ରାଜ୍ୟ ସଙ୍ଗୀତ ବନ୍ଦେ ଉତ୍କଳ ଜନନୀ ଗାନ ସମୟରେ ସମ୍ବଲପୁର ବିଧାୟକ ଜୟନାରାୟଣ ମିଶ୍ର ବସି ରହିଥିବା ଘଟଣାକୁ ନେଇ ରାଜ୍ୟରେ ତୀବ୍ର ଚର୍ଚ୍ଚା ଆରମ୍ଭ ହୋଇଛି। ଆଜି ସମ୍ବଲପୁର ପାନ୍ଥନିବାସରେ ଆୟୋଜିତ ସରକାରୀ ପଖାଳ ଦିବସ ପାଳନ ଅବସରରେ ଏହି ଦୃଶ୍ୟ ଦେଖିବାକୁ ମିଳିଛି।
କାର୍ଯ୍ୟକ୍ରମରେ ଭର୍ଚ୍ଚୁଆଲ୍ ମାଧ୍ୟମରେ ମୁଖ୍ୟମନ୍ତ୍ରୀ ସହିତ ଉତ୍ତରାଞ୍ଚଳ ଆରଡିସି, ଜିଲ୍ଲାପାଳ ଓ ପୋଲିସ କମିଶନର ଭଳି ବରିଷ୍ଠ ଅଧିକାରୀମାନେ ଯୋଗଦେଇଥିଲେ। ସମସ୍ତେ ସମ୍ମାନ ଜଣାଇ ଠିଆ ହୋଇଥିବା ବେଳେ, ଜୟନାରାୟଣ ମିଶ୍ର ଓ ତାଙ୍କ ସମର୍ଥକମାନେ ବସି ରହିଥିବା ଦେଖାଯାଇଛି।
ପୁରୁଣା ମତର ପୁନରାବୃତ୍ତି
ଜୟନାରାୟଣ ମିଶ୍ର ପୂର୍ବରୁ ମଧ୍ୟ ଏହି ବିଷୟରେ ମତ ପ୍ରକାଶ କରିଥିଲେ। ତାଙ୍କ ମତରେ, ଓଡ଼ିଶା କେବଳ ‘ଉତ୍କଳ’ ନୁହେଁ, ବରଂ କୋଶଳ, କଳିଙ୍ଗ ଓ ଉତ୍କଳର ସମାହାର। କେବଳ ‘ଉତ୍କଳ’ ଉପରେ ଆଧାରିତ ଜୟଗାନକୁ ସେ ବିରୋଧ କରି ଆସୁଛନ୍ତି।
ଅସ୍ମିତା ନା ଅସମ୍ମାନ?
କେହି ଏହାକୁ ଆଞ୍ଚଳିକ ସ୍ୱାଭିମାନର ପ୍ରକାଶ ବୋଲି କହୁଛନ୍ତି | ଅନ୍ୟମାନେ ଏହାକୁ ରାଜ୍ୟ ସଙ୍ଗୀତ ପ୍ରତି ଅସମ୍ମାନ ବୋଲି ଆଖ୍ୟା ଦେଉଛନ୍ତି ସରକାରୀ ନିୟମ ଅନୁଯାୟୀ, ରାଜ୍ୟ ସଙ୍ଗୀତ ଗାନ ସମୟରେ ଠିଆ ହେବା ଆବଶ୍ୟକ ଥିବା ବେଳେ, ଏହି ଘଟଣା ଆଗାମୀ ଦିନରେ ରାଜନୈତିକ ତର୍କକୁ ଆଉ ବଢ଼ାଇପାରେ ବୋଲି ମନେ କରାଯାଉଛି।