“ହର ଘର ତ୍ରିରଙ୍ଗା” ଅଭିଯାନ ପ୍ରସ୍ତୁତିର ସମୀକ୍ଷା କଲେ ଗୃହ ନିର୍ମାଣ ଓ ନଗର ଉନ୍ନୟନ ସଚିବ
ଭୁବନେଶ୍ୱର, ୦୮ । ୦୮ : ଆସନ୍ତା ୭୭ତମ ସ୍ୱାଧୀନତା ଦିବସକୁ ଦୃଷ୍ଟିରେ ରଖି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଉଷା ପାଢ଼ୀ ରାଜ୍ୟବ୍ୟାପୀ ପୌର ସଂସ୍ଥାଗୁଡିକର ପ୍ରସ୍ତୁତି ର ସମୀକ୍ଷା କରିଛନ୍ତି।
ଭିଡିଓ କନଫରେନ୍ସିଂ ଜରିଆରେ ଅନୁଷ୍ଠିତ ଏହି ବୈଠକରେ ଡିଏମ୍ଏ ଦେବାଶିଷ ସିଂହ ଓ ଅତିରିକ୍ତ ସଚିବ ରବୀନ୍ଦ୍ରକୁମାର ସାହୁଙ୍କ ସମେତ ୫ଟି ମହାନଗର ନିଗମ ସମେତ ସମସ୍ତ ପୌରସଂସ୍ଥାର କମିସନର ଓ କାର୍ଯ୍ୟନିର୍ବାହୀ ଅଧିକାରୀମାନେ ଉପସ୍ଥିତ ଥିଲେ।
ସମୀକ୍ଷା ସମୟରେ ଶ୍ରୀମତୀ ପାଢ଼ୀ ଦେଶଭକ୍ତି ଓ ଏକତାର ଭାବନା ନେଇ ସ୍ୱାଧୀନତା ଦିବସ ପାଳନ ଉପରେ ଗୁରୁତ୍ୱାରୋପ କରିଥିଲେ। ହର ଘର ତ୍ରିରଙ୍ଗା ଅଭିଯାନରେ ସକ୍ରିୟ ଭାବରେ ଅଂଶଗ୍ରହଣ କରିବାକୁ ସେ ସମସ୍ତ ପୌରସଂସ୍ଥାମାନଙ୍କୁ ଅନୁରୋଧ କରିଥିଲେ ଏବଂ ପ୍ରତ୍ୟେକ ପରିବାରକୁ ଗର୍ବର ସହ ଜାତୀୟ ପତାକା ଉତ୍ତୋଳନ କରିବାକୁ ଉତ୍ସାହିତ କରିଥିଲେ ।
ଅଗଷ୍ଟ ୧୫ ତାରିଖରେ ରାଜ୍ୟର କୋଣ ଅନୁକୋଣ ଯେପରି ସ୍ୱାଧୀନତାର ଭାବନା ସହ ମିଳେ ଏବଂ ଚଳିତ ବର୍ଷ ସ୍ୱାଧୀନତା ଦିବସ ଉତ୍ସବକୁ ସମସ୍ତ ନାଗରିକଙ୍କ ପାଇଁ ସ୍ମରଣୀୟ ଏବଂ ଏକଜୁଟ ଅନୁଭୂତି ରେ ପରିଣତ କରିବା ପାଇଁ ସମସ୍ତ ପୌରସଂସ୍ଥାମାନଙ୍କୁ ନିଷ୍ଠାର ସହ କାର୍ଯ୍ୟ କରିବାକୁ ଶ୍ରୀମତୀ ପାଢ଼ୀ ଅନୁରୋଧ କରିଥିଲେ।