ଓଡ଼ିଶୀ ଓ ହସ୍ତତନ୍ତ ଶାଢ଼ିର ଐତିହ୍ୟକୁ ଫ୍ୟାଶନ୍ ମଞ୍ଚରେ ଉପସ୍ଥାପନ କଲା କଳାମନ୍ଦିର
ଭୁବନେଶ୍ୱର : ଓଡ଼ିଶାର ସମୃଦ୍ଧ ବୟନ ଐତିହ୍ୟ ଓ ପାରମ୍ପରିକ ଶାଢ଼ିର କାରୁକାର୍ଯ୍ୟକୁ ଫ୍ୟାଶନ୍ ମଞ୍ଚରେ ଉପସ୍ଥାପନ କରିଛି ପ୍ରତିଷ୍ଠିତ ବ୍ରାଣ୍ଡ୍ କଳାମନ୍ଦିର। ଭୁବନେଶ୍ୱରର ହୋଟେଲ୍ ମେଫେୟାର ସାଙ୍କ୍ଚୁଆରୀଠାରେ ଆୟୋଜିତ ଭୁବନେଶ୍ୱର ଟାଇମ୍ସ ଫ୍ୟାଶନ୍ ୱିକ୍ ୨୦୨୬ରେ କଳାମନ୍ଦିର ପକ୍ଷରୁ ଓଡ଼ିଶୀ ଶାଢ଼ି ସହ ଦେଶର ବିଭିନ୍ନ ଅଞ୍ଚଳର ପାରମ୍ପରିକ ହସ୍ତତନ୍ତ ଶାଢ଼ିର ଆକର୍ଷଣୀୟ ସଂଗ୍ରହ ପ୍ରଦର୍ଶିତ ହୋଇଥିଲା।
ଏହି ଫ୍ୟାଶନ୍ ସୋ’ରେ ଓଡ଼ିଶାର ପାରମ୍ପରିକ ବୁଣା ଶୈଳୀ, ସୂକ୍ଷ୍ମ କାରୁକାର୍ଯ୍ୟ, ନିଆରା ନକ୍ସା ଓ ବିବିଧ ରଙ୍ଗର ସମନ୍ୱୟ ଦର୍ଶକଙ୍କୁ ଆକର୍ଷିତ କରିଥିଲା। ପ୍ରତ୍ୟେକ ଶାଢ଼ିରେ ଓଡ଼ିଶାର ସମୃଦ୍ଧ ସାଂସ୍କୃତିକ ପରିଚୟ ଓ ପିଢ଼ି ପରେ ପିଢ଼ି ଧରି ବୁଣାକାରମାନେ ସଂରକ୍ଷଣ କରିଆସିଥିବା କଳାକୌଶଳର ଝଲକ ଦେଖିବାକୁ ମିଳିଥିଲା।
ପାରମ୍ପରିକ ହସ୍ତତନ୍ତ ଶାଢ଼ିକୁ ଆଧୁନିକ ଫ୍ୟାଶନ୍ ସହ ଯୋଡ଼ିବା ସହ ଦେଶୀୟ ବୟନକଳାର ସଂରକ୍ଷଣ ଓ ଏହାର ପ୍ରଚାର ପ୍ରସାର ଉପରେ ଏହି ପ୍ରଦର୍ଶନ ଗୁରୁତ୍ୱ ଦେଇଥିଲା। ଶାଢ଼ି କେବଳ ପୋଷାକ ନୁହେଁ, ବରଂ ପରମ୍ପରା, ସଂସ୍କୃତି ଓ କଳାତ୍ମକ ଉତ୍କର୍ଷର ପ୍ରତୀକ ବୋଲି ଏହି ଆୟୋଜନ ପ୍ରତିଫଳିତ କରିଥିଲା।
ଓଡ଼ିଶୀ ଓ ପାରମ୍ପରିକ ହସ୍ତତନ୍ତ ବିବାହ ଶାଢ଼ି କ୍ଷେତ୍ରରେ କଳାମନ୍ଦିରର ବଜାର ସ୍ଥିତି ଓ ନେତୃତ୍ୱକୁ ଏହି ପ୍ରଦର୍ଶନ ଆହୁରି ଉଜ୍ଜ୍ୱଳ କରିଥିଲା। ବିବାହ ଓ ଉତ୍ସବ ପାଇଁ ଆକର୍ଷଣୀୟ ସଂଗ୍ରହ ଉପଲବ୍ଧ କରାଇବା ସହ ଓଡ଼ିଶାର ବୟନ ଐତିହ୍ୟକୁ ଆଗକୁ ବଢ଼ାଇବା ପ୍ରତି କଳାମନ୍ଦିରର ପ୍ରତିବଦ୍ଧତା ଏଥିରେ ପ୍ରତିଫଳିତ ହୋଇଥିଲା।