ବିଜେପୁରରେ ବନ୍ଦେ ମାତରଂ, ଆତ୍ମନିର୍ଭର ଭାରତ ଓ ସ୍ବଦେଶୀ ସଂକଳ୍ପ ଅଭିଯାନ ବୈଠକ

ବିଜେପୁର : ମାନ୍ୟବର ବିଜେପୁର ବିଧାୟକ ଶ୍ରୀମାନ ସନତ କୁମାର ଗଡ଼ତୀୟାଙ୍କ ନେତୃତ୍ୱରେ ବିଜେପୁର ଠାରେ “ବନ୍ଦେ ମାତରଂ”, “ଆତ୍ମନିର୍ଭର ଭାରତ” ଓ “ସ୍ବଦେଶୀ ସଂକଳ୍ପ ଅଭିଯାନ” ସମ୍ପର୍କିତ ଏକ ଗୁରୁତ୍ୱପୂର୍ଣ୍ଣ ବୈଠକ ସଫଳତାର ସହିତ ଅନୁଷ୍ଠିତ ହୋଇଯାଇଛି। ଏହି ବୈଠକ ବିଜେପୁର ମଧ୍ୟପଡ଼ାସ୍ଥିତ କଲ୍ୟାଣ ମଣ୍ଡପ ଠାରେ ଆୟୋଜିତ ହୋଇଯାଇଛି।ବୈଠକରେ ଦେଶଭକ୍ତିର ଭାବନାକୁ ସୁଦୃଢ଼ କରିବା ସହ ଦେଶକୁ ଆର୍ଥିକ ଓ ସାମାଜିକ ଭାବେ ସଶକ୍ତ କରିବା ପାଇଁ ଆତ୍ମନିର୍ଭରତାର ଆବଶ୍ୟକତା ଉପରେ ଗୁରୁତ୍ୱ ଆରୋପ କରାଯାଇଥିଲା। ବୈଠକର ଆରମ୍ଭରେ “ବନ୍ଦେ ମାତରଂ” ଗାନ ସହ ଦେଶମାତୃକା ପ୍ରତି ଶ୍ରଦ୍ଧା ଓ ସମ୍ମାନ ପ୍ରକାଶ କରାଯାଇଥିଲା।
ବିଧାୟକ ଶ୍ରୀ ଗଡ଼ତୀୟା ତାଙ୍କ ବକ୍ତବ୍ୟରେ କହିଥିଲେ ଯେ, ଆତ୍ମନିର୍ଭର ଭାରତ ଗଠନ କେବଳ ସରକାରଙ୍କ ଦାୟିତ୍ୱ ନୁହେଁ, ବରଂ ସାଧାରଣ ଜନତାଙ୍କ ସହଭାଗୀତା ଏଥିରେ ଅତ୍ୟାବଶ୍ୟକ। ସ୍ବଦେଶୀ ପଦାର୍ଥ ବ୍ୟବହାର କରିଲେ ଦେଶର ଅର୍ଥନୀତି ସୁଦୃଢ଼ ହେବା ସହ ସ୍ଥାନୀୟ କାରିଗର ଓ ଉଦ୍ୟୋଗପତିମାନେ ଲାଭାନ୍ବିତ ହେବେ ବୋଲି ସେ କହିଥିଲେ।ସେ ଆହୁରି କହିଥିଲେ ଯେ, ଦେଶଭକ୍ତି କେବଳ ଭାଷଣରେ ସୀମିତ ନ ରହି, ଦୈନନ୍ଦିନ ଜୀବନରେ ସ୍ବଦେଶୀ ଜିନିଷ ବ୍ୟବହାର ଓ ଦେଶୀ ଉଦ୍ୟୋଗକୁ ପ୍ରୋତ୍ସାହନ ଦେବା ମାଧ୍ୟମରେ ପ୍ରକାଶ ପାଇବା ଉଚିତ।ବୈଠକରେ ବିଭିନ୍ନ ସାମାଜିକ କର୍ମୀ, ରାଜନୈତିକ କାର୍ଯ୍ୟକର୍ତ୍ତା, ବୁଦ୍ଧିଜୀବୀ ଓ ସ୍ଥାନୀୟ ନାଗରିକମାନେ ଯୋଗ ଦେଇ ଆତ୍ମନିର୍ଭର ଭାରତ ଓ ସ୍ବଦେଶୀ ସଂକଳ୍ପକୁ ସାକାର କରିବା ପାଇଁ ସମୂହ ସଂକଳ୍ପ ନେଇଥିଲେ।
ଶେଷରେ ଏହି ଅଭିଯାନକୁ ଘରେଘରେ ପହଞ୍ଚାଇବା ଓ ଯୁବପିଢ଼ୀଙ୍କୁ ଏହା ସହ ଜଡ଼ିବା ପାଇଁ ସମସ୍ତେ ସଂକଳ୍ପବଦ୍ଧ ହେବାର ଆହ୍ୱାନ କରାଯାଇଥିଲା।