ଉଦଘାଟନୀ ଉତ୍ସବ ରେ କେନ୍ଦ୍ରଶିକ୍ଷା ମନ୍ତ୍ରୀ ଙ୍କ ସହ ମନ୍ତ୍ରୀ, ଦୁଇ ସାଂସଦ ଅନେକ ବିଧାୟକ
ଭଞ୍ଜନଗର ରୁ { ଉଦୟନାଥ ପଣ୍ଡା }: ବିକଶିତ ଭାରତ ପ୍ରତିଷ୍ଟା ଦିଗରେ ଭାଷା ଭିତ୍ତିକ ରାଜ୍ୟ ଭାବେ ଆମ ଶିକ୍ଷାନୀତି ପ୍ରମୁଖ ଭୂମିକା ଗ୍ରହଣ କରିବ। ଓଡ଼ିଶା ହେବ ଆମ ଦେଶର ପ୍ରମୁଖ ରାଜ୍ୟ। ଗଞ୍ଜାମ ଜିଲ୍ଲା ହେବ ତା’ର ମଉଡମଣୀ ଏବଂ ଭଞ୍ଜ ଭୂମି ହେବ ତା’ର ପ୍ରମୁଖ ପ୍ରୟୋଗାତ୍ମକ କର୍ମଶାଳା , ବୋଲି ଆଜି ଭଞ୍ଜନଗର ସରସ୍ଵତୀ ଶିଶୁ ବିଦ୍ୟା ମନ୍ଦିର ର ନୂତନ ଶ୍ରେଣୀ ଗୃହ ଓ ଛାତ୍ରାବାସ ଭବନ ର ଉଦଘାଟନ ଅବସରରେ କେନ୍ଦ୍ରଶିକ୍ଷା ମନ୍ତ୍ରୀ ଶ୍ରୀମାନ୍ ଧର୍ମେନ୍ଦ୍ର ପ୍ରଧାନ ନିଜ ମତ ପ୍ରକାଶ କରିଛନ୍ତି।
ଗଞ୍ଜାମ ଜିଲ୍ଲା ଭଞ୍ଜନଗର ଡିହପଢାଳ ଠାରେ ଥିବା ସରସ୍ଵତୀ ଶିଶୁ ବିଦ୍ୟା ମନ୍ଦିର ଅନେକ ମହାନ୍ ଶିକ୍ଷାନୁଷ୍ଠାନ ମଧ୍ୟରେ ଗୋଟିଏ। ଏହି ବିଦ୍ୟାଳୟରେ ହେବାକୁ ଥିବା ୩୫ ତମ ବାର୍ଷିକତ୍ସୋବ ଓ ଆଜି ଡିସେମ୍ବର ମାସ ୨୬ ତାରିଖ ଗୁରୁବାର ୨୦୨୪ ରେ ଉକ୍ତ ବିଦ୍ୟାଳୟର ନୂତନ କକ୍ଷ ଓ ଛାତ୍ରାବାସ ଭବନ ଉଦଘାଟନ ରେ ମୂଖ୍ୟ ଅତିଥି ରୂପେ ଯୋଗଦାନ କରିଥିଲେ ମାନ୍ୟବର କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀମାନ ଧର୍ମେନ୍ଦ୍ର ପ୍ରଧାନ। ଏଥି ସକାଶେ ବିଦ୍ୟାଳୟ ପରିସର ମଧ୍ୟରେ ଏକ ବିରାଟ ମଞ୍ଚର ଆୟୋଜନ ହେବା ସହ ବିଦ୍ୟାଳୟ ର ସମସ୍ତ ଗୁରୁମା ଗୁରୁଜୀ, ଛାତ୍ରଛାତ୍ରୀ, କର୍ମଚାରୀ ଓ ଘୋଷବାଦକ ଦଳ ଅତିଥି ମାନଙ୍କ ସ୍ଵାଗତ ସତ୍କାର ରେ ତତ୍ପର ଥିଲେ। ପ୍ରଥମେ ବିଦ୍ୟାଳୟ ରେ ଆସି ପହଞ୍ଚିଥିଲେ ଶ୍ରୀମାନ ଗୋବିନ୍ଦ ଚନ୍ଦ୍ର ମହାନ୍ତି ସଂଗଠନ ମନ୍ତ୍ରୀ ବିଦ୍ୟାଭାରତୀ ଅଖିଳ ଭାରତୀୟ ଶିକ୍ଷା ସଂସ୍ଥାନ ଲଷ୍ମୋ ନୁଆଦିଲ୍ଲୀ, ଶ୍ରୀମାନ ଆନନ୍ଦ ରାଓ ମାର୍ଦ୍ଧୀ ସଂଗଠନ ମନ୍ତ୍ରୀ ପୂର୍ବକ୍ଷେତ୍ର ବିଦ୍ୟାଭାରତୀ, ଶ୍ରୀମାନ ତାରକା ଦାସ ସରକାର ସଂଗଠନ ମନ୍ତ୍ରୀ ଶିକ୍ଷା ବିକାଶ ସମିତି ଓଡ଼ିଶା। ଉକ୍ତ ଅତିଥି ମାନଙ୍କୁ ବିଦ୍ୟାଳୟ ଘୋଷବାଦକ ଦଳ ବିଦ୍ୟାଳୟ କୁ ପାଛୋଟି ଆଣିଥିଲେ। ନୂତନ ଭବନ ଉଦଘାଟନ ରେ ଯୋଗଦେବାକୁ ଥିବା କେନ୍ଦ୍ର ଶିକ୍ଷା ମନ୍ତ୍ରୀ ଙ୍କ ପଥକ୍ଳାନ୍ତ ବିଶ୍ରାମ ନିମନ୍ତେ ସ୍ଥାନୀୟ ବନ ବିଭାଗ ଡାକବଙ୍ଗଳା ଠାରେ ବ୍ୟବସ୍ଥା କରାଯାଇଥିଲା। କାରଣ ମନ୍ତ୍ରୀ ସୁଦୁର ଭୁଵନେଶ୍ଵର ଠାରୁ ଆସିବାର ଥିଲା। ସେଥି ନିମିତ୍ତ ଏହି ସ୍ଥାନରେ ସ୍ଥାନୀୟ ପ୍ରଶାସନ ଠାରୁ ଜିଲ୍ଲା ସ୍ତରୀୟ ସମସ୍ତ ପ୍ରଶାସନିକ ଅଧିକାରୀ ଓ ଓକିଲ ସଂଘର ସମସ୍ତ ବରିଷ୍ଠ ସଦସ୍ୟ କାର୍ଯ୍ୟକର୍ତ୍ତା ମାନେ ମଧ୍ୟ ଉପସ୍ଥିତ ଥିଲେ। ଉକ୍ତ କାର୍ଯ୍ୟକ୍ରମ ରେ ଯୋଗଦାନ କରିବା ପାଇଁ ସମସ୍ତ ବିଧାୟକ, ମନ୍ତ୍ରୀ ଓ ସାଂସଦ ଡାକବଙ୍ଗଳା ରେ ଆସି କିଛି ସମୟ ବିଶ୍ରାମ ନେଇଥିଲେ।
କାର୍ଯ୍ୟକ୍ରମ ରେ ସମ୍ମାନୀତ ଅତିଥି ଭାବେ ଅଖିଳ ଭାରତୀୟ ଶିକ୍ଷା ସଂସ୍ଥାନ ର ଗୋବିନ୍ଦ ଚନ୍ଦ୍ର ମହାନ୍ତି, କନ୍ଧମାଳ ସାଂସଦ ସୁକାନ୍ତ କୁମାର ପାଣିଗ୍ରାହୀ, ଆସିକା ସାଂସଦ ଅନୀତା ଶୁଭଦର୍ଶନୀ, ପଶୁ ସଂପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ସ୍ଥାନୀୟ ବିଧାୟକ ପ୍ରଦ୍ୟୁମ୍ନ କୁମାର ନାୟକ, ଖଲ୍ଲିକୋଟ ବିଧାୟକ ପୂର୍ଣ୍ଣଚନ୍ଦ୍ର ସେଠୀ, ଆସିକା ବିଧାୟକ ସରୋଜ କୁମାର ପାଢ଼ୀ, କବିସୂର୍ଯ୍ୟନଗର ବିଧାୟକ ପ୍ରତାପ ଚନ୍ଦ୍ର ନାୟକ, ଫୁଲବାଣୀ ବିଧାୟକ ଉମା ଚରଣ ମଲ୍ଲିକ, ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ, ଏନ୍.ଏ.ସି ଅଧ୍ୟକ୍ଷ ଗୋପବନ୍ଧୁ ମହାପାତ୍ର, ବ୍ଳକ୍ ଅଧ୍ୟକ୍ଷ ନରୀସଭା ନାୟକ, ସରସ୍ଵତୀ ଶିଶୁ ବିଦ୍ୟା ମନ୍ଦିର ର ପ୍ରଧାନ ଆଚାର୍ଯ୍ୟ ପୂର୍ଣ୍ଣିଚନ୍ଦ୍ର ପଣ୍ଡା, ଉତ୍ତମ ମହାରଣା, ପ୍ରକାଶ ଚନ୍ଦ୍ର ତ୍ରିପାଠୀ, ପ୍ରମୁଖ ମଞ୍ଚାସିନ ଥିବାବେଳେ ଅନୁଷ୍ଠାନ ର ପୂର୍ବତନ ସଭାପତି ଡ଼ଃ କୁମ୍ଭୁପାଣି ସାମନ୍ତ ସ୍ଵାଗତ ଭାଷଣ ଓ ସଭାପତି ଡ଼ଃ ପ୍ରଦୀପ କୁମାର ପଟ୍ଟନାୟକ ଧନ୍ୟବାଦ୍ ଅର୍ପଣ କରିଥିଲେ। ଏହି ବିରାଟ ମଞ୍ଚ କୁ ସୁପରିଚାଳନା କରିଥିଲେ ବିଦ୍ୟାଳୟ ର ଆଚାର୍ଯ୍ୟ ସୁଶାନ୍ତ କୁମାର ବେହେରା।