ଟିପିଏସ୍ଓଡିଏଲ୍ ର ସାହସୀ ଯୋଦ୍ଧାଙ୍କୁ ସଲାମ
- ବାତ୍ୟା ଅର୍ଣ୍ଣବ ସମୟରେ ମାନବିକତା ଓ କର୍ତ୍ତବ୍ୟନିଷ୍ଠାର ଉଦାହରଣ ସାଜିଲେ ଟିପିଏସ୍ଓଡିଏଲ୍ କର୍ମଚାରୀ
- ବନ୍ୟା ପ୍ରଭାବିତ ଲୋକଙ୍କୁ ଆଶ୍ରୟ ଓ ଖାଦ୍ୟ ଯୋଗାଇବାଠାରୁ ଆରମ୍ଭ କରି କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଉପକରଣ ସୁରକ୍ଷିତ ରଖିବା ପର୍ଯ୍ୟନ୍ତ, ସାହସ, ସମ୍ବେଦନଶୀଳତା ଓ କର୍ତ୍ତବ୍ୟନିଷ୍ଠାର ଉଦାହରଣ ସୃଷ୍ଟି କଲେ କର୍ମଚାରୀ
ବ୍ରହ୍ମପୁର, ନଭେମ୍ବର: ବାତ୍ୟା ଅର୍ଣ୍ଣବ ପରବର୍ତ୍ତୀ ବନ୍ୟା ଯୋଗୁଁ ଦକ୍ଷିଣ ଓଡ଼ିଶାର ବିଭିନ୍ନ ଅଞ୍ଚଳରେ ଜନଜୀବନ ବ୍ୟାହତ ହୋଇଥିବା ସମୟରେ ଭଞ୍ଜନଗରର ଦୟାସାଗର ନାୟକ ଏବଂ ଆସିକାର ବିକାଶ ଚନ୍ଦ୍ର ସ୍ୱାଇଁ ନିଜର ପେସାଦାର ଦାୟିତ୍ୱଠାରୁ ଆଗକୁ ବଢ଼ି ମାନବିକତା ଓ କର୍ତ୍ତବ୍ୟନିଷ୍ଠାର ଅନନ୍ୟ ଉଦାହରଣ ଦେଇଛନ୍ତି। ଦୟାସାଗର ବନ୍ୟା ପ୍ରଭାବିତ ଲୋକଙ୍କ ପାଇଁ ନିଜ ଘରର ଦ୍ୱାର ଖୋଲି ଦେଇଥିବା ବେଳେ ବିକାଶ ଛାତିଏ ପାଣିରେ ପଶି କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଉପକରଣ ଓ ଦସ୍ତାବିଜ୍ଗୁଡ଼ିକୁ ସୁରକ୍ଷିତ ରଖିଥିଲେ।
ସେମାନଙ୍କ ଏହି କାର୍ଯ୍ୟ କେବଳ ଦୁଇ ଜଣ କର୍ମଚାରୀଙ୍କ କାହାଣୀ ନୁହେଁ, ବରଂ ସଙ୍କଟ ସମୟରେ ସମାଜ ଓ ସହକର୍ମୀଙ୍କ ପାଇଁ ଆଗେଇ ଆସିଥିବା ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିଏସ୍ଓଡିଏଲ୍)ର ହଜାର ହଜାର କର୍ମଚାରୀଙ୍କ ସେବା ଓ ସମର୍ପଣର ପ୍ରତିଫଳନ।
ଭଞ୍ଜନଗରରେ ଦୟାସାଗର ନାୟକ ବନ୍ୟା ପ୍ରଭାବିତ ଆଖପାଖ ଅଞ୍ଚଳର ଲୋକଙ୍କୁ ସହାୟତା କରିବାକୁ ଆଗେଇ ଆସିଥିଲେ। ସେ ଉଦ୍ଧାର କାର୍ଯ୍ୟରେ ସହଯୋଗ କରିବା ସହ ପ୍ରାୟ ୨୫ ଜଣ ବନ୍ୟା ପ୍ରଭାବିତ ଲୋକଙ୍କୁ ନିଜ ଘରେ ଆଶ୍ରୟ ଦେଇଥିଲେ। ଏଥିସହ ସେମାନଙ୍କ ପାଇଁ ତାଜା ରନ୍ଧା ଖାଦ୍ୟର ବ୍ୟବସ୍ଥା ମଧ୍ୟ କରିଥିଲେ। ମୌଳିକ ଆବଶ୍ୟକତା ପାଇବା କଷ୍ଟକର ହୋଇପଡ଼ିବା ସମୟରେ ତାଙ୍କ ଘର ଅସହାୟ ଲୋକଙ୍କ ପାଇଁ ଆଶ୍ରୟ ଓ ସହାୟତାର କେନ୍ଦ୍ର ପାଲଟିଥିଲା।
ସେହିପରି ଆସିକାରେ ବନ୍ୟାଜଳ ସହର ମଧ୍ୟକୁ ପ୍ରବେଶ କରିବା ପରେ ଅକ୍ଟୋବର ୨୯ ତାରିଖରେ TPSODLର ଆସିକା ଇଲେକ୍ଟ୍ରିକାଲ ଡିଭିଜନ୍-୧ର ଏଷ୍ଟିମେଟର ବିକାଶ ଚନ୍ଦ୍ର ସ୍ୱାଇଁ କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଜିନିଷଗୁଡ଼ିକୁ ସୁରକ୍ଷିତ ରଖିବାକୁ ନିଜ ଆଡ଼ୁ ପଦକ୍ଷେପ ନେଇଥିଲେ। ଛାତିଏ ପାଣିରେ ପଶି ସେ ପ୍ରାୟ ୧୪ରୁ ୧୫ଟି କମ୍ପ୍ୟୁଟର, ସରକାରୀ ଫାଇଲ୍, ପ୍ରିଣ୍ଟର, ସିପିୟୁ ଓ ୟୁପିଏସ୍ ବ୍ୟାଟେରୀଗୁଡ଼ିକୁ କାର୍ଯ୍ୟାଳୟର ଉପର ମହଲାର ପାହାଚ ନିକଟକୁ ସ୍ଥାନାନ୍ତର କରିଥିଲେ। ପରଦିନ ପାଣି କମିବା ପର୍ଯ୍ୟନ୍ତ ସେ ରାତିସାରା କାର୍ଯ୍ୟାଳୟରେ ରହି ଉପକରଣ ଓ ଦସ୍ତାବିଜ୍ଗୁଡ଼ିକର ସୁରକ୍ଷା କରିଥିଲେ। ଏହି ସମୟରେ ତାଙ୍କ ନିଜ ପରିବାର ମଧ୍ୟ ଘରେ ବନ୍ୟାଜଳ ଯୋଗୁଁ ଫସି ରହିଥିଲେ।
ସେହି ଅନୁଭୂତି ବିଷୟରେ ବିକାଶ କହିଛନ୍ତି, “ମୋର ପୂରା ପରିବାର ଘରେ ବନ୍ୟା ପାଣିରେ ଫସି ରହିଥିଲେ। କିନ୍ତୁ ସେହି ସମୟରେ ମୋତେ ଲାଗିଥିଲା ଯେ ମୋ କାର୍ଯ୍ୟ ପ୍ରତି ଥିବା ଦାୟିତ୍ୱ ମଧ୍ୟ ସେତିକି ଗୁରୁତ୍ୱପୂର୍ଣ୍ଣ । କିଛି ଭାବିବା ପାଇଁ ସମୟ ନଥିଲା। କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ଦସ୍ତାବିଜ୍ ଓ ଉପକରଣଗୁଡ଼ିକୁ ସୁରକ୍ଷିତ ରଖିବା ହିଁ ସେହି ସମୟରେ ମୋର କର୍ତ୍ତବ୍ୟ ବୋଲି ମୁଁ ଅନୁଭବ କରିଥିଲି।”
ଦୟାସାଗର ଓ ବିକାଶଙ୍କ ଏହି କାର୍ଯ୍ୟ ବିପର୍ଯ୍ୟୟ ସମୟରେ ଟିପିଏସ୍ଓଡିଏଲ୍ କର୍ମଚାରୀଙ୍କ ନିଷ୍ଠା ଓ ସମର୍ପଣର ଦୁଇଟି ଉଦାହରଣ ମାତ୍ର। କମ୍ପାନୀର ଆଠଟି ଜିଲ୍ଲାର କାର୍ଯ୍ୟକ୍ଷେତ୍ରରେ ହଜାର ହଜାର କର୍ମଚାରୀ, ଇଞ୍ଜିନିୟର, ଅଧିକାରୀ ଓ ପ୍ରକଳ୍ପ କର୍ମଚାରୀ ବାତ୍ୟା ଓ ବନ୍ୟାର ମୁକାବିଲା କରିବା ପାଇଁ ନିରନ୍ତର କାର୍ଯ୍ୟ କରିଥିଲେ। ନିଜର ନିୟମିତ ଦାୟିତ୍ୱ ସହିତ ଆବଶ୍ୟକ ସ୍ଥଳେ ଲୋକଙ୍କୁ ସହାୟତାର ହାତ ବଢ଼ାଇ ସେମାନେ ସେବା ଓ ସହଯୋଗର ମନୋଭାବ ପ୍ରଦର୍ଶନ କରିଥିଲେ।
ବିଦ୍ୟୁତ ପୁନରୁଦ୍ଧାର କାର୍ଯ୍ୟ ପାଇଁ ଦକ୍ଷିଣ ଓଡ଼ିଶାରେ ପ୍ରାୟ ୬,୫୦୦ କର୍ମଚାରୀଙ୍କୁ ନିୟୋଜିତ କରାଯାଇଥିଲା। ସେମାନଙ୍କୁ ପ୍ରାୟ ୪୦୦ଟି ଗାଡ଼ି, ୬ଟି ମୋବାଇଲ୍ ଡିଷ୍ଟ୍ରିବ୍ୟୁସନ୍ ସବ୍ଷ୍ଟେସନ୍ ଏବଂ ୧୬ଟି ଟ୍ରାଞ୍ଜିଟ୍ ଷ୍ଟୋରର ସହାୟତା ମିଳିଥିଲା। ପ୍ରବଳ ଜଳବନ୍ଦୀ, ବିଦ୍ୟୁତ ଭିତ୍ତିଭୂମିର କ୍ଷୟକ୍ଷତି ଓ ଯୋଗାଯୋଗରେ ବାଧା ସତ୍ତ୍ୱେ ଟିମ୍-ଗୁଡ଼ିକ ନିରନ୍ତର ମରାମତି ଓ ବିଦ୍ୟୁତ ପୁନରୁଦ୍ଧାର କାର୍ଯ୍ୟ ଜାରି ରଖିଥିଲେ। ଏହି ସମସ୍ତ ପ୍ରୟାସ ଫଳରେ ଅଞ୍ଚଳରେ ଅତ୍ୟାବଶ୍ୟକ ବିଦ୍ୟୁତ ସେବା ପୁନଃସ୍ଥାପନ ସମ୍ଭବ ହୋଇପାରିଥିଲା।
ଏହିସବୁ ଦୃଷ୍ଟାନ୍ତ ପ୍ରମାଣ କରିଛି ଯେ ପ୍ରାକୃତିକ ବିପର୍ଯ୍ୟୟ ସମୟରେ ଜଣେ କର୍ମଚାରୀଙ୍କ ଭୂମିକା କେବଳ ତାଙ୍କ ନିର୍ଦ୍ଧାରିତ କାର୍ଯ୍ୟ ମଧ୍ୟରେ ସୀମିତ ରହେ ନାହିଁ। ଅସହାୟ ଲୋକଙ୍କୁ ସହାୟତା କରିବା, ଗୁରୁତ୍ୱପୂର୍ଣ୍ଣ ସମ୍ପତ୍ତିର ସୁରକ୍ଷା କରିବା ହେଉ କିମ୍ବା କଠିନ ପରିସ୍ଥିତିରେ କ୍ଷେତ୍ରସ୍ତରରେ କାର୍ଯ୍ୟ କରିବା, ପ୍ରତ୍ୟେକ କ୍ଷେତ୍ରରେ ସେମାନଙ୍କ କାର୍ଯ୍ୟ ନିଜ ସମାଜ ପ୍ରତି ଥିବା ସାମୂହିକ ଦାୟିତ୍ୱବୋଧକୁ ପ୍ରତିଫଳିତ କରିଛି।
ଏ ସମ୍ପର୍କରେ ଶ୍ରୀ ଅମିତ କୁମାର ଗର୍ଗ, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ, ଟିପିଏସ୍ଓଡିଏଲ୍, କହିଛନ୍ତି, “ବାତ୍ୟା ଅର୍ଣ୍ଣବ ସମୟରେ ଆମର ହଜାର ହଜାର କର୍ମଚାରୀ ନିଜର ପେସାଦାର ଦାୟିତ୍ୱର ସୀମା ଡେଇଁ ଯେଉଁଭଳି କାର୍ଯ୍ୟ କରିଛନ୍ତି, ସେଥିପାଇଁ ମୁଁ ଗର୍ବିତ। ପ୍ରଭାବିତ ପରିବାରଗୁଡ଼ିକୁ ସହାୟତା କରିଥିବା କର୍ମଚାରୀଙ୍କ ମାନବିକତା, ଗୁରୁତ୍ୱପୂର୍ଣ୍ଣ ସମ୍ପତ୍ତିର ସୁରକ୍ଷା କରିଥିବା କର୍ମଚାରୀଙ୍କ କର୍ତ୍ତବ୍ୟନିଷ୍ଠା ଏବଂ ଆମ କ୍ଷେତ୍ରୀୟ ଦଳଗୁଡ଼ିକର ନିରନ୍ତର ପ୍ରୟାସ ଆମ ସଂଗଠନର ମୂଲ୍ୟବୋଧକୁ ପ୍ରତିଫଳିତ କରେ। ଏହି ସମସ୍ତ କାର୍ଯ୍ୟ ଆମକୁ ପୁଣି ମନେ ପକାଇ ଦେଇଛି ଯେ ଆମର ଦାୟିତ୍ୱ କେବଳ ବିଦ୍ୟୁତ ପୁନରୁଦ୍ଧାରରେ ସୀମିତ ନୁହେଁ, ବରଂ ଆବଶ୍ୟକତା ସମୟରେ ଆମ ସମାଜ ଓ ଲୋକଙ୍କ ସହିତ ଦୃଢ଼ ଭାବେ ଠିଆ ହେବା ମଧ୍ୟ ଆମର କର୍ତ୍ତବ୍ୟ।”
ନିଜ କର୍ମଚାରୀଙ୍କ ସାମୂହିକ ନିଷ୍ଠା, ସମର୍ପଣ ଓ ସେବା ମନୋଭାବକୁ ପାଥେୟ କରି ଟିପିଏସ୍ଓଡିଏଲ୍ ବାତ୍ୟା ପ୍ରଭାବିତ ଅଞ୍ଚଳରେ ସ୍ୱାଭାବିକ ସ୍ଥିତି ଫେରାଇ ଆଣିବା ସହ ଦକ୍ଷିଣ ଓଡ଼ିଶାର ଜନସାଧାରଣଙ୍କ ପାଖରେ ନିରନ୍ତର ଠିଆ ହୋଇ ରହିଛି।