ବାପାଙ୍କ ସ୍ମୃତିକୁ ସମର୍ପିତ ‘ରବି ସମର୍ପଣ’
ସ୍ୱର୍ଗତ ରବି ପୁରୋହିତଙ୍କ ସେବା ଓ ସଂସ୍କାରର ପଥରେ ପୁଅ ଅର୍ପିତ
ବଲାଙ୍ଗୀର: ବାପା ଆଜି ଆଉ ଏ ଦୁନିଆରେ ନାହାନ୍ତି, ହେଲେ ତାଙ୍କ ସ୍ମୃତି, ସଂସ୍କାର ଓ ମାନବସେବାର ଆଦର୍ଶ ଆଜି ବି ପୁଅର ହୃଦୟରେ ଜୀବନ୍ତ। ବାପାଙ୍କ ସ୍ନେହମୟ ଛାୟା ହରାଇବାର ଦୁଃଖକୁ ହୃଦୟରେ ଚାପି ରଖି, ତାଙ୍କ ଦେଖାଇଥିବା ସେବାର ପଥକୁ ନିଜ ଜୀବନର ଲକ୍ଷ୍ୟ କରିଛନ୍ତି ଅର୍ପିତ କୁମାର ପୁରୋହିତ। ବାପାଙ୍କ ପ୍ରତି ସତ୍ୟ ଶ୍ରଦ୍ଧାଞ୍ଜଳି ଜଣାଇବାର ଏହି ନିଆରା ପ୍ରୟାସ ଆଜି ବଲାଙ୍ଗୀରରେ ଚର୍ଚ୍ଚାର ବିଷୟ ପାଲଟିଛି।
ବଲାଙ୍ଗୀର ସହରର ଜଣାଶୁଣା ଆଇନଜୀବୀ ସ୍ୱର୍ଗତ ରବି ପୁରୋହିତ କେବଳ ଜଣେ ଦକ୍ଷ ଆଇନଜୀବୀ ନଥିଲେ, ସେ ଥିଲେ ଅସହାୟ ଓ ନିରାଶ୍ରୟ ଲୋକଙ୍କ ପାଇଁ ଏକ ଭରସାର ନାମ। ବ୍ୟସ୍ତ ଜୀବନ ମଧ୍ୟରୁ ସମୟ ବାହାର କରି ମାନବସେବାକୁ ଜୀବନର ମହତ୍ତ୍ୱପୂର୍ଣ୍ଣ ଆଦର୍ଶ ଭାବେ ଗ୍ରହଣ କରିଥିଲେ ସେ। ‘ମାନବ ସେବା ହିଁ ମାଧବ ସେବା’ ନୀତିରେ ବିଶ୍ୱାସ ରଖି ସେ ସବୁବେଳେ ଅସହାୟ ଲୋକଙ୍କ ପାଖରେ ଠିଆ ହେଉଥିଲେ। ତାଙ୍କର ସରଳ ହୃଦୟ, ପରୋପକାରୀ ମନୋଭାବ ଓ ସମସ୍ତଙ୍କ ପ୍ରତି ଆତ୍ମୀୟତା ତାଙ୍କୁ ସବୁ ବର୍ଗର ଲୋକଙ୍କ ନିକଟରେ ପ୍ରିୟ କରିପାରିଥିଲା।
ସମୟର ନିଷ୍ଠୁର ନିୟତି ତାଙ୍କୁ ପରିବାରଠାରୁ ଛଡ଼ାଇ ନେଇଥିଲେ ମଧ୍ୟ, ତାଙ୍କ ଦେଇଯାଇଥିବା ମାନବିକତାର ଶିକ୍ଷା ଆଜି ପୁଅ ଅର୍ପିତଙ୍କ ପାଇଁ ପଥପ୍ରଦର୍ଶକ ସାଜିଛି। ବାପାଙ୍କ ନାମ ଓ ସ୍ମୃତିକୁ ଅମର କରି ରଖିବା ଉଦ୍ଦେଶ୍ୟରେ ଅର୍ପିତ ଆରମ୍ଭ କରିଛନ୍ତି ‘ରବି ସମର୍ପଣ’ ନାମକ ଏକ ସେବାମୂଳକ ପ୍ରୟାସ। ଏହା କେବଳ ଏକ କାର୍ଯ୍ୟକ୍ରମ ନୁହେଁ, ବରଂ ବାପାଙ୍କ ଅଧୁରା ସ୍ୱପ୍ନ, ସଂସ୍କାର ଓ ସେବାର ଆଦର୍ଶକୁ ଆଗକୁ ବଢ଼ାଇବାର ଏକ ଭାବପୂର୍ଣ୍ଣ ସଂକଳ୍ପ।
ଯେ ଏସ୍.ଏମ୍. କଲେଜ, ବଲାଙ୍ଗୀରରେ ଯୁକ୍ତ ତିନି ଶ୍ରେଣୀରେ ଅଧ୍ୟୟନରତ ଅର୍ପିତ ନିଜ ମାଆ ବିଜୟଲକ୍ଷ୍ମୀ ବାବୁଙ୍କ ଆଶୀର୍ବାଦ ଓ ପ୍ରେରଣାରେ ବାପାଙ୍କ ସ୍ମୃତିକୁ ଜୀବନ୍ତ ରଖିବାକୁ ଉଦ୍ୟମ କରିଛନ୍ତି। ନିଜ ଜନ୍ମଦିନକୁ ଆଡ଼ମ୍ବରପୂର୍ଣ୍ଣ ଭାବେ ପାଳନ ନକରି, ଅନ୍ୟମାନଙ୍କ ମୁହଁରେ ହସ ଫୁଟାଇବାରେ ସେ ଖୋଜିଛନ୍ତି ଜୀବନର ପ୍ରକୃତ ଆନନ୍ଦ।
ନିଜ ଜନ୍ମଦିନ ଅବସରରେ ଅର୍ପିତ ପ୍ରଥମଥର ପାଇଁ ଅଦୃତ୍ ଆଶ୍ରମର କୁନି କୁନି ପୁଅଝିଅଙ୍କ ସହ ସେଠାକାର ଅଭିଭାବକମାନଙ୍କ ଗହଣରେ କେକ୍ କାଟି ଜନ୍ମଦିନ ପାଳନ କରିଥିଲେ। ଏହି ଅବସରରେ ବୃକ୍ଷରୋପଣ କରି ପରିବେଶ ସୁରକ୍ଷାର ବାର୍ତ୍ତା ମଧ୍ୟ ଦେଇଥିଲେ। ଆଶ୍ରମର ପ୍ରାୟ ୫୦ ଜଣ ଛାତ୍ରଛାତ୍ରୀଙ୍କ ପାଇଁ ସୁସ୍ୱାଦୁ ଭୋଜନର ବ୍ୟବସ୍ଥା କରିବା ସହ ସେମାନଙ୍କ ସହ ହସଖୁସିରେ କିଛି ସମୟ ବିତାଇଥିଲେ।
ହେଲେ ଏହି ହସଖୁସିର ମୁହୂର୍ତ୍ତ ମଧ୍ୟରେ ଲୁଚି ରହିଥିଲା ଜଣେ ପୁଅର ମନ ଭିତରେ ଜମାଟ ବାନ୍ଧିଥିବା ବାପାଙ୍କ ଅଭାବବୋଧ। କୁନି କୁନି ପିଲାଙ୍କ ସହ ଜନ୍ମଦିନ ପାଳନ କରୁଥିବା ସମୟରେ ଅର୍ପିତଙ୍କ ମନରେ ବାରମ୍ବାର ଭାସି ଉଠୁଥିଲା ସ୍ୱର୍ଗତ ବାପା ରବି ପୁରୋହିତଙ୍କ ସ୍ମୃତି। ଯେଉଁ ବାପାଙ୍କ ସ୍ନେହ ଓ ଆଶୀର୍ବାଦରେ ଜୀବନର ପଥ ଆଗକୁ ବଢ଼ିବା କଥା, ସେହି ବାପାଙ୍କ ଅନୁପସ୍ଥିତି ତାଙ୍କ ମନକୁ ଭାବବିହ୍ୱଳ କରିଦେଇଥିଲା।
ବାପାଙ୍କୁ ମନେ ପକାଇ ଅର୍ପିତ ଭାବପ୍ରବଣ ହୋଇପଡ଼ିଥିଲେ। ତଥାପି ଦୁଃଖ ଭିତରେ ସେ ଖୋଜିଥିଲେ ଏକ ନୂଆ ସଂକଳ୍ପ—ବାପାଙ୍କ ଭଳି ମଣିଷଙ୍କ ସେବା କରିବା, ଅସହାୟଙ୍କ ମୁହଁରେ ହସ ଫୁଟାଇବା ଏବଂ ନିଜ ପାଠପଢ଼ା ସହ ସମାଜସେବାକୁ ଜୀବନର ଅଭିନ୍ନ ଅଂଶ କରିବା।
ମାନବସେବାକୁ ମାଧବ ସେବା ଭାବେ ଗ୍ରହଣ କରି ବାପାଙ୍କ ଆଦର୍ଶରେ ଆଗକୁ ବଢ଼ିବାକୁ ସେ ଭାବବିହ୍ୱଳ କଣ୍ଠରେ ସଂକଳ୍ପବଦ୍ଧ ହୋଇଥିଲେ।
ଅର୍ପିତଙ୍କ ଏହି ପ୍ରୟାସ ଏକ ସୁନ୍ଦର ସାମାଜିକ ବାର୍ତ୍ତା ଦେଉଛି—ମଣିଷ ଚାଲିଯାଏ, ହେଲେ ତାଙ୍କର ଭଲ କାମ ଓ ମହତ୍ ଆଦର୍ଶ କେବେ ମରେନାହିଁ। ସେହି ଆଦର୍ଶକୁ ଯଦି ପରବର୍ତ୍ତୀ ପିଢ଼ି ନିଜ ଜୀବନରେ ଆପଣେଇ ନିଏ, ତେବେ ଜଣେ ମଣିଷ ନିଜ କର୍ମ ମାଧ୍ୟମରେ ସବୁଦିନ ପାଇଁ ଅମର ହୋଇ ରହିପାରେ।
ଆଜିର ‘ରବି ସମର୍ପଣ’ କାର୍ଯ୍ୟକ୍ରମ ମାଧ୍ୟମରେ ପୁଅ ଅର୍ପିତ ନିଜ ବାପାଙ୍କ ସ୍ମୃତିକୁ କେବଳ ମନେ ପକାଇନାହାନ୍ତି, ବରଂ ତାଙ୍କ ଦେଖାଇଥିବା ସେବାର ପଥରେ ଚାଲିବାର ଏକ ନୂଆ ଅଧ୍ୟାୟ ଆରମ୍ଭ କରିଛନ୍ତି। ଜନ୍ମଦିନର ଖୁସିକୁ ଅନ୍ୟମାନଙ୍କ ସହ ବାଣ୍ଟିବା ଏବଂ ବାପାଙ୍କ ନାମରେ ସେବା କରିବାର ଏହି ପ୍ରୟାସ ଅନେକଙ୍କ ହୃଦୟକୁ ଛୁଇଁଛି।
ଏହି ଅବସରରେ ମାଆ ବିଜୟଲକ୍ଷ୍ମୀ ବାବୁ, ବାସନ୍ତୀ ପଣ୍ଡା, ଜିତେନ୍ଦ୍ର ପଣ୍ଡା, ମନୋଜ ବଡ଼ପଣ୍ଡା, ଶୁଭମ୍ ଶ୍ରେୟାଂଶ, ସୋମ, ରାହୁଲ, ସୌମ୍ୟ, ଶାଶ୍ୱତ, ଆୟୁଷଙ୍କ ସମେତ ଅନେକ ବ୍ୟକ୍ତି ଅର୍ପିତଙ୍କୁ ସହଯୋଗ କରିଥିଲେ।
ବାପାଙ୍କ ସ୍ମୃତି ହିଁ ଅର୍ପିତଙ୍କ ପ୍ରେରଣା, ବାପାଙ୍କ ଆଦର୍ଶ ହିଁ ତାଙ୍କର ପଥପ୍ରଦର୍ଶକ ଏବଂ ମାନବସେବା ହିଁ ତାଙ୍କ ଜୀବନର ନୂଆ ସଂକଳ୍ପ। ‘ରବି ସମର୍ପଣ’ ମାଧ୍ୟମରେ ବାପାଙ୍କ ସ୍ମୃତିକୁ ସେବାରେ ପରିଣତ କରିବାର ଏହି ପ୍ରୟାସ ନିଶ୍ଚିତ ଭାବେ ଅନ୍ୟମାନଙ୍କ ପାଇଁ ପ୍ରେରଣାର ଉତ୍ସ ହୋଇ ରହିବ।