୯୦ ବର୍ଷର ମିଠା ସ୍ମୃତିକୁ ଛୁଇଁଲେ ବିଧାୟକ ରୂପେଶ ପାଣିଗ୍ରାହୀ

ଭବାନୀ ହୋଟେଲ ପରିଦର୍ଶନ କରି ପରିବାରର ସୁଖଦୁଃଖ ପଚାରି ବୁଝିଲେ, ସହଯୋଗର ପ୍ରତିଶ୍ରୁତି

ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ମାଟି ହାଣ୍ଡିର ସୁଗନ୍ଧ , କାଠ ଚୁଲିର ନିଆଁ ଏବଂ ନିଜ ହାତରେ ପ୍ରସ୍ତୁତ ପାରମ୍ପରିକ ମିଠାର ସ୍ୱାଦ—ଏହା କେବଳ ଏକ ମିଠା ଦୋକାନର କାହାଣୀ ନୁହେଁ, ବରଂ ପ୍ରାୟ ନଅ ଦଶନ୍ଧି ଧରି ଗୋଟିଏ ପରିବାରର ପରିଶ୍ରମ , ପରମ୍ପରା ଓ ଆତ୍ମୀୟତାର ଜୀବନ୍ତ ସ୍ମୃତି। ଏହି ଭାବନାପୂର୍ଣ୍ଣ ଐତିହ୍ୟକୁ ନିକଟରୁ ଦେଖିବା ସହ ପରିବାରର ସୁଖଦୁଃଖ ବୁଝିବା ପାଇଁ ଲାବଣ୍ୟଗଡ଼ସ୍ଥିତ ପ୍ରାୟ ୯୦ ବର୍ଷର ପୁରୁଣା ଭବାନୀ ହୋଟେଲ ପରିଦର୍ଶନ କରିଛନ୍ତି ପାରଳାଖେମୁଣ୍ଡି ବିଧାୟକ ରୂପେଶ ପାଣିଗ୍ରାହୀ।
ଗଜପତି ଜିଲ୍ଲା ଗୋଷାଣୀ ବ୍ଲକ ଅନ୍ତର୍ଗତ ଲାବଣ୍ୟଗଡ଼ରେ ଥିବା ଏହି ପ୍ରାଚୀନ ମିଠା ଦୋକାନ ଦୀର୍ଘଦିନ ଧରି ନିଜର ସ୍ୱତନ୍ତ୍ର ମିଠା ପାଇଁ ଅଞ୍ଚଳରେ ପରିଚିତ। ପ୍ରାୟ ୯୦ ବର୍ଷ ପୂର୍ବେ ସ୍ୱର୍ଗତ ଉଦୟ ପଣ୍ଡା ଏହି ହୋଟେଲର ଆରମ୍ଭ କରିଥିଲେ। ସେତେବେଳେ ଆରମ୍ଭ ହୋଇଥିବା ଏହି ଛୋଟ ପ୍ରୟାସ ଆଜି ଏକ ପରମ୍ପରାର ରୂପ ନେଇଛି। ବର୍ତ୍ତମାନ ତାଙ୍କ ପୁଅ ଭବାନୀ ପଣ୍ଡା ଏହି ପରମ୍ପରାକୁ ଆଗକୁ ବଢ଼ାଇ ହୋଟେଲଟି ପରିଚାଳନା କରୁଛନ୍ତି।
ଭବାନୀ ହୋଟେଲର ବିଶେଷତା ହେଉଛି ଏଠାକାର ପାରମ୍ପରିକ ମିଠା ପ୍ରସ୍ତୁତି ପ୍ରଣାଳୀ। ମହେନ୍ଦ୍ରଗିରି ଅଞ୍ଚଳରୁ କ୍ଷୀର ଆଣି ଛେନାପୋଡ଼ , ରସଗୋଲା , ରାବିଡ଼ି ସମେତ ବିଭିନ୍ନ ପ୍ରକାରର ମିଠା ପ୍ରସ୍ତୁତ କରାଯାଏ। ଆଧୁନିକ ଯନ୍ତ୍ରପାତିର ଯୁଗରେ ମଧ୍ୟ କାଠ ଚୁଲି ଓ ମାଟି ହାଣ୍ଡିରେ ପାରମ୍ପରିକ ପ୍ରଣାଳୀରେ ମିଠା ପ୍ରସ୍ତୁତ କରାଯିବା ଏହି ହୋଟେଲର ସ୍ୱତନ୍ତ୍ର ପରିଚୟ ହୋଇ ରହିଛି। ଏହି କାରଣରୁ ପୁରୁଣା ସ୍ୱାଦ ଖୋଜୁଥିବା ଲୋକଙ୍କ ପାଇଁ ଏହି ସ୍ଥାନ ଆଜି ମଧ୍ୟ ବିଶେଷ ଆକର୍ଷଣର କେନ୍ଦ୍ର।
ଆଜି ବିଧାୟକ ରୂପେଶ ପାଣିଗ୍ରାହୀ ଭବାନୀ ହୋଟେଲରେ ପହଞ୍ଚି ପରିବାର ସଦସ୍ୟଙ୍କ ସହ ଆତ୍ମୀୟତାର ସହିତ ମିଶିଥିଲେ। ସେମାନଙ୍କ ବ୍ୟବସାୟ କିପରି ଚାଲିଛି, କେଉଁ କେଉଁ ସମସ୍ୟାର ସମ୍ମୁଖୀନ ହେଉଛନ୍ତି ଏବଂ ଏହି ପୁରୁଣା ପାରମ୍ପରିକ ବ୍ୟବସାୟକୁ ଆଗକୁ ନେବାରେ କେଉଁ ସହାୟତା ଆବଶ୍ୟକ—ସେ ସମ୍ପର୍କରେ ପଚାରି ବୁଝିଥିଲେ।
୯୦ ବର୍ଷର ପରମ୍ପରା କେବଳ ଏକ ବ୍ୟବସାୟ ନୁହେଁ, ଏହା ଅଞ୍ଚଳର ଏକ ସ୍ୱାଦିଷ୍ଟ ଐତିହ୍ୟ। ଏହି ପରମ୍ପରା ଯେପରି ଆଗାମୀ ପିଢ଼ି ପର୍ଯ୍ୟନ୍ତ ବଞ୍ଚି ରହିବ, ସେଥିପାଇଁ ସମ୍ଭବ ସମସ୍ତ ସହଯୋଗ କରିବାକୁ ବିଧାୟକ ପ୍ରତିଶ୍ରୁତି ଦେଇଥିବା ଜଣାପଡ଼ିଛି।
ପରିବାରର ସମସ୍ୟାଗୁଡ଼ିକ ସମ୍ପର୍କରେ ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କୁ ଅବଗତ କରାଇ ଆବଶ୍ୟକ ସହଯୋଗର ହାତ ବଢ଼ାଇବା ନେଇ ସେ ଆଶ୍ୱାସନ ଦେଇଥିଲେ।
ବିଧାୟକଙ୍କ ଏହି ଗସ୍ତ କେବଳ ଜଣେ ଜନପ୍ରତିନିଧିଙ୍କ ଦୋକାନ ପରିଦର୍ଶନ ନଥିଲା; ଏହା ଥିଲା ଏକ ପୁରୁଣା ପରିବାରର ପରିଶ୍ରମ , ମାଟିର ସ୍ୱାଦ ଓ ୯୦ ବର୍ଷର ପରମ୍ପରା ପ୍ରତି ସମ୍ମାନର ଏକ ଭାବପୂର୍ଣ୍ଣ ପ୍ରୟାସ। ଏହି ଗ୍ରସ୍ତ ସମୟରେ ବିଧାୟକ ସହ ଗୋଷାଣୀ ବ୍ଲକ ଅଧ୍ୟକ୍ଷ ଏନ ବିରରାଜୁ ମଧ୍ୟ ଉପସ୍ଥିତ ଥିଲେ।