ଭିଜିଲାନ୍ସ ଜାଲରେ ଗୋଲାମୁଣ୍ଡା ତହସିଲଦାର; ଡ୍ରାଇଭରଙ୍କ ସମେତ ଗିରଫ
କଳାହାଣ୍ଡି/ ଭବାନୀପାଟଣା /ରୋହିତ କୁମାର ନାଏକ (ଶାସକ ପ୍ରଶାସକ): ଦୁର୍ନୀତି ବିରୋଧରେ ଓଡ଼ିଶା ଭିଜିଲାନ୍ସର ଜୋରଦାର କାର୍ଯ୍ୟାନୁଷ୍ଠାନ। କୃଷି ଜମିକୁ ଘରବାଡ଼ି (ଘରୋଇ ବ୍ୟବହାରଯୋଗ୍ୟ) କିସମକୁ ପରିବର୍ତ୍ତନ କରିବା ସହ ସଂଶୋଧିତ ଜମି ପଟ୍ଟା (ROR) ପ୍ରଦାନ କରିବା ପାଇଁ ୧୨ ହଜାର ଟଙ୍କା ଲାଞ୍ଚ ଦାବି ଓ ଗ୍ରହଣ କରିବା ଅଭିଯୋଗରେ ଭିଜିଲାନ୍ସ ଜାଲରେ ପଡ଼ିଛନ୍ତି କଳାହାଣ୍ଡି ଜିଲ୍ଲା ଗୋଲାମୁଣ୍ଡା ତହସିଲଦାର ଚନ୍ଦନ କୁମାର ନାୟକ। ତାଙ୍କ ସହ ତାଙ୍କ ଡ୍ରାଇଭର ପଙ୍କଜ ସିପ୍କାଙ୍କୁ ମଧ୍ୟ ଭିଜିଲାନ୍ସ ଟିମ୍ ଧରିଛି।
ଚନ୍ଦନ କୁମାର ନାୟକ ୨୦୨୦ ବ୍ୟାଚ୍ର ସିଧାସଳଖ ନିଯୁକ୍ତିପ୍ରାପ୍ତ ଓଡ଼ିଶା ପ୍ରଶାସନିକ ସେବା (OAS) ଅଧିକାରୀ। ଗୁରୁବାର, ତା.୧୯.୧୧.୨୦୨୬ରେ ତାଙ୍କୁ ଲାଞ୍ଚ ଟଙ୍କା ଗ୍ରହଣ ଘଟଣାରେ ଭିଜିଲାନ୍ସ ଧରିଥିବା ସୂଚନା ମିଳିଛି।
ସୂଚନା ଅନୁଯାୟୀ, ଅଭିଯୋଗକାରୀ ଜଣକ ନିଜର କୃଷି ଜମିକୁ ଘରବାଡ଼ି କିସମକୁ ପରିବର୍ତ୍ତନ କରିବା ପାଇଁ ସରକାରଙ୍କ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ନିୟମ ଅନୁଯାୟୀ ୨୨ ଅକ୍ଟୋବର ୨୦୨୬ରେ ଅନଲାଇନ୍ରେ ଗୋଲାମୁଣ୍ଡା ତହସିଲଦାରଙ୍କ ନିକଟରେ ଆବେଦନ କରିଥିଲେ। ଏହାପରେ ସମ୍ପୃକ୍ତ ରାଜସ୍ୱ ନିରୀକ୍ଷକ (RI) ତଦନ୍ତ କରି ୨ ନଭେମ୍ବର ୨୦୨୬ରେ ଆବଶ୍ୟକ ରିପୋର୍ଟ ଓ ନକ୍ସା ତହସିଲଦାରଙ୍କ ନିକଟରେ ଦାଖଲ କରିଥିଲେ।
ତେବେ ତଦନ୍ତ ରିପୋର୍ଟ ଦାଖଲ ହେବା ସତ୍ତ୍ୱେ ତହସିଲଦାର ଫାଇଲ୍କୁ ଆଗକୁ ବଢ଼ାଇ ନଥିବା ଏବଂ ସଂଶୋଧିତ ରେକର୍ଡ ଅଫ୍ ରାଇଟ୍ସ (ROR) ପ୍ରଦାନ କରିବା ପାଇଁ ଅଭିଯୋଗକାରୀଙ୍କୁ ୧୦ ହଜାର ଟଙ୍କା ଦାବି କରିଥିବା ଅଭିଯୋଗ ହୋଇଛି। ଏଥିସହ ନିଜ ଡ୍ରାଇଭରଙ୍କ ପାଇଁ ଅତିରିକ୍ତ ୨ ହଜାର ଟଙ୍କା ମାଗିଥିବା ମଧ୍ୟ ଅଭିଯୋଗରେ ଦର୍ଶାଯାଇଛି।
ଏହି ବେଆଇନ ଅର୍ଥ ଦାବି ପୂରଣ କରିବାକୁ ଅସମର୍ଥ ହୋଇ ଅଭିଯୋଗକାରୀ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଅଭିଯୋଗ ଆଧାରରେ ଭିଜିଲାନ୍ସ ଟିମ୍ ଯୋଜନାବଦ୍ଧ ଭାବେ ଜାଲ ବିଛାଇଥିଲା। ଆଜି ତହସିଲଦାରଙ୍କ ନିର୍ଦ୍ଦେଶକ୍ରମେ ତାଙ୍କ ଡ୍ରାଇଭର ପଙ୍କଜ ସିପ୍କାଙ୍କ ଜରିଆରେ ଅଭିଯୋଗକାରୀଙ୍କଠାରୁ ୧୨ ହଜାର ଟଙ୍କା ଲାଞ୍ଚ ଗ୍ରହଣ କରାଯାଉଥିବା ସମୟରେ ଉଭୟଙ୍କୁ ଭିଜିଲାନ୍ସ ଟିମ୍ କାବୁ କରିଥିଲା।
ଭିଜିଲାନ୍ସ ପକ୍ଷରୁ ଲାଞ୍ଚ ବାବଦରେ ଦିଆଯାଇଥିବା ସମ୍ପୂର୍ଣ୍ଣ ୧୨ ହଜାର ଟଙ୍କା ଉଭୟଙ୍କ ନିକଟରୁ ଜବତ କରାଯାଇଛି।
ଏହି ଟ୍ରାପ୍ ପରେ ତହସିଲଦାର ଚନ୍ଦନ କୁମାର ନାୟକଙ୍କ ସହ ସମ୍ପୃକ୍ତ ଦୁଇଟି ସ୍ଥାନ ଏବଂ ଡ୍ରାଇଭର ପଙ୍କଜ ସିପ୍କାଙ୍କ ବାସଭବନରେ ଆୟବହିର୍ଭୂତ ସମ୍ପତ୍ତି (DA) ସମ୍ପର୍କିତ ଯାଞ୍ଚ ପାଇଁ ଏକକାଳୀନ ଚଢ଼ାଉ ଜାରି ରହିଛି।
ଏହି ଘଟଣାରେ କୋରାପୁଟ ଭିଜିଲାନ୍ସ ଥାନାରେ କେସ୍ ନମ୍ବର ୨୬/୨୦୨୬ ରୁଜୁ କରାଯାଇ ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ମାମଲା ଦାୟର ହୋଇଛି। ତହସିଲଦାର ଚନ୍ଦନ କୁମାର ନାୟକ ଓ ଡ୍ରାଇଭର ପଙ୍କଜ ସିପ୍କାଙ୍କ ବିରୋଧରେ ଭିଜିଲାନ୍ସର ତଦନ୍ତ ଜାରି ରହିଛି।
ସରକାରୀ କାର୍ଯ୍ୟାଳୟରେ ସାଧାରଣ ଲୋକଙ୍କ କାମ ପାଇଁ ଲାଞ୍ଚ ଦାବି ହେଉଥିବା ଅଭିଯୋଗ ପୁଣିଥରେ ପ୍ରଶାସନିକ ବ୍ୟବସ୍ଥାର ସ୍ୱଚ୍ଛତା ଓ ଉତ୍ତରଦାୟିତ୍ୱକୁ ନେଇ ପ୍ରଶ୍ନ ଉଠାଇଛି।