୮୫ ପ୍ରତିଶତରୁ ଉର୍ଧ୍ଵ ପ୍ରାଥମିକ ବିଦ୍ୟାଳୟରେ ପ୍ରତି ଶ୍ରେଣୀ ପାଇଁ ବଖରାଏ କରି ଶ୍ରେଣୀଗୃହ ନାହିଁ
ଭୁବନେଶ୍ୱର/ମାନସୀ ମିଶ୍ର : ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧୀନରେ ଥିବା ରାଜ୍ୟର ପ୍ରାଥମିକ ବିଦ୍ୟାଳୟଗୁଡ଼ିକ ମଧ୍ୟରୁ ପ୍ରାୟ ୯୫ ପ୍ରତିଶତରେ ପ୍ରତି ଶ୍ରେଣୀ ଲାଗି ଜଣେ ଲେଖାଏଁ ଶିକ୍ଷକ ନାହାନ୍ତି । ସେହିପରି ୮୫ ପ୍ରତିଶତରୁ ଉର୍ଧ୍ଵ ପ୍ରାଥମିକ ବିଦ୍ୟାଳୟରେ ପ୍ରତି ଶ୍ରେଣୀ ପାଇଁ ବଖରାଏ କରି ଶ୍ରେଣୀଗୃହ ନାହିଁ । ବିଧାୟକ ଦିଲିପ ରାୟ ପଚାରିଥିବା ଏକ ପ୍ରଶ୍ନର ଉତ୍ତରରେ ବିଭାଗୀୟ ମନ୍ତ୍ରୀ ବଦ୍ରି ନାରାୟଣ ପାତ୍ରଙ୍କ ତଥ୍ୟରୁ ଏହା ଜଣାପଡ଼ିଛି । ମନ୍ତ୍ରୀଙ୍କ ପ୍ରଦତ୍ତ ସୂଚନାନୁଯାୟୀ ଓଡ଼ିଶାରେ ୩୩,୩୯୮ଟି ପ୍ରାଥମିକ ବିଦ୍ୟାଳୟ ଥିବା ବେଳେ ସେଥିରୁ ମାତ୍ର ୧୪୪୮ଟିରେ ପ୍ରତି ଶ୍ରେଣୀ ଲାଗି ଜଣେ ଲେଖାଏଁ ଶିକ୍ଷକ ଓ ୪୦୩୨ରେ ପ୍ରତି ଶ୍ରେଣୀ ଲାଗି ବଖରାଏ କରି ଶ୍ରେଣୀଗୃହ ରହିଛି । ସେହିପରି ରାଜ୍ୟରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧିରେ ୧୭,୬୯୬ଟି ଉଚ୍ଚ ପ୍ରାଥମିକ ବିଦ୍ୟାଳୟ ଥିବା ବେଳେ ସେଥିରୁ ୫,୩୭୪ଟିରେ ପ୍ରତି ଶ୍ରେଣୀ ଲାଗି ଜଣେ କରି ଶିକ୍ଷକ ଓ ୫,୮୮୬ଟିରେ ପ୍ରତି ଶ୍ରେଣୀ ପାଇଁ ବଖରାଏ କରି ସ୍ୱତନ୍ତ୍ର ଘର ରହିଛି ।
ଓଡ଼ିଶାରେ ମୋଟ୍ ୫୧,୦୯୪ଟି ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ଥିବା ବେଳେ ଏଥିରୁ ୯,୯୧୮ଟି ବିଦ୍ୟାଳୟରେ ପ୍ରତି ଶ୍ରେଣୀ ଲାଗି ବଖରାଏ କରି ଶ୍ରେଣୀଗୃହ ଓ ୬,୮୨୨ଟି ସ୍କୁଲରେ ପ୍ରତି ଶ୍ରେଣୀ ଲାଗି ଜଣେ କରି ଶିକ୍ଷକ ଅଛନ୍ତି । ଶିକ୍ଷା ଅଧିକାର ନିୟମାନୁଯାୟୀ ବିଦ୍ୟାଳୟଗୁଡ଼ିକରେ ଛାତ୍ରଛାତ୍ରୀ ସଂଖ୍ୟା ଅନୁଯାୟୀ ଶ୍ରେଣୀ କକ୍ଷ ଓ ଶିକ୍ଷକ ବ୍ୟବସ୍ଥା କରାଯାଉଥିବା ମନ୍ତ୍ରୀ ଉଲ୍ଲେଖ କରିଛନ୍ତି । ଏହି ବିଦ୍ୟାଳୟଗୁଡ଼ିକ ମଧ୍ୟରୁ ୫୦,୭୫୨ଟିର ନିଜସ୍ୱ ଘର ଥିବା ବେଳେ ୪୦,୫୦୭ଟିର ରୋଷଘର ଓ ୧୨,୦୨୮ର ଖେଳ ପଡ଼ିଆ ଅଛି । ଏଥିରୁ ପ୍ରାୟ ୩୯ ହଜାର ସ୍କୁଲରେ ଖେଳ ପଡ଼ିଆ ଥିବା ଜଣାପଡ଼ିଛି । ଏହି ସ୍କୁଲଗୁଡ଼ିକ ମଧ୍ୟରୁ ମାତ୍ର ୨,୯୬୫ରେ ପାଇପ୍ ଯୋଗେ ପାନିୟ ଜଳ ଯୋଗାଣ ବ୍ୟବସ୍ଥା ଥିବା ବେଳେ ୧୧,୦୦୭ରେ ସ୍କୁଲରେ ବିଦ୍ୟୁତ ସଂଯୋଗ ରହିଛି । ସେହିପରି ୩୩,୨୧୬ଟି ସ୍କୁଲର ପାଚେରୀ କିମ୍ବା ବାଡ଼ ଥି ବା ମନ୍ତ୍ରୀଙ୍କ ଉତ୍ତରରୁ ଜଣାପଡ଼ିଛି ।
ପ୍ରତି ଶ୍ରେଣୀ ପାଇଁ ସ୍ୱତନ୍ତ୍ର ଶ୍ରେଣୀ କକ୍ଷ ଓ ଅତି କାମରେ ଜଣେ କରି ଶିକ୍ଷକ ନ ରହିବା ଫଳରେ ପ୍ରାଥମିକ ସ୍ତରରୁ ଆମ ରାଜ୍ୟରେ ପିଲାମାନଙ୍କର ପାଠପଢ଼ାର ମୂଳଦୁଆ ଦୁର୍ବଳ ହେଉଥିବା ଘେନି ବିଧାୟକ ଶ୍ରୀ ରାୟ ଏକ ବିବୃତ୍ତିରେ ଉଦ୍ବେଗ ପ୍ରକାଶ କରିବା ସଙ୍ଗେ ସଙ୍ଗେ ଭିତ୍ତିଭୂମିର ବିକାଶ ସାଙ୍ଗକୁ ପର୍ଯ୍ୟାପ୍ତ ସଂଖ୍ୟକ ଯୋଗ୍ୟ ଶିକ୍ଷକ ନିଯୁକ୍ତି ଓ ଉନ୍ନତମାନର ଶିକ୍ଷା ବ୍ୟବସ୍ଥା ଉପରେ ସରକାର ଧ୍ୟାନ ଦେବାକୁ ଦାବି କରିଛନ୍ତି ।