ଚୋରି ସନ୍ଦେହରେ ‘ଲିଞ୍ଚିଙ୍ଗ୍’: ପିଟି ପିଟି ମାରିଦେଲେ ; ପୁରୁଷ ଶୂନ୍ୟ ହେଲା ସାର୍ଦୁଲ ଗାଁ
ଭଞ୍ଜନଗର ରୁ ( ଉଦୟନାଥ ପଣ୍ଡା ) ଶାସକ ପ୍ରଶାସକ: ଆଇନକୁ ହାତକୁ ନେଲେ ଲୋକେ। ଚୋରି ସନ୍ଦେହରେ ଜଣେ ଯୁବକକୁ ବିଦ୍ୟୁତ ଖୁଣ୍ଟରେ ବାନ୍ଧି ନିର୍ଧୁମ ଛେଚିଲେ। ଶେଷରେ ଚିକିତ୍ସାଧୀନ ଅବସ୍ଥାରେ ଯୁବକଙ୍କ ମୃତ୍ୟୁ ଘଟିଛି। ଏହି ଅଭାବନୀୟ ଘଟଣା ଏବେ ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅନ୍ତର୍ଗତ ସାର୍ଦୁଲ ଗ୍ରାମରେ ଚାଞ୍ଚଲ୍ୟ ଖେଳାଇ ଦେଇଛି। ପୋଲିସ୍ ର କାର୍ଯ୍ୟାନୁଷ୍ଠାନ ଭୟରେ ଏବେ ସାର୍ଦୁଲ ଗ୍ରାମ ପୁରୁଷ ଶୂନ୍ୟ ହୋଇପଡ଼ିଛି।
ସୂଚନା ଅନୁସାରେ, ଶୁକ୍ରବାର ବିଳମ୍ବିତ ରାତିରେ କିଛି ଦୁର୍ବୃତ୍ତ ଚୋରି କରିବା ଉଦ୍ଦେଶ୍ୟରେ ସାର୍ଦୁଲ ଗ୍ରାମକୁ ପ୍ରବେଶ କରିଥିଲେ। ଚୋରି ସମୟରେ କିଛି ଶବ୍ଦ ହେବାରୁ ଗ୍ରାମବାସୀଙ୍କ ନିଦ ଭାଙ୍ଗି ଯାଇଥିଲା। ଲୋକେ ଏକତ୍ରିତ ହୋଇ ଗୋଡ଼ାଇବାରୁ ଅନ୍ୟମାନେ ଖସି ପଳାଇବାରେ ସଫଳ ହୋଇଥିବା ବେଳେ କନ୍ଧମାଳ ଜିଲ୍ଲା ଜି. ଉଦୟଗିରି ଥାନା କୁରୁମୁଙ୍ଗିଆ ଗ୍ରାମର ବାଣଧର ପ୍ରଧାନ (୪୦) ଗ୍ରାମବାସୀଙ୍କ ହାବୁଡ଼ରେ ପଡ଼ିଯାଇଥିଲେ।
ଉତ୍ତ୍ୟକ୍ତ ଗ୍ରାମବାସୀ ବାଣଧରଙ୍କୁ ଏକ ବିଦ୍ୟୁତ ଖୁଣ୍ଟରେ ବାନ୍ଧି ଅମାନୁଷିକ ଭାବେ ମାଡ଼ ମାରିଥିଲେ। ଶନିବାର ସକାଳେ ଗୁରୁତର ଅବସ୍ଥାରେ ତାଙ୍କୁ ପୋଲିସକୁ ହସ୍ତାନ୍ତର କରାଯାଇଥିଲା। ମାତ୍ର ଭଞ୍ଜନଗର ମେଡିକାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।
ପୋଲିସର ଚଢ଼ାଉ ଓ ଗ୍ରାମରେ ଆତଙ୍କ
ଜଣେ ବ୍ୟକ୍ତିଙ୍କୁ ପିଟି ପିଟି ହତ୍ୟା କରାଯିବା ଘଟଣାକୁ ଗଞ୍ଜାମ ଏସ୍ପି ଅତ୍ୟନ୍ତ ଗୁରୁତର ସହ ନେଇଛନ୍ତି। ତାଙ୍କ ନିର୍ଦ୍ଦେଶ କ୍ରମେ ଏଏସପି ରଞ୍ଜନ କୁମାର ଦେ ଏବଂ ଭଞ୍ଜନଗର ଆଇଆଇସି ଜିବନାନନ୍ଦ ଜେନାଙ୍କ ନେତୃତ୍ୱରେ ଏକାଧିକ ଟିମ୍ ଗ୍ରାମରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ମାଡ଼ ମାରିବା ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ, ସେହି ଭିଡିଓକୁ ଆଧାର କରି ପୋଲିସ ଅଭିଯୁକ୍ତମାନଙ୍କୁ ଚିହ୍ନଟ କରୁଛି।
ଭଞ୍ଜନଗର, ଗାଙ୍ଗପୁର, ତାରସିଂ ଏବଂ ବେଲଗୁଣ୍ଠା ପୋଲିସ ପକ୍ଷରୁ ମିଳିତ ଭାବେ ଗ୍ରାମରେ ଚଢ଼ାଉ କରାଯାଇଛି। ଘଟଣାରେ ସଂପୃକ୍ତ ଥିବା ସନ୍ଦେହରେ ପାଖାପାଖି ୨୫ ରୁ ଉର୍ଦ୍ଧ୍ୱ ପୁରୁଷ ଓ ମହିଳାଙ୍କୁ ଥାନାକୁ ଉଠାଇ ନିଆଯାଇଛି।
ଖାଲି ପଡ଼ିଛି ଗାଁ, ଲୋକେ ସନ୍ତ୍ରସ୍ତ
ପୋଲିସର ବାରମ୍ବାର ଚଢ଼ାଉ ଏବଂ ଗିରଫ ଭୟରେ ଗାଁର ପ୍ରାୟ ସମସ୍ତ ପୁରୁଷ ଲୋକ ଏବେ ଗାଁ ଛାଡ଼ି ଫେରାର ଅଛନ୍ତି। ଯଦିଓ ମୃତ ବ୍ୟକ୍ତି ଜଣକ ଚୋରି କରିବାକୁ ଆସିଥିଲେ, ତଥାପି ଆଇନକୁ ନିଜ ହାତକୁ ନେଇ କାହାର ଜୀବନ ନେବାର ଅଧିକାର କାହାର ନାହିଁ ବୋଲି ପୋଲିସ ପ୍ରଶାସନ ସ୍ପଷ୍ଟ କରିଛି।
”ଆଇନ ଅନୁସାରେ ତଦନ୍ତ କରାଯାଇ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ” – ପୋଲିସ ପ୍ରଶାସନ। ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିବା ବେଳେ ପୋଲିସ ସାର୍ଦୁଲ ଗ୍ରାମରେ ନିଜର ନଜର ରଖିଛି।