ବଳଭଦ୍ରପୁରରେ ବସ୍ ସେବା ଦାବିରେ ରାଜପଥ ଅବରୋଧ: ଗ୍ରାମବାସୀଙ୍କ ଆନ୍ଦୋଳନ ପରେ ସମାଧାନ ।
କେନ୍ଦ୍ରାପଡ଼ା:(ପ୍ରଫୁଲ୍ଲ କୁମାର ମଲ୍ଲ) ଆଜି ସକାଳ ପ୍ରାୟ ୬ ଘଣ୍ଟା ସମୟରେ ଡେରାବିଶ ବ୍ଲକ୍ର ବଳଭଦ୍ରପୁର ଗ୍ରାମବାସୀମାନେ ବସ୍ ସେବାର ଅଭାବକୁ ନେଇ ରାଜପଥ ଅବରୋଧ କରିଥିଲେ। ଅଭିଯୋଗ ଅନୁଯାୟୀ, ବସ୍ଗୁଡ଼ିକ ଗାଁ ଲୋକଙ୍କୁ ସେବା ପ୍ରଦାନ ନକରି ଓଭରବ୍ରିଜ୍ ଦେଇ ପଳାଇଯାଉଛନ୍ତି, ଯାହା ଫଳରେ ସ୍ଥାନୀୟ ଯାତ୍ରୀ ଏବଂ ଛାତ୍ରଛାତ୍ରୀମାନେ ବସ୍ ପାଇବାରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି।ଏହି ସମସ୍ୟାର ତୁରନ୍ତ ସମାଧାନ ଦାବି କରି ଶତାଧିକ ଗ୍ରାମବାସୀ ରାସ୍ତା ଉପରେ ବସି ରହିଥିଲେ। ଫଳସ୍ୱରୂପ, ରାସ୍ତାରୋକ ଯୋଗୁଁ ଯାତାୟାତ କିଛି ସମୟ ସମ୍ପୂର୍ଣ୍ଣ ଠପ୍ ହୋଇଯାଇଥିଲା ଏବଂ ରାସ୍ତାର ଉଭୟ ପାର୍ଶ୍ୱରେ ଅନେକ ଗାଡ଼ି ଅଟକି ରହିଥିଲା। ଏହି ଆନ୍ଦୋଳନ ଦେଖି ସ୍ଥାନୀୟ ପ୍ରଶାସନ ଏବଂ ବସ୍ ମାଲିକମାନେ ହସ୍ତକ୍ଷେପ କରିଥିଲେ। ପରେ ସମସ୍ତ ବସ୍ ଗ୍ରାମବାସୀଙ୍କ ଦାବି ମାନି ନେବାରୁ ଆନ୍ଦୋଳନକାରୀମାନେ ରାସ୍ତାରୋକ ଉଠାଇଥିଲେ ଏବଂ ଗାଡ଼ି ଚଳାଚଳ ସ୍ୱାଭାବିକ ହୋଇଥିଲା।ଗ୍ରାମବାସୀମାନେ କହିଛନ୍ତି ଯେ, ଓଭରବ୍ରିଜ୍ ନିର୍ମାଣ ପରେ ବସ୍ଗୁଡ଼ିକ ଗାଁରେ ରୋକ ନକରିବା ଯୋଗୁଁ ସ୍କୁଲ୍ ଯାଉଥିବା ଛାତ୍ରଛାତ୍ରୀମାନେ ଏବଂ ଦୈନନ୍ଦିନ ଯାତ୍ରୀମାନେ ବହୁ କଷ୍ଟ ଭୋଗୁଛନ୍ତି। ସ୍ଥାନୀୟ ପ୍ରତିନିଧିମାନେ ଏହି ସମସ୍ୟାର ସ୍ଥାୟୀ ସମାଧାନ ପାଇଁ ପ୍ରଶାସନକୁ ଅନୁରୋଧ କରିଛନ୍ତି। ଏହି ଘଟଣା ପରେ ଅଞ୍ଚଳରେ ଶାନ୍ତିଶୃଙ୍ଖଳା ବଜାୟ ରହିଛି।