ଝାରସୁଗୁଡ଼ା : ପେନ୍ଚକ ସିଲାଟ୍ ଆସୋସିଏସନ୍ ଅଫ୍ ଓଡ଼ିଶା (PSAO) ପକ୍ଷରୁ ଝାରସୁଗୁଡ଼ା ଜିଲ୍ଲାର ସରବହଳସ୍ଥିତ ମୁଖ୍ୟ କାର୍ଯ୍ୟାଳୟରେ ଦୁଇ ଦିନିଆ ଓଡ଼ିଶା ରାଜ୍ୟ ପେନ୍ଚକ ସିଲାଟ୍ ରେଫେରି, ଜୁରି ଓ କୋଚ୍ ସେମିନାର ସଫଳତାର ସହ ଅନୁଷ୍ଠିତ ହୋଇଯାଇଛି। ଏହି ସେମିନାରରେ ରାଜ୍ୟର ୧୭ଟି ଜିଲ୍ଲାରୁ ପ୍ରାୟ ୧୦୦ ଜଣ ରେଫେରି, ଜୁରି ଓ କୋଚ୍ ଅଂଶଗ୍ରହଣ କରିଥିଲେ।
ସେମିନାରର ମୁଖ୍ୟ ଉଦ୍ଦେଶ୍ୟ ଥିଲା ପେନ୍ଚକ ସିଲାଟ୍ ଖେଳର ନୂତନ ନିୟମାବଳୀ ଓ ବିଧିବିଧାନ ସମ୍ପର୍କରେ ରେଫେରି, ଜୁରି ଏବଂ କୋଚ୍ମାନଙ୍କୁ ବିସ୍ତୃତ ପ୍ରଶିକ୍ଷଣ ପ୍ରଦାନ କରିବା। ଏହା ମାଧ୍ୟମରେ ରାଜ୍ୟର ପ୍ରାୟୋଗିକ ଅଧିକାରୀମାନଙ୍କୁ ଜାତୀୟ ଓ ଆନ୍ତର୍ଜାତୀୟ ସ୍ତରର ସର୍ବାଧୁନିକ ନିୟମାବଳୀ ସହ ପରିଚିତ କରାଯାଇଥିଲା।
ଏହି କାର୍ଯ୍ୟକ୍ରମରେ ବରିଷ୍ଠ ସାମ୍ବାଦିକ ମେହବୁବ ମେହତାବ ଏବଂ ଓଡ଼ିଶା ଅଲିମ୍ପିକ ଆସୋସିଏସନ୍ର କାଉନ୍ସିଲ ସଦସ୍ୟ ବି.ଜେ. ବେହେରା ଅତିଥି ଭାବେ ଉପସ୍ଥିତ ଥିଲେ।
କାର୍ଯ୍ୟକ୍ରମରେ ପେନ୍ଚକ ସିଲାଟ୍ ଆସୋସିଏସନ୍ ଅଫ୍ ଓଡ଼ିଶାର ସଭାପତି ତାପସ କୁମାର ରାୟ ଚୌଧୁରୀ, ସାଧାରଣ ସମ୍ପାଦକ ତଥା ଆନ୍ତର୍ଜାତୀୟ ରେଫେରି ଗୁରୁ ପ୍ରେମ ସିଂହ ଥାପା ଏବଂ ଜାତୀୟ ରେଫେରି ଆଶୁତୋଷ ନାୟକ ଉପସ୍ଥିତ ରହି ସେମିନାରର ସଫଳ ଆୟୋଜନରେ ସହଯୋଗ କରିଥିଲେ।
ସେମିନାରର ମୁଖ୍ୟ ପ୍ରଶିକ୍ଷକ ଭାବେ ଆନ୍ତର୍ଜାତୀୟ ରେଫେରି ଗୁରୁ ପ୍ରେମ ସିଂହ ଥାପା ଏବଂ ଜାତୀୟ ରେଫେରି ଆଶୁତୋଷ ନାୟକ ନୂତନ ନିୟମାବଳୀ, ରେଫେରିଂ ପ୍ରଣାଳୀ, ଜୁରି ମୂଲ୍ୟାୟନ ପଦ୍ଧତି ଓ ପ୍ରତିଯୋଗିତା ପରିଚାଳନା ସମ୍ପର୍କରେ ବିସ୍ତୃତ ତାଲିମ ପ୍ରଦାନ କରିଥିଲେ।
ଅଂଶଗ୍ରହଣକାରୀମାନେ ଏହି ପ୍ରଶିକ୍ଷଣକୁ ଅତ୍ୟନ୍ତ ଉପଯୋଗୀ ଓ ଜ୍ଞାନବର୍ଦ୍ଧକ ବୋଲି ମତ ପ୍ରକାଶ କରିଥିଲେ। ବକ୍ତାମାନେ ଓଡ଼ିଶାରେ ପେନ୍ଚକ ସିଲାଟ୍ ଖେଳର ବିକାଶ, ଖେଳାଳିମାନଙ୍କ ଦକ୍ଷତା ବୃଦ୍ଧି ଏବଂ ଆଗାମୀ ରାଜ୍ୟ ଓ ଜାତୀୟ ପ୍ରତିଯୋଗିତାର ସଫଳ ଆୟୋଜନ ନେଇ ଆଲୋଚନା କରିଥିଲେ।
ଶେଷରେ ପେନ୍ଚକ ସିଲାଟ୍ ଆସୋସିଏସନ୍ ଅଫ୍ ଓଡ଼ିଶା ପକ୍ଷରୁ ସମସ୍ତ ଅତିଥି, ପ୍ରଶିକ୍ଷକ ଓ ଅଂଶଗ୍ରହଣକାରୀଙ୍କୁ କୃତଜ୍ଞତା ଜଣାଯାଇଥିଲା। ଏହି ସେମିନାର ଓଡ଼ିଶାରେ ପେନ୍ଚକ ସିଲାଟ୍ ଖେଳର ବିକାଶ ଓ ବୈଷୟିକ ମାନଦଣ୍ଡକୁ ଆହୁରି ସୁଦୃଢ଼ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ମତ ପ୍ରକାଶ ପାଇଛି।