କନ୍ଧମାଳରେ କଦଳୀ ଚାଷର ବିକାଶ ପାଇଁ ଟିଏସ୍ପିର ଅଭିନବ ପଦକ୍ଷେପ
ଆଦିବାସୀ ଚାଷୀଙ୍କୁ ମିଳିଲା ପ୍ରଶିକ୍ଷଣ, କଦଳୀ ଚାଷ ଆଣିଲା ନୂଆ ସମ୍ଭାବନା
ଭୁବନେଶ୍ଵର :ବୈଜ୍ଞାନିକ ଜ୍ଞାନକୌଶଳ ଓ ଉନ୍ନତ ଚାଷ ପ୍ରଣାଳୀ ଆପଣାଇ ଆଦିବାସୀ ଚାଷୀମାନେ ଏବେ ସ୍ୱାବଲମ୍ବୀ ହେବାର ନୂଆ ବାଟ ପାଇଛନ୍ତି। କନ୍ଧମାଳ ଜିଲ୍ଲା ଫୁଲବାଣୀ ବ୍ଲକ ଅନ୍ତର୍ଗତ କର୍ଣ୍ଣାଡା ଗ୍ରାମ ପଞ୍ଚାୟତର ମିଣିଆ ଗ୍ରାମରେ ‘ଜନଜାତି ଉପଯୋଜନା’ (ଟିଏସ୍ପି) ପଦକ୍ଷେପ ମାଧ୍ୟମରେ ଏକ ସ୍ୱତନ୍ତ୍ର କଦଳୀ ଚାଷ ତାଲିମ ଶିବିର ଅନୁଷ୍ଠିତ ହୋଇଯାଇଛି। ଏହି ଯୋଜନା ଅଧୀନରେ ୫୦ରୁ ଅଧିକ ଆଦିବାସୀ ପରିବାରଙ୍କୁ ଉତ୍ପାଦକତା ଓ ଆୟ ବୃଦ୍ଧି ସହିତ ସ୍ଥାୟୀ କୃଷି ପ୍ରଣାଳୀ ଆପଣାଇବା ଲକ୍ଷ୍ୟରେ ଆଧୁନିକ କୌଶଳ ଉପରେ ପ୍ରଶିକ୍ଷଣ ପ୍ରଦାନ କରାଯାଇଛି।
ଏହି ଅବସରରେ ଚାଷୀମାନଙ୍କୁ ଚାଷ କାର୍ଯ୍ୟରେ ସହାୟତା ପାଇଁ ଆବଶ୍ୟକୀୟ କୃଷି ଉପକରଣ ସହିତ ଗ୍ରାଣ୍ଡ୍ ନାଇନ୍, ଚମ୍ପା, ଗଜବଣ୍ଟାଳ ଏବଂ ପାଟକପୁରା ଭଳି ଉନ୍ନତ କିସମର କଦଳୀ ଚାରା ଯୋଗାଇ ଦିଆଯାଇଥିଲା। ବିଶେଷ କରି କଦଳୀ କାନ୍ଦି ବାହାରିବା ଠାରୁ ଅମଳ ପର୍ଯ୍ୟନ୍ତ ବିଭିନ୍ନ ପରିଚାଳନା ପଦ୍ଧତି ଏବଂ କଦଳୀ ଫସଲରେ ପାନାମା ୱିଲ୍ଟ ରୋଗର ନିରାକରଣ ଉପରେ ବିସ୍ତୃତ ତାଲିମ ଦିଆଯାଇଥିଲା।ରୋପଣ ପୂର୍ବରୁ କନ୍ଦ ଶୁଦ୍ଧିକରଣ (କର୍ମ କ୍ୟୁରିଂ) କୌଶଳ ଉପରେ ଏକ ସ୍ୱତନ୍ତ୍ର ପ୍ରଦର୍ଶନୀ ଅଧିବେଶନ ଆୟୋଜନ କରାଯିବା ସହ ଅମଳ ପରବର୍ତ୍ତୀ ପରିଚାଳନା ଏବଂ କଦଳୀଜାତ ଦ୍ରବ୍ୟର ମୂଲ୍ୟଯୁକ୍ତ ଉତ୍ପାଦ ପ୍ରସ୍ତୁତି ଉପରେ ତାଲିମ ପ୍ରଦାନ କରାଯାଇଥିଲା। ଏହି ଅବସରରେ କନିଷ୍ଠ ଉଦ୍ୟାନବିତ୍ ଡ. ସୌଦାମିନୀ ସ୍ୱାଇଁ ଏବଂ କନିଷ୍ଠ ଉଦ୍ଭିଦ ରୋଗ ବିଶେଷଜ୍ଞ ଡ. ନିରଞ୍ଜନ ଚିନାରା ଯୋଗଦେଇ ଚାଷୀମାନଙ୍କୁ ଉନ୍ନତ ଚାଷ ତଥା ଫସଲ ସୁରକ୍ଷା ପଦ୍ଧତି ବିଷୟରେ ମାର୍ଗଦର୍ଶନ କରିଥିଲେ।
ଉଲ୍ଲେଖଯୋଗ୍ୟ ଯେ, ଏହି ଅଞ୍ଚଳର ଆଦିବାସୀ ଚାଷୀମାନେ ଗତ ପାଞ୍ଚ ବର୍ଷ ଧରି କଦଳୀ ଚାଷରେ ନିୟୋଜିତ ଅଛନ୍ତି ଏବଂ ସେମାନଙ୍କ ମଧ୍ୟରୁ ଅନେକ ଉନ୍ନତ ଚାଷ ପ୍ରଣାଳୀ ମାଧ୍ୟମରେ ଲକ୍ଷ ଲକ୍ଷ ଟଙ୍କା ରୋଜଗାର କରି ନିଜର ଆର୍ଥିକ ସ୍ଥିତିରେ ଉଲ୍ଲେଖନୀୟ ଉନ୍ନତି ଆଣିପାରିଛନ୍ତି। ଏହି କାର୍ଯ୍ୟକ୍ରମର ମୁଖ୍ୟ ଲକ୍ଷ୍ୟ ହେଉଛି ସେମାନଙ୍କ ଜ୍ଞାନକୁ ଆହୁରି ସୁଦୃଢ଼ କରିବା ସହ ଫସଲ ନଷ୍ଟ ହ୍ରାସ କରିବା ଏବଂ ବ୍ୟବସାୟିକ କଦଳୀ ଉତ୍ପାଦନକୁ ପ୍ରୋତ୍ସାହିତ କରିବା।
ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି)ର ମାନ୍ୟବର କୁଳପତି ପ୍ରଫେସର ପ୍ରଭାତ ରାଉଳଙ୍କ ପ୍ରତ୍ୟକ୍ଷ ତତ୍ତ୍ୱାବଧାନ ଓ ସହାୟତାରେ ଏହି କାର୍ଯ୍ୟକ୍ରମ ପରିଚାଳିତ ହେଉଛି। ଏଥିସହ ଓୟୁଏଟି ଗବେଷଣା ବିଭାଗର ଡିନ୍ ଡ. ନିରଞ୍ଜନ ପଣ୍ଡାଙ୍କ ମାର୍ଗଦର୍ଶନ ଏବଂ ଫଳ ସମ୍ପର୍କିତ ‘ଏଆଇସିଆରପି’ (AICRP)ର ପ୍ରକଳ୍ପ ସଂଯୋଜକ ଡ. ପ୍ରକାଶ ପାଟିଲଙ୍କ ନେତୃତ୍ୱରେ ଏହି ପ୍ରକଳ୍ପ କାର୍ଯ୍ୟକାରୀ ହେଉଛି। ବୈଜ୍ଞାନିକ ହସ୍ତକ୍ଷେପ, ଦକ୍ଷତା ବିକାଶ ଏବଂ ଉନ୍ନତ ସମ୍ବଳର ଉପଲବ୍ଧତା ମାଧ୍ୟମରେ ଜନଜାତି ଉପଯୋଜନା (ଟିଏସ୍ପି) ଆଦିବାସୀ ସମ୍ପ୍ରଦାୟକୁ ଅଧିକ କୃଷି ସମୃଦ୍ଧି ତଥା ଆତ୍ମନିର୍ଭରଶୀଳତା ଦିଗରେ ଆଗେଇ ନେବାରେ ସହାୟକ ହେଉଛି।