ଆଇଆଇଟି ଭୁବନେଶ୍ୱର ପକ୍ଷରୁ ଆନ୍ତର୍ଜାତୀୟ ମହିଳା ଦିବସ ପାଳିତ

ଭୁବନେଶ୍ୱର, ୧୯ ମାର୍ଚ୍ଚ୍ ୨୦୨୪: ଭାରତୀୟ ପ୍ରଯୁକ୍ତିବିଦ୍ୟା ପ୍ରତିଷ୍ଠାନ (ଆଇଆଇଟି) ଭୁବନେଶ୍ୱର ପକ୍ଷରୁ ଆନ୍ତର୍ଜାତୀୟ ମହିଳା ଦିବସ ପାଳିତ ହୋଇଛି ଏବଂ ଏହି ଉପଲକ୍ଷେ ୧୮ ମାର୍ଚ୍ଚ୍ ୨୦୨୪ ରେ ଏକ କାର୍ଯ୍ୟକ୍ରମର ଆୟୋଜନ କରିଥିଲା। ପ୍ରତିଷ୍ଠାନର ମହିଳା କଲ୍ୟାଣ ସମିତି ମହା ସମାରୋହରେ ଏହି କାର୍ଯ୍ୟକ୍ରମର ଆୟୋଜନ କରିଥିଲା। ଏମ୍ସ, ଭୁବନେଶ୍ୱରର ପ୍ରସୂତି ଏବଂ ସ୍ତ୍ରୀ ରୋଗ ବିଭାଗର ମୁଖ୍ୟ ପ୍ରଫେସର (ଡ଼.) ଶ୍ଵେତା ସିଂ ମୁଖ୍ୟ ଅତିଥି ଭାବରେ ଏହି ଉତ୍ସବରେ ଯୋଗ ଦେଇଥିଲେ।
ଏହି ଅବସରରେ ଉଦବୋଧନ ଦେଇ ଆଇଆଇଟି ଭୁବନେଶ୍ୱରର ନିର୍ଦ୍ଦେଶକ ପ୍ରଫେସର ଶ୍ରୀପାଦ୍ କରମଲକର, ବିଭିନ୍ନ ସର୍ଭେ ଅନୁଯାୟୀ ନିକଟ ଅତୀତରେ ବୈଷୟିକ ଶିକ୍ଷା କ୍ଷେତ୍ରରେ ମହିଳା ଛାତ୍ରଛାତ୍ରୀଙ୍କ ନାମ ବୃଦ୍ଧି ପାଉଛି ବୋଲି ଆଲୋକପାତ କରିଥିଲେ। ସେ କହିଛନ୍ତି ଯେ ପାରମ୍ପରିକ ବୃତ୍ତି ବ୍ୟତୀତ ବିଭିନ୍ନ ବୃତ୍ତିରେ ମହିଳାଙ୍କ ପ୍ରତିନିଧିତ୍ୱ ବୃଦ୍ଧି କରିବା ପାଇଁ ବିଭିନ୍ନ ନିଶ୍ଚିତ ପଦକ୍ଷେପ ଗ୍ରହଣ କରାଯାଉଛି। “ଏହି ପରିବର୍ତ୍ତନର ଅନ୍ୟତମ କାରଣ ହେଉଛି ବୈଷୟିକ ଓ ପ୍ରଯୁକ୍ତିବିଦ୍ୟାର ବିକାଶ ହେତୁ ସାମାଜିକ ତଥା ଅର୍ଥନୈତିକ ବ୍ୟବସ୍ଥାରେ ପରିବର୍ତ୍ତନ | ମହିଳା ସଶକ୍ତିକରଣରେ ବୈଷୟିକ ବିକାଶର ଭୂମିକାକୁ ଆମେ ସ୍ୱୀକାର କରିବା ଜରୁରୀ ବୋଲି ସେ କହିଛନ୍ତି। ମହିଳାଙ୍କ ପ୍ରତି ଥିବା ମନୋଭାବର ପରିବର୍ତ୍ତନ ଏବଂ ସେମାନଙ୍କର ବୃତ୍ତିଗତ ଅଭିବୃଦ୍ଧି ଉପରେ ସେ ଗୁରୁତ୍ୱାରୋପ କରିଥିଲେ।
ମୁଖ୍ୟ ଅତିଥି ପ୍ରଫେସର (ଡ଼.) ଶ୍ଵେତା ସିଂ ତାଙ୍କ ସମ୍ବୋଧନରେ ‘ଅନ୍ତର୍ଭୁକ୍ତିକରଣକୁ ପ୍ରୋତ୍ସାହନ: ମହିଳାଙ୍କ ସ୍ୱାସ୍ଥ୍ୟକୁ ସମର୍ଥନ’ ଉପରେ ବିସ୍ତୃତ ଭାବରେ ଉପସ୍ଥାପନ କରିଥିଲେ। ସେ ଗର୍ଭାଶୟ କର୍କଟ ଏବଂ ସ୍ତନ କର୍କଟ ଭଳି ସ୍ୱାସ୍ଥ୍ୟ ସମ୍ବନ୍ଧୀୟ ବିପଦ ବିଷୟରେ ମୂଲ୍ୟବାନ ସୂଚନା ପ୍ରଦାନ କରିଥିଲେ।ତାଙ୍କ ଉପସ୍ଥାପନାରେ ସେ ମହିଳାମାନଙ୍କୁ ଏହି ରୋଗରୁ ରକ୍ଷା କରିବା ପାଇଁ ବିପଦ ଏବଂ ପ୍ରତିଷେଧକ ବ୍ୟବସ୍ଥା ବିଷୟରେ ସୂଚନା ପ୍ରଦାନ କରିଥିଲେ। ଗର୍ଭାଶୟ କର୍କଟକୁ ରୋକିବା ପାଇଁ ଉପଲବ୍ଧ ବିଭିନ୍ନ ଟିକା ବିଷୟରେ ସେ ଦର୍ଶକଙ୍କୁ ଅବଗତ କରାଇଥିଲେ। ଗର୍ଭାବସ୍ଥାରେ ମହିଳାଙ୍କ ବିଶେଷ ଯତ୍ନ ବିଷୟରେ ସେ ମଧ୍ୟ କହିଥିଲେ।
ମହିଳା କଲ୍ୟାଣ ସମିତିର ଅଧ୍ୟକ୍ଷା ଡକ୍ଟର ମନସ୍ୱିନୀ ବେହେରା, ପ୍ରତିଷ୍ଠାନର ମହିଳା ସଦସ୍ୟମାନଙ୍କ କଲ୍ୟାଣକୁ ସୁନିଶ୍ଚିତ କରିବା ପାଇଁ ନିଆଯାଉଥିବା ବିଭିନ୍ନ କାର୍ଯ୍ୟକଳାପ ଉପରେ ଆଲୋକପାତ କରିଥିଲେ। ମହିଳା କଲ୍ୟାଣ ସମିତିର ସଦସ୍ୟ ସଚିବ ଡକ୍ଟର ପ୍ରାମା ଭଟ୍ଟାଚାର୍ଯ୍ୟ ଧନ୍ୟବାଦ ଅର୍ପଣ କରିଥିଲେ।
ଚଳିତ ମାସରେ ଅନୁଷ୍ଠିତ ବିଭିନ୍ନ ପ୍ରତିଯୋଗିତାର ବିଜେତାମାନଙ୍କୁ ଏହି ଅବସରରେ ପୁରସ୍କାର ପ୍ରଦାନ କରାଯାଇଥିଲା। ଅନୁଷ୍ଠାନର ଛାତ୍ରଛାତ୍ରୀ ଏବଂ ଅଧିବାସୀମାନେ ଦର୍ଶକଙ୍କୁ ଆକର୍ଷିତ କରିବା ପାଇଁ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶନ କରିଥିଲେ।