ମହେନ୍ଦ୍ରଗିରିରେ ୨୩ତମ ଜାତୀୟ ଏମ୍ ଟି ବି ଚାମ୍ପିଅନଶିପ୍ର ତୃତୀୟ ଦିନ
ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲାର ମହେନ୍ଦ୍ରଗିରି ପାହାଡ଼ସ୍ଥିତ କଇଁପୁର ଗ୍ରାମରେ ଚାଲିଥିବା ୨୩ତମ ଜାତୀୟ ଏମ୍ ଟି ବି ସାଇକ୍ଲିଂ ଚାମ୍ପିଅନଶିପ୍ର ତୃତୀୟ ଦିନ ସୁରକ୍ଷିତ ଓ ସଫଳତାର ସହ ସମ୍ପନ୍ନ ହୋଇଛି।
ତୃତୀୟ ଦିନର ମୁଖ୍ୟ ଆକର୍ଷଣ ଥିଲା ବିଭିନ୍ନ ବୟସ ବର୍ଗର ପୁରୁଷ ଓ ମହିଳା XCO (Cross-Country Olympic) ପ୍ରତିଯୋଗିତା। ଦେଶର ବିଭିନ୍ନ ରାଜ୍ୟରୁ ଆସିଥିବା ସାଇକ୍ଲିଷ୍ଟମାନେ ମହେନ୍ଦ୍ରଗିରିର କଠିନ ଓ ଚ୍ୟାଲେଞ୍ଜିଂ ଟ୍ରାକ୍ରେ ନିଜର ଗତି, ଦକ୍ଷତା ଓ ସହନଶୀଳତାର ପ୍ରଦର୍ଶନ କରିଥିଲେ।
ଆଜି ୭ଟି XCO ପ୍ରତିଯୋଗିତା ଅନୁଷ୍ଠିତ ହୋଇଥିଲା। ବିଭିନ୍ନ ପୁରୁଷ ଓ ମହିଳା ବୟସ ବର୍ଗରେ ରାଇଡରମାନେ ମୋଟ ୨୧ଟି ପଦକ ପାଇଁ ମହେନ୍ଦ୍ରଗିରିର କଠିନ ଭୂଭାଗରେ ଜୋରଦାର ପ୍ରତିଦ୍ୱନ୍ଦ୍ୱିତା କରିଥିଲେ।
ଦିନର ପ୍ରତିଯୋଗିତା ଶେଷରେ ଆୟୋଜିତ ପଦକ ବିତରଣ ସମାରୋହରେ ୨ୟ ବାଟାଲିୟନ୍ IRBର ସିନିୟର କମାଣ୍ଡାଣ୍ଟ ଶ୍ରୀ ବ୍ରଜମୋହନ ନାୟକ ଏବଂ ସାଇକ୍ଲିଂ ଫେଡେରେସନ୍ ଅଫ୍ ଇଣ୍ଡିଆର ଆଡମିନିଷ୍ଟ୍ରେଟିଭ୍ ଡାଇରେକ୍ଟର ଶ୍ରୀ ଭି.ଏନ୍. ସିଂହ ଯୋଗଦେଇ ବିଭିନ୍ନ ବର୍ଗର ବିଜେତା କ୍ରୀଡ଼ାବିତ୍ମାନଙ୍କୁ ପଦକ ପ୍ରଦାନ କରିଥିଲେ।
ତୃତୀୟ ଦିନର ପ୍ରତିଯୋଗିତା ସୁରକ୍ଷିତ ଓ ସୁଚାରୁ ଭାବେ ସମ୍ପନ୍ନ ହୋଇଥିବାରୁ ଓଡ଼ିଶା ସାଇକ୍ଲିଂ ଆସୋସିଏସନ୍ ପକ୍ଷରୁ ଏହି ଆୟୋଜନକୁ ସଫଳ କରିବାରେ ସହଯୋଗ କରିଥିବା ସମସ୍ତଙ୍କୁ ହୃଦୟରୁ କୃତଜ୍ଞତା ଜଣାଯାଇଛି।
ବିଶେଷକରି ସାଇକ୍ଲିଂ ଫେଡେରେସନ୍ ଅଫ୍ ଇଣ୍ଡିଆର ବୈଷୟିକ ଅଧିକାରୀ, ଓଡ଼ିଶା ସାଇକ୍ଲିଂ ଆସୋସିଏସନ୍ର ସଦସ୍ୟ ଓ ସ୍ୱେଚ୍ଛାସେବୀ, ଗଜପତି ଜିଲ୍ଲା ପୋଲିସ୍ ଟିମ୍, ଚିକିତ୍ସା ଦଳ, ଅଗ୍ନିଶମ ବାହିନୀ, ମାର୍ଶାଲ୍ମାନେ ଏବଂ ସ୍ଥାନୀୟ ପ୍ରଶାସନ ଦିନରାତି ନିଷ୍ଠାର ସହ କାର୍ଯ୍ୟ କରି ପ୍ରତିଯୋଗିତାକୁ ସୁରକ୍ଷିତ ଓ ସୁଚାରୁ ଭାବେ ପରିଚାଳନା କରିବାରେ ଗୁରୁତ୍ୱପୂର୍ଣ୍ଣ ସହଯୋଗ କରିଛନ୍ତି।
ତିନି ଦିନର ସଫଳ ଆୟୋଜନ ପରେ ଏବେ ମହେନ୍ଦ୍ରଗିରିରେ ଚାମ୍ପିଅନଶିପ୍ର ଅନ୍ତିମ ଦିନକୁ ନେଇ ଉତ୍ସାହ ବଢ଼ିଛି। ୨୩ତମ ଜାତୀୟ ଏମ୍ ଟି ବି ସାଇକ୍ଲିଂ ଚାମ୍ପିଅନଶିପ୍ର ଚତୁର୍ଥ ତଥା ଅନ୍ତିମ ଦିନ ପାଇଁ କଇଁପୁର ପ୍ରସ୍ତୁତ।