ପିଏମ୍ ସୂର୍ଯ୍ୟ ଘର ମୁଫ୍ତ ବିଜୁଳି ଯୋଜନା ନେଇ ଗଜପତିରେ ସୋଲାର ରଥର ଶୁଭାରମ୍ଭ
ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଭାରତ ସରକାରଙ୍କ ଏକ ପ୍ରମୁଖ ଯୋଜନା ‘ପିଏମ୍ ସୂର୍ଯ୍ୟ ଘର : ମୁଫ୍ତ ବିଜୁଳି ଯୋଜନା’ ଅନ୍ତର୍ଗତ ସୂଚନା, ଶିକ୍ଷା ଓ ଯୋଗାଯୋଗ ଅଭିଯାନର ଅଂଶ ଭାବେ ଗଜପତି ଜିଲ୍ଲାରେ ‘ସୋଲାର ରଥ’ ଶୁଭାରମ୍ଭ କରାଯାଇଛି। ଜିଲ୍ଲାପାଳ ଶ୍ରୀ ଅକ୍ଷୟ ସୁନୀଲ ଅଗ୍ରୱାଲ ମୁଖ୍ୟ ଅତିଥି ଭାବେ ଯୋଗଦେଇ ସୋଲାର ରଥକୁ ଶୁଭାରମ୍ଭ କରିଥିଲେ।
ଏହି ଅବସରରେ ଶ୍ରୀ ଅମିତ ଗର୍ଗ , ସିଇଓ ବ୍ରହ୍ମପୁର , ଶ୍ରୀ କୁଲକର୍ଣ୍ଣି ମିକନ , ସିଇଓ ବ୍ରହ୍ମପୁର , ଜୋନାଲ ମୁଖ୍ୟ ଜୟପୁର ଶ୍ରୀ ମନ୍ମଥ ମିଶ୍ର , ବରିଷ୍ଠ ମ୍ୟାନେଜର ଟିପିଏସ୍ଓଡିଏଲ୍ ଶ୍ରୀ ପି.କେ.ସାହୁ , ଅଧୀକ୍ଷଣ ଯନ୍ତ୍ରୀ ଟିପିଏସ୍ଓଡିଏଲ୍ ରାୟଗଡ଼ା , ଅଧୀକ୍ଷଣ ଯନ୍ତ୍ରୀ ଶ୍ରୀ ବିଜୟ କୁମାର ସାହୁ , ଶ୍ରୀ ଦୁରେଶ ରଞ୍ଜନ ପଣ୍ଡା , ଉପଖଣ୍ଡ ଅଧିକାରୀ ଟିପିଏସ୍ଓଡିଏଲ୍ ପାରଳାଖେମୁଣ୍ଡି , ଶ୍ରୀ କୁଳୀଚରଣ ବେହେରା ଏବଂ ଯନ୍ତ୍ରୀ ଟିପିଏସ୍ଓଡିଏଲ୍ ପାରଳାଖେମୁଣ୍ଡି ଶ୍ରୀ ରଜତ କୁମାର ବାରିକ ପ୍ରମୁଖ ଉପସ୍ଥିତ ଥିଲେ।
ଟିପିଏସଓଡିଏଲ ଦକ୍ଷିଣ ଓଡ଼ିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍ ପକ୍ଷରୁ ପରିଚାଳିତ ଏହି ସୋଲାର ରଥ ଗଜପତି ଜିଲ୍ଲାର ବିଭିନ୍ନ ଅଞ୍ଚଳ ପରିକ୍ରମା କରି ରୁଫ୍ଟପ୍ ସୋଲାର ସମ୍ପର୍କରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବ। ଏହା ମାଧ୍ୟମରେ ଘରର ଛାତ ଉପରେ ସୌର ଶକ୍ତି ପ୍ରଣାଳୀ ସ୍ଥାପନର ସୁବିଧା , ଉପକାରିତା ଓ ଆର୍ଥିକ ସହାୟତା ସମ୍ପର୍କରେ ସାଧାରଣ ଲୋକଙ୍କୁ ସରଳ ଭାବରେ ସୂଚନା ଦିଆଯାଇ ପାରିବ।
ଏହି ଭ୍ରାମ୍ୟମାଣ ସଚେତନତା କାର୍ଯ୍ୟକ୍ରମ ବିଭିନ୍ନ ଗ୍ରାମ , ଗ୍ରାମ ପଞ୍ଚାୟତ , ହାଟ, ବଜାର ଏବଂ ସାମୁଦାୟିକ ସମାବେଶ ସ୍ଥଳକୁ ଯାଇ ଗ୍ରାହକମାନଙ୍କ ସହ ସିଧାସଳଖ ଯୋଗାଯୋଗ କରିବ। ଏହି ଅଭିଯାନରେ ଯୋଜନାର ଲାଭ , ରୁଫ୍ଟପ୍ ସୋଲାର ସ୍ଥାପନର ଯୋଗ୍ୟତା , ଆବେଦନ ପ୍ରକ୍ରିୟା , ସବସିଡି ଓ ଆର୍ଥିକ ସହାୟତା ସମ୍ପର୍କରେ ସୂଚନା ଦିଆଯିବ। ଏଥିସହ ଘରୋଇ ବିଦ୍ୟୁତ୍ ବିଲ୍ ହ୍ରାସ କରିବାର ସମ୍ଭାବନା ବିଷୟରେ ମଧ୍ୟ ଲୋକଙ୍କୁ ସଚେତନ କରାଯିବ। ସୋଲାର ରଥ ଏକ ଭ୍ରାମ୍ୟମାଣ ଆଇ ଇ ସି ଓ ଗ୍ରାହକ ସମ୍ପର୍କ ମଞ୍ଚ ଭାବେ କାର୍ଯ୍ୟ କରିବ। ଏଥିରେ ବିଭିନ୍ନ ଆଇ ଇ ସି ସାମଗ୍ରୀ , ଅଡିଓ-ଭିଜୁଆଲ୍ ବିଷୟବସ୍ତୁ ଏବଂ ସମ୍ପ୍ରଦାୟ ସହିତ ସିଧାସଳଖ ଆଲୋଚନା ମାଧ୍ୟମରେ ରୁଫ୍ଟପ୍ ସୋଲାର ସମ୍ପର୍କିତ ସୂଚନାକୁ ସରଳ ଓ ସୁଲଭ ଭାବରେ ଲୋକଙ୍କ ନିକଟରେ ପହଞ୍ଚାଯିବ।
ଗଜପତି ଜିଲ୍ଲାର ପାହାଡ଼ିଆ ଭୂ-ପ୍ରକୃତି, ବିଛିନ୍ନ ଜନବସତି ଏବଂ ଗ୍ରାମୀଣ ଅଞ୍ଚଳର ଭୌଗୋଳିକ ପରିସ୍ଥିତିକୁ ଦୃଷ୍ଟିରେ ରଖି ଏହି ଭ୍ରାମ୍ୟମାଣ ସଚେତନତା ଅଭିଯାନର ବିଶେଷ ଗୁରୁତ୍ୱ ରହିଛି। ସମ୍ପ୍ରଦାୟ ନିକଟକୁ ସିଧାସଳଖ ଏହି ଅଭିଯାନ ପହଞ୍ଚିବା ଦ୍ୱାରା ଯୋଜନା ସମ୍ପର୍କିତ ସୂଚନାର ବ୍ୟବଧାନ ଦୂର ହେବା ସହ ଦୁର୍ଗମ ଓ କମ୍ ସୁବିଧା ଥିବା ଅଞ୍ଚଳର ଗ୍ରାହକମାନେ ମଧ୍ୟ ଏହାର ସୁବିଧା ସମ୍ପର୍କରେ ଜାଣିପାରିବେ।
ଏହି ସୋଲାର ରଥ ଟିପିଏସଓଡିଏଲ ର ଆଠଟି ଜିଲ୍ଲାବ୍ୟାପୀ କାର୍ଯ୍ୟକ୍ଷେତ୍ରରେ ରୁଫ୍ଟପ୍ ସୋଲାର ସମ୍ପର୍କିତ ସଚେତନତା ବୃଦ୍ଧି, ଗ୍ରାହକଙ୍କ ସହ ସିଧାସଳଖ ସମ୍ପର୍କ ସ୍ଥାପନ ଏବଂ ଯୋଜନାର ଲାଭ ଲୋକଙ୍କ ନିକଟରେ ପହଞ୍ଚାଇବାରେ ସହାୟକ ହେବ। ଏହି ଅଭିଯାନ ମାଧ୍ୟମରେ ଅଧିକରୁ ଅଧିକ ପରିବାର ରୁଫ୍ଟପ୍ ସୋଲାର ବିଷୟରେ ଜାଣିବା ସହ ଯୋଜନାର ସୁଯୋଗ ନେଇ ସ୍ୱଚ୍ଛ ଓ ନବୀକରଣଯୋଗ୍ୟ ଶକ୍ତିର ବ୍ୟବହାରକୁ ଆପଣାଇବା ପାଇଁ ସଚେତନ ହେବେ।