ଭଞ୍ଜନଗର ରୁ (ଉଦୟନାଥ ପଣ୍ଡା) ଶାସକ ପ୍ରଶାସକ: ବିଶ୍ବ ପରିବେଶ ଦିବସ ପାଳନ ଅବସରରେ ଭଞ୍ଜନଗର ପୌରପରିଷଦ ଆନୁକୂଲ୍ୟରେ ବୃକ୍ଷ ରୁପକ ଚାରା ରୋପଣ କାର୍ଯ୍ୟକ୍ରମ କରାଯାଇଅଛି ।
ବିଶ୍ୱ ପରିବେଶ ଦିବସ ହେଉଛି ପ୍ରକୃତି ଏବଂ ପୃଥିବୀର ସୁରକ୍ଷା ପାଇଁ ମିଳିତ ଜାତିସଂଘ ଦ୍ୱାରା ପ୍ରତିଷ୍ଠିତ ଏକ ବିଶେଷ ଦିବସ। ପ୍ରତିବର୍ଷ ଜୁନ୍ ୫ ତାରିଖରେ ସାରା ବିଶ୍ୱରେ ବିଶ୍ୱ ପରିବେଶ ଦିବସ ପାଳନ କରାଯାଏ।
୧୯୭୨ ମସିହାରେ ମିଳିତ ଜାତିସଂଘ (UN) ଦ୍ୱାରା ମାନବ ପରିବେଶକୁ ନେଇ ଷ୍ଟକହୋମ୍ରେ ଏକ ସମ୍ମିଳନୀ ଅନୁଷ୍ଠିତ ହୋଇଥିଲା। ଏହି ସମ୍ମିଳନୀର ପ୍ରଥମ ଦିନ ଅର୍ଥାତ୍ ଜୁନ୍ ୫ କୁ ମନେ ରଖିବା ପାଇଁ ଏହି ଦିବସ ଘୋଷଣା କରାଯାଇଥିଲା। ୧୯୭୩ ମସିହା ଜୁନ୍ ୫ ରେ ପ୍ରଥମ କରି ଏହି ଦିବସ ପାଳନ କରାଯାଇଥିଲା, ଯାହାର ସ୍ଲୋଗାନ ଥିଲା “Only One Earth” (କେବଳ ଗୋଟିଏ ପୃଥିବୀ)। ପୃଥିବୀରେ ବଢ଼ୁଥିବା ପ୍ରଦୂଷଣ, ଗ୍ଲୋବାଲ୍ ୱାର୍ମିଂ (ବିଶ୍ୱ ଉଷ୍ମତା), ଜଙ୍ଗଲ କ୍ଷୟ ଏବଂ ପ୍ଲାଷ୍ଟିକ୍ ବର୍ଜ୍ୟବସ୍ତୁ ଭଳି ଗମ୍ଭୀର ସମସ୍ୟା ପ୍ରତି ଲୋକଙ୍କ ଦୃଷ୍ଟି ଆକର୍ଷଣ କରିବା ଏବଂ ଏହାର ସମାଧାନ ପାଇଁ ସମସ୍ତଙ୍କୁ ଏକଜୁଟ୍ କରିବା ଏହି ଦିବସର ମୂଳ ଲକ୍ଷ୍ୟ। ଆମେ ପରିବେଶ ଦିବସ କେବଳ ଏକ ପରମ୍ପରା ଭାବେ ନୁହେଁ, ବରଂ ଆମର ନିଜର ଅସ୍ତିତ୍ୱ ରକ୍ଷା ପାଇଁ ପାଳନ କରିବା ଉଚିତ।
ଆମର କେଉଁ ଭୁଲ୍ କାମ ପାଇଁ ପ୍ରକୃତିର କ୍ଷତି ହେଉଛି (ଯେପରିକି ଅତ୍ୟଧିକ ପ୍ଲାଷ୍ଟିକ୍ ବ୍ୟବହାର କିମ୍ବା ଗଛ କାଟିବା), ସେ ବିଷୟରେ ନିଜେ ଜାଣିବା ଏବଂ ଅନ୍ୟମାନଙ୍କୁ ସଚେତନ କରାଇବା। ଯଦି ଆମେ ଆଜି ପରିବେଶକୁ ସୁରକ୍ଷିତ ନ ରଖିବା, ତେବେ ଆମର ପିଲାମାନେ ଭବିଷ୍ୟତରେ ଶୁଦ୍ଧ ବାୟୁ, ପିଇବା ପାଣି ଏବଂ ସୁନ୍ଦର ପ୍ରକୃତି ପାଇବାରୁ ବଞ୍ଚିତ ହେବେ। ପୃଥିବୀ କେବଳ ମଣିଷର ନୁହେଁ। ଏଠାରେ ରହୁଥିବା ଅସଂଖ୍ୟ ପଶୁପକ୍ଷୀ ଓ ଗଛଲତାଙ୍କୁ ବଞ୍ଚାଇବା ପାଇଁ ପରିବେଶର ସନ୍ତୁଳନ ରକ୍ଷା କରିବା ଜରୁରୀ। ସେଥିପାଇଁ ଏହି ଦିନ ଆମେ କେବଳ ଭାଷଣ ନଦେଇ ନିଜ ହାତରେ ଅନ୍ତତଃ ଗୋଟିଏ ଗଛ ଲଗାଇବା, ଜଳ ଅପଚୟ ରୋକିବା ଏବଂ ପରିବେଶକୁ ସଫା ରଖିବା ପାଇଁ ସଂକଳ୍ପ ନେବା ଉଚିତ। ପରିବେଶ ସୁରକ୍ଷିତ ରହିଲେ ହିଁ ମାନବ ସମାଜ ସୁରକ୍ଷିତ ରହିବ। “ସବୁଜ ପୃଥିବୀ, ସୁସ୍ଥ ଜୀବନ” – ଏହି ବାର୍ତ୍ତାକୁ ସାରା ବିଶ୍ୱରେ ପହଞ୍ଚାଇବା ପାଇଁ ସରକାରଙ୍କ ତରଫରୁ ପ୍ରତ୍ୟେକ ସ୍ଥାନରେ ପରିବେଶ ଦିବସ ପାଳନ କରାଯାଇଥାଏ।
ସେହିପରି ଭାବରେ ସରକାରଙ୍କ ନିର୍ଦ୍ଦେଶକ୍ରମେ ପୌରପରିଷଦ ଭଞ୍ଜନଗର ତରଫରୁ ମୋଟ ୨୦୦୦ ବୃକ୍ଷ ରୁପକ ଚାରା ରୋପଣ କରାଯିବା ପାଇଁ ଲକ୍ଷ ରଖାଯାଇଥିବା ବେଳେ ଆଜି ବେଲଗୁଣ୍ଠା ରୋଡ଼ସ୍ଥିତ ଜାମପଲ୍ଲି ଗ୍ରାମ ଛକ ନିକଟବର୍ତ୍ତୀ ନିର୍ମାଣାଧୀନ ଗୋ-ଶାଳା ପରିସରରେ ଚାରା ରୋପଣ କାର୍ଯ୍ୟକ୍ରମର ଶୁଭାରମ୍ଭ କରାଯାଇଅଛି । ଉକ୍ତ କାର୍ଯ୍ୟକ୍ରମରେ ପୌରପରିଷଦର ଉପାଧ୍ଯକ୍ଷା ଶୁଭଶ୍ରୀ ଦାସ, ଅତିରିକ୍ତ ଆରକ୍ଷୀ ଅଧିକ୍ଷକ ରଞ୍ଜନ କୁମାର ଦେ, କାର୍ଯ୍ୟନିର୍ବାହୀ ଅଧୁକାରୀ ମୁରଲୀକୃଷ୍ଣ ପଣ୍ଡା, କନିଷ୍ଠ ଯନ୍ତ୍ରୀ ଦିଲ୍ଲୀପ କୁମାର ମିଶ୍ର, ମଙ୍ଗୁଳୁ ମୁନି, କନିଷ୍ଠ ପରିମଳ ବିଶେଷଜ୍ଞ ଅମ୍ରିତା ନାୟକ, ଅଶୋକ କୁମାର ପ୍ରଧାନ, ରାଜସ୍ବ ନିରୀକ୍ଷକ କେଦାରନାଥ ଗନ୍ତାୟତ, ବରିଷ୍ଠ କିରାଣୀ ମନୋଜ ପାଢ଼ୀ ଙ୍କ ସମେତ ସମସ୍ତ ପୌରପରିଷଦ କର୍ମଚାରୀ, ଚାନ୍ଦିନୀ ଗୈ।ଡ଼ ( ସ୍ଵଚ୍ଛ ସାଥି ),ସନ୍ତୋସିନି ବେହେରା (ଟିଆରପି), ଅଭିଷେକ ପଣ୍ଡା (ସୁପରଭାଇଜର୍), ମନୋଜ କୁମାର ପାଢ଼ୀ (ଏସ ଆର ଏ) ସହିତ ବିପଦର ବନ୍ଧୁ ସଂଗଠନ, ସ୍ବଚ୍ଛକର୍ମୀ, ସଫେଇ କର୍ମୀ ଏବଂ ଉପେନ୍ଦ୍ର ଭଞ୍ଜ ଉଚ୍ଚବିଦ୍ୟାଳୟର ଜାତୀୟ ସମରଶିକ୍ଷାର୍ଥୀ ବାହିନୀ ଙ୍କ ସମେତ ବହୁ ଶିକ୍ଷକ ଶିକ୍ଷୟିତ୍ରୀ ଜନସାଧାରଣ ଯୋଗଦେଇଥିଲେ । ଆସନ୍ତା ଦିନ ମାନଙ୍କରେ ପୌର ପରିଷଦ ତରଫରୁ ବିଭିନ୍ନ ସ୍ଥାନରେ ବୃକ୍ଷରୋପଣ କାର୍ଯ୍ୟକ୍ରମ ଜାରି ରହିବ ବୋଲି ନିର୍ବାହୀ ଅଧୁକାରୀ ଶ୍ରୀ ପଣ୍ଡା ପ୍ରକାଶ କରିଛନ୍ତି ।