ମାଲକାନଗିରି ଠାରେ ଜିଲ୍ଳା କଂଗ୍ରେସର ବିକ୍ଷୋଭ ।
ଭୋଟର ତାଲିକା ହେରଫେର ଅଭିଯୋଗ ନେଇ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ଦାବିପତ୍ର ।
ମାଲକାନଗିରି, (ସୁରେନ୍ଦ୍ର କୁମାର ବେମାଳ )ତା ୨୮/୦୯: ନିର୍ବାଚନ କମିଶନଙ୍କ ସ୍ପେଶାଲ ଇଣ୍ଟେନସିଭ୍ ରିଭିଜନ୍ (SIR) ପ୍ରକ୍ରିୟା ଏବଂ ଭୋଟର ତାଲିକାରେ ବ୍ୟାପକ ଅନିୟମିତତାକୁ ନେଇ ସାରା ଦେଶରେ ରାଜନୀତି ଉତ୍ତପ୍ତ ହେବାରେ ଲାଗିଛି। ଏହି କ୍ରମରେ ମାଲକାନଗିରି ଜିଲ୍ଲା କଂଗ୍ରେସ କମିଟି ତରଫରୁ ଏକ ବିଶାଳ ପ୍ରତିବାଦ ଶୋଭାଯାତ୍ରା ସହ ଜିଲ୍ଲାପାଳଙ୍କ ଜରିଆରେ ଭାରତର ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଛି।
ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ରଣହୁଙ୍କାର ଦେଇ
ଜିଲ୍ଲା କଂଗ୍ରେସ ସଭାପତି ଜି. ଶ୍ରୀନିବାସ ରାଓଙ୍କ ନେତୃତ୍ୱରେ ଆଜି ମାଲକାନଗିରି କଂଗ୍ରେସ ଭବନରୁ ଏକ ବିରାଟ ରାଲି ବାହାରିଥିଲା। ଏହି ଶୋଭାଯାତ୍ରା ସହରର କଂଗ୍ରେସ୍ ଭବନ ଠାରୁ ବାହାରି ଡି.ଏନ.କେ ଛକ ଦେଇ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିବା ପରେ ସେଠାରେ ନେତା ଓ କର୍ମୀମାନେ ନିର୍ବାଚନ କମିଶନ ଏବଂ ସରକାରଙ୍କ ବିରୋଧରେ ଜୋରଦାର ସ୍ଲୋଗାନବାଜି କରିଥିଲେ।
ନିର୍ବାଚନ କମିଶନ (ECI) ଙ୍କୁ
କଂଗ୍ରେସ ନେତୃବୃନ୍ଦଙ୍କ ପକ୍ଷରୁ କଠୋର ସମାଲୋଚନା ଓ ଅଭିଯୋଗ କରିଛନ୍ତି ଯେ, କଂଗ୍ରେସ ନେତା ରାହୁଲ ଗାନ୍ଧୀ ଭୋଟର ତାଲିକାକୁ ନେଇ ଯେଉଁ ବ୍ୟବସ୍ଥାଗତ ତ୍ରୁଟିର ଅଭିଯୋଗ ଉଠାଇଥିଲେ, ତାହା ଆଜି ସତ୍ୟ ପ୍ରମାଣିତ ହୋଇଛି। ଦେଶରେ ଆନୁମାନିକ ୧୩ କୋଟି ଭୋଟରଙ୍କ ନାମ ବାଦ୍ ଦିଆଯିବା ଏକ ବଡ଼ ଧରଣର ଚକ୍ରାନ୍ତ।
ଫର୍ମ-୭ ରେ ବେଆଇନ ପରିବର୍ତ୍ତନ, ECINet ସଫ୍ଟୱେର୍ରେ ଡାଟା ହେରଫେର ଏବଂ ବିଏଲଓ ଙ୍କ ଉପରେ ଜୋରଜବରଦସ୍ତ ନାମ ହଟାଇବା ପାଇଁ ଚାପ ପକାଯାଉଥିବା ନେଇ ଦଳ ଗୁରୁତର ଅଭିଯୋଗ ଆଣିଛି।
ସମ୍ବିଧାନର ଦୁଇଜଣ ସଦସ୍ୟ ପ୍ରୋଟୋକୋଲ୍ ଉଲ୍ଲଂଘନ ନେଇ ଆପତ୍ତି ଉଠାଇଥିବା ସତ୍ତ୍ୱେ ଏବଂ ବୈଷୟିକ କମିଟିର ତଦାରଖକୁ ଏଡ଼ାଇ ଦେଇ ଏହି ନିଷ୍ପତ୍ତିକୁ ଲାଗୁ କରାଯାଇଛି।
ନିର୍ବାଚନ କମିଶନଙ୍କ ଦ୍ୱାରା ଜାରି କରାଯାଇଥିବା ସ୍ପଷ୍ଟୀକରଣକୁ ଦଳ ଅତ୍ୟନ୍ତ ନିରାଶାଜନକ, ଦୁର୍ବଳ ଏବଂ ପକ୍ଷପାତମୂଳକ ବୋଲି ଅଭିହିତ କରିଛି।
ଅନ୍ ଆଇନ ପ୍ରକ୍ରିୟାରେ ଜାଲିଆତି ଚାଲିଥିବା ନେଇ ଦଳୀୟ କର୍ମୀମାନେ ଅସନ୍ତୋଷ ପ୍ରକାଶ କରିଛନ୍ତି। ଯଦି ଏହି ମାମଲାରେ ତୁରନ୍ତ ସ୍ୱଚ୍ଛତା ଓ ସଠିକ୍ ସମାଧାନ ନହୁଏ, ତେବେ ଆଗାମୀ ଦିନରେ ଏହି ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି କଂଗ୍ରେସ ଦୃଢ଼ ଚେତାବନୀ ଦେଇଛି।
ଏହି ବିକ୍ଷୋଭ ପ୍ରଦର୍ଶନରେ ଜିଲ୍ଲାର ବରିଷ୍ଠ ନେତା ଗୋବିନ୍ଦ ପାତ୍ର, ମାଲା ମାଢ଼ି, ପର୍ଶୁରାମ ଭକ୍ତ , ସରୋଜ ପାତ୍ର, ପ୍ରଭାକର ପାଳ, ପଦ୍ମ ପାଙ୍ଗି , ଇର୍ମ ପଡ଼ିଆମୀ, ଛବୀ ଦାଶ, ପି.କେଶୁ ରାଓ, ପ୍ରାଣ କୃଷ୍ଣ ମଣ୍ଡଲ, କୃଷ୍ଣ ଚନ୍ଦ୍ର ଅନୁଗୁ , ରହିମ ଖାନ୍ ଙ୍କ ସମେତ ଜିଲ୍ଳାର ସମସ୍ତ ବ୍ଳକ୍ ର ସଭାପତି ବିପୁଳ ସଂଖ୍ୟାରେ କଂଗ୍ରେସ କାର୍ଯ୍ୟକର୍ତ୍ତା ଯୋଗଦେଇ ଗଣତନ୍ତ୍ରର ସୁରକ୍ଷା ପାଇଁ ଦାବି ଜଣାଇଥିଲେ।