ନେରେଡି ପ୍ରକଳ୍ପକୁ ନେଇ ଚାଷୀଙ୍କ ମନରେ ଆଶଙ୍କା , ଗାଁରେ ଗୁଞ୍ଜିଲା ‘ଆନ୍ଧ୍ର ଗୋ ବ୍ୟାକ୍’ ନାରା

ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ନିଜ ଜମି , ଜୀବିକା ଓ ଭବିଷ୍ୟତକୁ ନେଇ ଚିନ୍ତିତ ପ୍ରତ୍ୟେକ ଗ୍ରାମର ଚାଷୀମାନେ ଆଜି ନିଜର ଦୁଃଖ ଓ ଆଶଙ୍କା ବିଧାୟକଙ୍କ ସମ୍ମୁଖରେ ରଖିଛନ୍ତି। ଗଜପତି ଜିଲ୍ଲା କାଶୀନଗର ବ୍ଲକ ଅନ୍ତର୍ଗତ ଖାରଡା ଗ୍ରାମକୁ ପାରଳାଖେମୁଣ୍ଡି ବିଧାୟକ ରୂପେଶ ପାଣିଗ୍ରାହୀ ଗସ୍ତ କରି ଚାଷୀ ଓ ଗ୍ରାମବାସୀଙ୍କ ସହ ସମସ୍ୟା ନେଇ ଆଲୋଚନା କରିଥିଲେ।
ବିଧାୟକ ଗ୍ରାମରେ ପହଞ୍ଚିବା ପରେ ଶତାଧିକ ଚାଷୀ ଏକାଠି ହୋଇ ନିଜ ନିଜ ସମସ୍ୟା ଜଣାଇଥିଲେ। ବିଶେଷକରି ନେରେଡି ପ୍ରକଳ୍ପକୁ ନେଇ ଚାଷୀମାନଙ୍କ ମନରେ ଥିବା ଭୟ ଓ ଆଶଙ୍କା ସମ୍ପର୍କରେ ସେମାନେ ବିଧାୟକଙ୍କୁ ଅବଗତ କରାଇଥିଲେ।
ଚାଷୀମାନଙ୍କ କହିବା ଅନୁଯାୟୀ, ନେରେଡି ପ୍ରକଳ୍ପ ଆନ୍ଧ୍ର ପ୍ରଦେଶ ସରକାରଙ୍କ ପକ୍ଷରୁ କରାଗଲେ ପ୍ରକଳ୍ପର ଉପର ଅଞ୍ଚଳର ଅନେକ ଗ୍ରାମ ଜଳମଗ୍ନ ହେବାର ଆଶଙ୍କା ରହିଛି। ଅନ୍ୟପଟେ ତଳ ଅଞ୍ଚଳର ଚାଷୀମାନେ ଆବଶ୍ୟକ ପାଣିରୁ ବଞ୍ଚିତ ହେବାର ଭୟ ପ୍ରକାଶ କରିଛନ୍ତି।
“ଆମ ଜମି ବୁଡ଼ିଯିବ, ଆମ ଘର ଉଜାଡ଼ିଯିବ, ଆମ ପିଲାଙ୍କ ଭବିଷ୍ୟତ କଣ ହେବ?”—ଏଭଳି ପ୍ରଶ୍ନ ନେଇ ଚାଷୀମାନେ ନିଜ ମନର କଷ୍ଟ ବିଧାୟକଙ୍କ ଆଗରେ ପ୍ରକାଶ କରିଥିଲେ। ବର୍ଷ ବର୍ଷ ଧରି ଯେଉଁ ମାଟିକୁ ଆଶ୍ରା କରି ପରିବାର ଚଳାଉଛନ୍ତି, ସେହି ଜମି ଓ ଜୀବିକା ହରାଇବାର ଆଶଙ୍କା ଚାଷୀଙ୍କ ମୁହଁରେ ସ୍ପଷ୍ଟ ଦେଖାଯାଇଥିଲା।
ନେରେଡି ପ୍ରକଳ୍ପକୁ ନେଇ ନିଜ ଅସନ୍ତୋଷ ପ୍ରକାଶ କରି ଗ୍ରାମବାସୀମାନେ ‘ଆନ୍ଧ୍ର ଗୋ ବ୍ୟାକ୍’ ନାରା ଦେଇ ପ୍ରତିବାଦ ଜଣାଇଥିଲେ। ଗ୍ରାମର ପରିବେଶ କିଛି ସମୟ ପାଇଁ ଉତ୍ତେଜନାପୂର୍ଣ୍ଣ ହୋଇଉଠିଥିଲା। ତଥାପି ଚାଷୀମାନେ ନିଜର ଜମି , ପାଣି ଓ ଜୀବନ-ଜୀବିକାର ସୁରକ୍ଷା ପାଇଁ ନିଜ ଦାବି ଦୃଢ଼ ଭାବେ ଉପସ୍ଥାପନ କରିଥିଲେ।
ବିଧାୟକ ରୂପେଶ ପାଣିଗ୍ରାହୀ ଚାଷୀମାନଙ୍କ କଥା ଧୈର୍ଯ୍ୟର ସହ ଶୁଣିବା ସହ ସେମାନଙ୍କ ଆଶଙ୍କା ଓ ସମସ୍ୟା ସମ୍ପର୍କରେ ଅବଗତ ହୋଇଥିଲେ। ଚାଷୀଙ୍କ ଜୀବନ ଓ ଜୀବିକା ସହ ଜଡ଼ିତ ଏଭଳି ସମ୍ବେଦନଶୀଳ ପ୍ରସଙ୍ଗରେ ଗ୍ରାମବାସୀଙ୍କ ମତାମତକୁ ଗୁରୁତ୍ୱ ଦେବା ଆବଶ୍ୟକ ବୋଲି ଆଲୋଚନା ସମୟରେ ଗୁରୁତ୍ୱ ପାଇଥିଲା।
ଏହି ଗସ୍ତ ସମୟରେ ବିଧାୟକଙ୍କ ସହ ଜିଲ୍ଲା ପରିଷଦ ଅଧ୍ୟକ୍ଷ ଜି. ତିରୁପତି ରାଓ , କାଶୀନଗର ବ୍ଲକ ଅଧ୍ୟକ୍ଷା ବାଲା ସାଇଆମ୍ମା , ସ୍ଥାନୀୟ ସରପଞ୍ଚ ଅଖିଳ ପାତ୍ରଙ୍କ ସମେତ ଶତାଧିକ ଚାଷୀ ଓ ଗ୍ରାମବାସୀ ଉପସ୍ଥିତ ଥିଲେ।
ଖାରଡା ଗ୍ରାମର ଏହି ଦୃଶ୍ୟ କେବଳ ଏକ ପ୍ରତିବାଦର ଚିତ୍ର ନୁହେଁ , ବରଂ ନିଜ ମାଟି ଓ ଜୀବିକାକୁ ବଞ୍ଚାଇ ରଖିବା ପାଇଁ ଚାଷୀଙ୍କ ଚିନ୍ତା ଓ ସଂଘର୍ଷର ପ୍ରତିଛବି। ନେରେଡି ପ୍ରକଳ୍ପକୁ ନେଇ ଆଗକୁ କି ପଦକ୍ଷେପ ନିଆଯିବ ଏବଂ ଚାଷୀଙ୍କ ଆଶଙ୍କା କିପରି ଦୂର ହେବ , ତାହାକୁ ନେଇ ଏବେ ସମଗ୍ର ଅଞ୍ଚଳର ନଜର ରହିଛି।