ଅବସରପ୍ରାପ୍ତ ବାୟୁସେନା କର୍ମଚାରୀଙ୍କ ପରଲୋକ
ବେଲଗୁଣ୍ଠା, 20/9: -(ଶିବରାମ ଚୌଧୁରୀ )-ବେଲଗୁଣ୍ଠା ବ୍ଲକ୍ ଗୋବରା ନିକଟସ୍ଥ ବାସୁଦେବପୁର ଗ୍ରାମର ଅବସରପ୍ରାପ୍ତ ଭାରତୀୟ ବାୟୁ ସେନା କର୍ମଚାରୀ ଅଜୟ କୁମାର ଶତପଥୀ (୭୩)ଙ୍କ ଶନିବାର ସକାଳ ପ୍ରାୟ ୬ଟା ସମୟରେ ପରଲୋକ ଘଟିଛି। ସେ ଜଣେ ଧର୍ମପରାୟଣ, ପରୋପକାରୀ ଓ ମିଷ୍ଟଭାଷୀ ବ୍ୟକ୍ତି ଭାବେ ଅଞ୍ଚଳରେ ପରିଚିତ ଥିଲେ। ତାଙ୍କ ମୃତ୍ୟୁଶଯ୍ୟା ନିକଟରେ ତାଙ୍କ ପତ୍ନୀ ସରୋଜିନୀ , ଝିଅ ସୁନୀତା ଓ ସୁପ୍ରଭା , ଜ୍ୱାଇଁ ଭୋଳାନାଥ ରଥ ଓ ଆଦିତ୍ୟ ତ୍ରିପାଠୀ, ପୁଅ ରାକେଶ ଶତପଥୀଙ୍କ ସମେତ ପରିବାରବର୍ଗ ଉପସ୍ଥିତ ଥିଲେ। ତାଙ୍କ ପରଲୋକ ଖବର ପ୍ରଚାରିତ ହେବା ପରେ ପରିବାର, ବନ୍ଧୁବର୍ଗ ଓ ଅଞ୍ଚଳବାସୀଙ୍କ ମଧ୍ୟରେ ଶୋକର ଛାୟା ଖେଳିଯାଇଥିଲା। ତାଙ୍କ ମୃତ୍ୟୁରେ ବିଧାୟକ ପ୍ରତିନିଧି ଜିତେନ୍ଦ୍ର କୁମାର ନାୟକ,ବେଲଗୁଣ୍ଠା ପ୍ରେସକ୍ଲବ ସଭାପତି ତଥା ପୁର୍ବତନ ସମିତିସଭ୍ୟ ପ୍ରଦ୍ୟୁମ୍ନ ପାତ୍ର, ଯୁବ ସମାଜସେବୀ ରାଧାସ୍ୱାମୀ ରାଜୁ, ୱାର୍ଡ ସଭ୍ୟ ସରୋଜ ସ୍ୱାଇଁ, ସାମ୍ବାଦିକ ପଞ୍ଚାନନ ସାହୁ ଓ କୃଷ୍ଣଚନ୍ଦ୍ର ପଟନାୟକ ଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଶୋକବ୍ୟକ୍ତ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି। ତାଙ୍କ ମରଶରୀରକୁ ଗ୍ରାମ ଶ୍ମଶାନକୁ ନିଆଯାଇ ସେଠାରେ ଶେଷକୃତ୍ୟ ସମ୍ପନ୍ନ କରାଯାଇଥିଲା। ପୁଅ ରାକେଶ ଶତପଥୀ ମୁଖାଗ୍ନି ଦେଇଥିଲେ।