ପାବନକ୍ଷେତ୍ରରେ ଆଧ୍ୟାତ୍ମିକ ସାରସ୍ଵତ ସମାରୋହ

ବାସୁଦେବପୁର: ବାସୁଦେବପୁର ବ୍ଲକର ଏଡତାଳ ରେ ଥିବା ପାବନକ୍ଷେତ୍ର ଶ୍ରୀଜଗନ୍ନାଥମନ୍ଦିର ପ୍ରାଙ୍ଗଣରେ ପବିତ୍ର ରଥଯାତ୍ରା ଉପଲକ୍ଷେ ଏକ ଆଧ୍ୟାତ୍ମିକ ସାରସ୍ଵତ ସମାରୋହ ଅନୁଷ୍ଠିତ ହୋଇଯାଇଛି।ଶ୍ରୀ ଶ୍ରୀ ସିଦ୍ଧେଶ୍ୱର ସାହିତ୍ୟ ସଂସ୍କୃତି ପରିଷଦ କମାରଗାଆଁ ର କର୍ମକର୍ତ୍ତାମାନେ ଭକ୍ତଙ୍କ ସମାଗମକୁ ଲକ୍ଷ୍ୟ କରି ଏହି ଉତ୍ସବ ଆୟୋଜନ କରିଥିଲେ। ସାହିତ୍ୟିକ ସୁଦର୍ଶନ ଅଗସ୍ତିଙ୍କ ସଭାପତିତ୍ବରେ ଆଲୋଚକ ଭାବେ ପଣ୍ଡିତ ଦୟାନିଧି ଦାଶ, ଶିକ୍ଷାବିତ୍ ଭଗବାନ ମିଶ୍ର,ସନାତନ ପାଣିଗ୍ରାହୀ, ସୁଧାଂଶୁ ଶେଖର ମିଶ୍ର ଓ ଦିନବନ୍ଧୁ ପାଢ଼ୀ ପ୍ରମୁଖ ଯୋଗ ଦେଇ ଶ୍ରୀଗୁଣ୍ଡିଚାଜାତ ର ମହିମା ସହିତ ଆଧ୍ୟାତ୍ମିକ ଚିନ୍ତନ ଓ ଭକ୍ତି ମଣିଷକୁ ନମ୍ରତା ଓ ସଂସ୍କାର ଶିଖାଇଥାଏ ବୋଲି ମତବ୍ୟକ୍ତ କରିଥିଲେ।ଏହି ଅବସରରେ ମନ୍ଦିର ତଥା ସାହିତ୍ୟ ସଂସ୍କୃତି ପରିଷଦ ପକ୍ଷରୁ ସଂଗ୍ରାହକ ତଥା ବାଇଚଢେଇର ସମ୍ପାଦକ ବିକାଶ କୁମାର ଶତପଥୀଙ୍କୁ ସମ୍ବର୍ଦ୍ଧିତ କରାଯାଇଥିଲା।ପରେ ସଦାନନ୍ଦ ପାଣିଗ୍ରାହୀ ଓ ରତ୍ନାକର ପଣ୍ଡାଙ୍କ ସଂଯୋଜନାରେ ବହୁ କବି ସ୍ବରଚିତ କବିତା ପାଠ କରିଥିଲେ। ମନ୍ମଥ କୁମାର ଅଗସ୍ତି ଅତିଥି ପରିଚୟ ଓ ମଞ୍ଚ ଆମନ୍ତ୍ରଣ କରିଥିବା ବେଳେ ଶଶାଙ୍କ ଶେଖର ସାହୁ ସମସ୍ତଙ୍କୁ ଧନ୍ୟବାଦ୍ ଅର୍ପଣ କରିଥିଲେ। ଶେଷରେ ମହାପ୍ରଭୁଙ୍କୁ ଖିଚୁଡ଼ି ଅନ୍ନ ନୈବେଦ୍ୟ ଲାଗିବା ପରେ ଶଙ୍ଖ,ଘଣ୍ଟା,ହୁଳହୁଳି ରେ ବହୁ ଭକ୍ତଙ୍କ ଗହଣରେ ରଥଯାତ୍ରା ଶାନ୍ତିଶୃଙ୍ଖଳା ସହ ସମ୍ପନ୍ନ ହୋଇଥିଲା।