“ନିସାନ” ସହାୟତାରେ ଜିଲ୍ଲା ପ୍ରଶାସନର ଅନାଥ ଶିଶୁଙ୍କୁ ରାସନ ସାମଗ୍ରୀ ବଣ୍ଟନ

ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲାର ଜିଲ୍ଲାପାଳ ଶ୍ରୀଯୁକ୍ତ ଲିଙ୍ଗରାଜ ପଣ୍ଡା ଜିଲ୍ଲାରେ ଥିବା ଶିଶୁ ଯତ୍ନ ଓ ସୁରକ୍ଷା ଅନୁଷ୍ଠାନ ମାନଙ୍କର ଅନାଥ ଶିଶୁ ମାନଙ୍କୁ ରାସନ ସାମଗ୍ରୀ ବଣ୍ଟନ କରିଛନ୍ତି।
ଗଜପତି ଜିଲ୍ଲାରେ ୭ ଗୋଟି ଶିଶୁ ଯତ୍ନ ଓ ସୁରକ୍ଷା ଅନୁଷ୍ଠାନ କାମ କରୁଛି। ସେମାନଙ୍କ ମଧ୍ୟରୁ କେବଳ ଦୁଇ ଗୋଟି ଅନୁଷ୍ଠାନକୁ ସରକାରଙ୍କ ସହାୟକ ଅନୁଦାନ ମିଳେ। ଅନ୍ୟ ପାଞ୍ଚ ଗୋଟି ଅନୁଷ୍ଠାନ ବିଭିନ୍ନ ବ୍ୟକ୍ତି ବିଶେଷ ଏବଂ ଅନୁଷ୍ଠାନ ମାନଙ୍କ ଠାରୁ ଦିନ ଗ୍ରହଣ କରି ପିଲାମାନଙ୍କର ଯତ୍ନ ଏବଂ ସୁରକ୍ଷାକୁ ସୁନିଶ୍ଚିତ କରନ୍ତି।
ଏହି ଭଳି ଦୁଇଟି ଅନୁଷ୍ଠାନ ଯଥା ବିବେକାନନ୍ଦ ରେସିଡେନ୍ସିଆଲ୍ ସ୍କୁଲ , ଏସ୍.ଉରୁଡ଼ା, ଗୋଷାଣୀ ଏବଂ ପ୍ରାଉଡ଼ , ବି.ସୀତାପୁର , ଗୋଷାଣୀର ଅନାଥ ଶିଶୁ ପ୍ରାୟ ୫୦ ଜଣଙ୍କୁ ଏକ ମାସର ରାସନ ସାମଗ୍ରୀ ଜିଲ୍ଲାପାଳ ବଣ୍ଟନ କରିଛନ୍ତି।
ଏହି ରାସନ ସାମଗ୍ରୀ ଗଜପତି ଜିଲ୍ଲାର ଏକ ସ୍ବେଚ୍ଛାସେବୀ ଅନୁଷ୍ଠାନ “ନିସାନ”, ଗୁମ୍ମା ଦ୍ବାରା ଯୋଗାଇ ଦିଆଯାଇଥିଲା।
ଏହି ବଣ୍ଟନ କାର୍ଯ୍ୟକ୍ରମରେ ନିସାନ ର ସମ୍ପାଦିକା ଶ୍ରୀମତୀ ସଂଜୁପ୍ରଭା ପାଣି ଏବଂ ଜିଲ୍ଲା ଶିଶୁ ସୁରକ୍ଷା ଅଧିକାରୀ ଶ୍ରୀଯୁକ୍ତ ଅରୁଣ କୁମାର ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।