ଅଧିକ ଭଡ଼ା ଓ ହଇରାଣ ଅଭିଯୋଗ ।
‘ବାଙ୍କେଶ୍ୱରୀ’ ବସ୍ ବିରୋଧରେ କାର୍ଯ୍ୟାନୁଷ୍ଠାନର ଚେତାବନୀ ଦେଲେ ଜିଲ୍ଲା ପରିବହନ ଅଧିକାରୀ ।
ମାଲକାନଗିରି ରୁ ସୁରେନ୍ଦ୍ର କୁମାର ବେମାଳ: ହାଇଦ୍ରାବାଦରୁ ମାଲକାନଗିରି ମଧ୍ୟରେ ଚଳାଚଳ କରୁଥିବା ‘ବାଙ୍କେଶ୍ୱରୀ’ ନାମକ ଘରୋଇ ବସ୍ରେ ଯାତ୍ରୀ ଶୋଷଣ ଓ ନିୟମ ଉଲ୍ଲଂଘନର ଗମ୍ଭୀର ଅଭିଯୋଗ ଆସିଛି। ଟିକେଟ୍ ନଦେଇ ଅତ୍ୟଧିକ ଭଡ଼ା ଆଦାୟ, ସିଟ୍ କ୍ଷମତାଠାରୁ ଅଧିକ ଯାତ୍ରୀ ବସାଇବା ଏବଂ ପ୍ରତିବାଦ କଲେ ଦୁର୍ବ୍ୟବହାର କରାଯାଉଥିବା ନେଇ ଯାତ୍ରୀମାନେ ଅସନ୍ତୋଷ ପ୍ରକାଶ କରିଛନ୍ତି।
ଯାତ୍ରୀଙ୍କ ସଂଗୀନ ଅଭିଯୋଗ
ଅତ୍ୟଧିକ ଭଡ଼ା ନିୟମିତ ଟିକେଟ୍ ନଦେଇ ଯାତ୍ରୀଙ୍କଠାରୁ ମନଇଚ୍ଛା ୧୪୦୦ ରୁ ୧୫୦୦ ଟଙ୍କା ପର୍ଯ୍ୟନ୍ତ ଭଡ଼ା ଆଦାୟ କରାଯାଉଛି।
ଗୋଟିଏ ସିଟ୍ରେ ଏକାଧିକ ଯାତ୍ରୀଙ୍କୁ ବସାଯାଉଛି। ଦାଦନ ଶ୍ରମିକ, ରୋଗୀ ଓ ମହିଳା ଯାତ୍ରୀମାନେ ଦୀର୍ଘ ଦୂରତା ଯାତ୍ରା ବେଳେ ପ୍ରତିବାଦ କଲେ, ଡ୍ରାଇଭର ଓ କଣ୍ଡକ୍ଟର ଗାଳିଗୁଲଜ କରିବା ସହ ଅଧା ରାସ୍ତାରୁ ଓହ୍ଲାଇ ଦେଉଥିବା ଅଭିଯୋଗ ହୋଇଛି।
ଏହି ସମସ୍ୟା ନେଇ ମାଲକାନଗିରି ପରିବହନ ବିଭାଗ ତତ୍ପରତା ପ୍ରକାଶ କରିଛି। ବିଭାଗୀୟ ସୂଚନା ଅନୁସାରେ ବସ୍ ବିରୋଧରେ ପୂର୍ବରୁ ୩ ଥର ଜରିମାନା କରାଯାଇଛି ଏବଂ ବାରମ୍ବାର ତାଗିଦ୍ ମଧ୍ୟ କରାଯାଇଛି।
ପୁନର୍ବାର ନିୟମ ଉଲ୍ଲଂଘନ କଲେ ବସ୍କୁ ସଂପୂର୍ଣ୍ଣ ଜବତ କରାଯିବା ସହ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ପରିବହନ ଅଧିକାରୀ ପ୍ରତିକ୍ରିୟା ରେ କହିଛନ୍ତି।
ଯାତ୍ରୀଙ୍କ ସୁରକ୍ଷା ଓ ସୁବିଧା ପାଇଁ ରହିଥିବା ନିୟମକୁ ବାରମ୍ବାର ଅଣଦେଖା କରାଯାଉଥିବାରୁ, ଏବେ ପରିବହନ ବିଭାଗ କେତେ ଶୀଘ୍ର ଓ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରୁଛି, ତାହା ଦେଖିବାକୁ ବାକି ରହିଲା।