ପର୍ଶୁରାମ ଗୁରୁକୁଳ କଲେଜରେ ‘ବିକଶିତ ଭାରତ ଯୁବ କନେକ୍ଟ’ କାର୍ଯ୍ୟକ୍ରମ
“ନିଶାକୁ ନା କୁହନ୍ତୁ , ସ୍ୱାସ୍ଥ୍ୟ , ଶିକ୍ଷା , କ୍ରୀଡ଼ା ଓ ବିକଶିତ ଭାରତକୁ ହଁ କୁହନ୍ତୁ”
ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲାର ରାୟଗଡ଼ ବ୍ଲକସ୍ଥିତ ପର୍ଶୁରାମ ଗୁରୁକୁଳ କଲେଜ ପରିସରରେ ଆଜି ମାଇ ଭାରତ , ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ , ଭାରତ ସରକାର ଅଧୀନରେ ବିକଶିତ ଭାରତ ଯୁବ କନେକ୍ଟ କାର୍ଯ୍ୟକ୍ରମ ଆୟୋଜିତ ହୋଇଯାଇଛି।
କାର୍ଯ୍ୟକ୍ରମରେ ନିଶା ମୁକ୍ତ ଅଭିଯାନ ସମ୍ପର୍କରେ ଛାତ୍ରଛାତ୍ରୀ ଓ ଯୁବବର୍ଗଙ୍କୁ ସଚେତନ କରାଯାଇଥିଲା। ନିଶାଦ୍ରବ୍ୟ ଓ ଅନ୍ୟାନ୍ୟ କ୍ଷତିକାରକ ପଦାର୍ଥର ଅପବ୍ୟବହାର ଦ୍ୱାରା ସ୍ୱାସ୍ଥ୍ୟ , ଶିକ୍ଷା , ପରିବାର ଓ ଭବିଷ୍ୟତ ଉପରେ ପଡ଼ୁଥିବା କୁପ୍ରଭାବ ବିଷୟରେ ଆଲୋଚନା କରାଯାଇଥିଲା। ଯୁବମାନଙ୍କୁ ଏକ ସୁସ୍ଥ , ଶୃଙ୍ଖଳିତ ଓ ସକାରାତ୍ମକ ଜୀବନଶୈଳୀ ଆପଣାଇବାକୁ ପ୍ରେରିତ କରାଯାଇଥିଲା।
ଏହା ସହିତ ବିକଶିତ ଭାରତ ଯୁବ ନେତୃତ୍ୱ ସଂଳାପ କୁଇଜ୍ ସମ୍ପର୍କରେ ଛାତ୍ରଛାତ୍ରୀଙ୍କୁ ସୂଚନା ଦିଆଯାଇ ନିବନ୍ଧନ ପାଇଁ ସହଯୋଗ କରାଯାଇଥିଲା। କାର୍ଯ୍ୟକ୍ରମରେ ପ୍ରାୟ ୨୦୦ ଜଣ ଛାତ୍ରଛାତ୍ରୀ ଅଂଶଗ୍ରହଣ କରି ବିକଶିତ ଭାରତ ଯୁବ ନେତୃତ୍ୱ ସଂଳାପ କୁଇଜ୍ରେ ନିବନ୍ଧନ କରିଥିଲେ।
ଏହି କାର୍ଯ୍ୟକ୍ରମରେ କଲେଜର ଅଧ୍ୟକ୍ଷ, ଏନ ଏସ ଏସ ନୋଡାଲ ଅଫିସର , ଯୁବ ଆଇକନ୍ ଏବଂ ମାଇ ଭାରତ ସ୍ୱେଚ୍ଛାସେବକ ମାନେ ଉପସ୍ଥିତ ରହି ସଚେତନତା ଓ ନିବନ୍ଧନ କାର୍ଯ୍ୟକ୍ରମରେ ସହଯୋଗ କରିଥିଲେ। ଯୁବ ଆଇକନ୍ ଛାତ୍ରଛାତ୍ରୀଙ୍କ ସହ ଆଲୋଚନା କରି ନିଶାଦ୍ରବ୍ୟଠାରୁ ଦୂରେଇ ରହିବା ସହ ସମାଜ ଓ ଦେଶର ବିକାଶରେ ସକାରାତ୍ମକ ଭୂମିକା ନେବାକୁ ପ୍ରେରଣା ଦେଇଥିଲେ।
ମାଇ ଭାରତ ସ୍ୱେଚ୍ଛାସେବକମାନେ ଛାତ୍ରଛାତ୍ରୀଙ୍କୁ ବିକଶିତ ଭାରତ ଯୁବ ନେତୃତ୍ୱ ସଂଳାପ କୁଇଜ୍ ନିବନ୍ଧନ ପ୍ରକ୍ରିୟାରେ ସହଯୋଗ କରିବା ସହ ଯୁବ କେନ୍ଦ୍ରିକ ବିଭିନ୍ନ କାର୍ଯ୍ୟକ୍ରମରେ ସକ୍ରିୟ ଭାବେ ଯୋଗଦେବାକୁ ଉତ୍ସାହିତ କରିଥିଲେ।
କାର୍ଯ୍ୟକ୍ରମରେ ଦେଶ ଗଠନରେ ଯୁବବର୍ଗଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରାଯାଇଥିଲା। ଶିକ୍ଷା , କ୍ରୀଡ଼ା , ସ୍ୱେଚ୍ଛାସେବା , ଦକ୍ଷତା ବିକାଶ ଓ ସାମାଜିକ ସେବା ମାଧ୍ୟମରେ ବିକଶିତ ଭାରତ ଗଠନରେ ଯୁବମାନେ ଅବଦାନ ରଖିବାକୁ ଆହ୍ୱାନ କରାଯାଇଥିଲା।
“ନିଶାକୁ ନା କୁହନ୍ତୁ , ସ୍ୱାସ୍ଥ୍ୟ , ଶିକ୍ଷା , କ୍ରୀଡ଼ା ଓ ବିକଶିତ ଭାରତକୁ ହଁ କୁହନ୍ତୁ”।