ପଦ୍ମପୁରରେ ବାଲି ଚୋରା ଚାଲାଣରେ ଜଡିତ ବାହନ ଚିହ୍ନଟ: ଉପ ଜିଲ୍ଲାପାଳଙ୍କ ଯୁକ୍ତ ଅଭିଯାନ

ପ୍ରଶାସନ ଜବତ କଲା ହାଇୱା ଟ୍ରକ ଓ ଏକ୍ସକାଭେଟର

ପଦ୍ମପୁର:- ପ୍ରାକୃତିକ ସମ୍ପଦର ସୁରକ୍ଷା, ବେଆଇନ ବାଲି ଚାଲାଣ ନିୟନ୍ତ୍ରଣ ଏବଂ ଖଣିଜ ନିୟମାବଳୀର ପୂର୍ଣ୍ଣ ଅନୁପାଳନ ସୁନିଶ୍ଚିତ କରିବା ପାଇଁ ପଦ୍ମପୁର ଉପଖଣ୍ଡ ପ୍ରଶାସନ ଏକ ବ୍ୟାପକ ଯୁକ୍ତ ଅଭିଯାନ ପରିଚାଳନା କରିଛି। ଉପ ଜିଲ୍ଲାପାଳ ଶ୍ରୀମତୀ ସ୍ନେହା ଅରୁଗୁଲାଙ୍କ ନେତୃତ୍ୱରେ ଅତିରିକ୍ତ ତହସିଲଦାର ତପସ୍ଵିନୀ କୁତ୍ରୁକା ଓ ମାମି ମହାନନ୍ଦ, ମାଇନିଂ ବିଭାଗର ଜୁନିୟର ମାଇନିଂ ଅଫିସରଙ୍କ ସହିତ ପଦ୍ମପୁର ଏବଂ ଜଗଦଲପୁର ପୋଲିସ ଏହି ଅଭିଯାନକୁ ସଫଳ କରିବାରେ ସକ୍ରିୟ ଭୂମିକା ନିଭାଇଛନ୍ତି। ଅଭିଯାନଟି ପଦ୍ମପୁରର ୪ଟି ଭିନ୍ନ ସ୍ଥାନକୁ ଲକ୍ଷ୍ୟ କରି ପରିଚାଳିତ ହୋଇଥିଲା, ଯେଉଁଠାରେ ବେଆଇନ ବାଲି ପରିବହନ ସମ୍ଭାବନା ବିଷୟରେ ପୂର୍ବ ସୂଚନା ମିଳିଥିଲା। ଯୁକ୍ତ ଦଳ ଦ୍ୱାରା ଯାଞ୍ଚ କାଳୀନ, ବାଲି ଚୋରା ଚାଲାଣ କାର୍ଯ୍ୟରେ ଜଡିତ ୩ଟି ହାଇୱା ଟ୍ରକ୍ ଏବଂ ୧ଟି ଏକ୍ସକାଭେଟରକୁ ଭେଉଁରିଆ ଛକ, ସାନ କୁଞ୍ଜରି, ଲହଣ୍ଡିପୁରରେ ଚିହ୍ନଟ କରାଯାଇ ବୈଧ ପ୍ରକ୍ରିୟା ଅନୁସାରେ ଜବତ କରାଗଲା।
ଉପ ଜିଲ୍ଲାପାଳ ଶ୍ରୀମତୀ ସ୍ନେହା ଅରୁଗୁଲା କହିଛନ୍ତି ଯେ, ପ୍ରାକୃତିକ ସମ୍ପଦର ସୁରକ୍ଷା ପାଇଁ ପ୍ରଶାସନ ସବୁବେଳେ ଶୂନ୍ୟ ସହିଷ୍ଣୁତା ନୀତି ଅନୁସରଣ କରିଛି ଏବଂ ବେଆଇନ ବାଲି ଚାଲାଣ କିମ୍ବା ଖଣିକାର୍ଯ୍ୟରେ ଜଡିତ କୌଣସି ବ୍ୟକ୍ତି ବା ବାହନକୁ କୌଣସି ପ୍ରକାର ଅବକାଶ ଦିଆଯିବ ନାହିଁ। ସେ ଆହୁରି କହିଛନ୍ତି ଯେ ସ୍ଥାନୀୟ ପୋଲିସ ଓ ମାଇନିଂ ବିଭାଗ ସହ ସମନ୍ୱୟ ରଖି ଏପରି ଅଭିଯାନ ନିୟମିତ ଭାବରେ ଚାଲୁ ରହିବ ଏବଂ ଅବୈଧ ବାଲି ଚକ୍ରକୁ ଦମନ କରିବା ପାଇଁ ସମସ୍ତ ପ୍ରୟାସ ଜାରି ରହିବ।