦର୍ଶକ, ଶିକ୍ଷକ ଶିକ୍ଷୟିତ୍ରୀ ଓ କୋମଳମତି ଛାତ୍ରଛାତ୍ରୀଙ୍କୁ ଝୁମାଇ ଦେଇଥିଲେ। ତାଙ୍କ ଠୁମକାରେ ପୁରା ପରିବେଶ ତାଳି ମାଡ଼ରେ କମ୍ପି ଉଠିଥିଲା।
୬୫ ବର୍ଷ ବୟସରେ ମଧ୍ୟ ତାଙ୍କର ଏଭଳି ଚମତ୍କାର ଶକ୍ତି (Energy) ଏବଂ ନୃତ୍ୟ ପ୍ରତି ଥିବା ଭଲପାଇବା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଛି। ଏହି ନୃତ୍ୟର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୁରଭି କାର୍ଯ୍ୟକ୍ରମକୁ ନିଜ ନୃତ୍ୟ ମାଧ୍ୟମରେ ଅଧିକ ରଙ୍ଗାରଙ୍ଗ କରିଥିବାରୁ ଏବଂ ଜୀବନକୁ ଉତ୍ସାହର ସହ ଜୀଇଁବାର ଏକ ସୁନ୍ଦର ବାର୍ତ୍ତା ଦେଇଥିବାରୁ ସର୍ବସାଧାରଣରେ ଗୁରୁଜୀଙ୍କୁ ବେଶ ପ୍ରଶଂସା କରାଯାଉଛି।