ଚିତ୍ରଗୁପ୍ତ ପୂଜା ପାଇଁ କାୟସ୍ଥ-କରଣ ସମାଜର ପ୍ରସ୍ତୁତି ବୈଠକ

ନଭେମ୍ବର ୧୧ରେ କାଳୀ ମନ୍ଦିର ପରିସରରେ ପୂଜା, ନୂତନ କାର୍ଯ୍ୟକାରିଣୀ ଗଠନ ଉପରେ ଗୁରୁତ୍ୱ

ଝାରସୁଗୁଡ଼ା, ୧୧/୧୦: ଭଗବାନ ଶ୍ରୀ ଚିତ୍ରଗୁପ୍ତ ମହାରାଜଙ୍କ ପୂଜା ଆୟୋଜନ ଓ ସମାଜର ସାଂଗଠନିକ ବିକାଶକୁ ନେଇ ଝାରସୁଗୁଡ଼ା ଜିଲ୍ଲା କାୟସ୍ଥ-କରଣ ସମାଜର ଏକ ପ୍ରସ୍ତୁତି ବୈଠକ ସ୍ଥାନୀୟ ଏକ ହୋଟେଲରେ ଅନୁଷ୍ଠିତ ହୋଇଯାଇଛି। ସମାଜର ସଭାପତି ଡାକ୍ତର ଦିଲୀପ କୁମାର ପଟ୍ଟନାୟକଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଆଗାମୀ ପୂଜା ଉତ୍ସବର ଆୟୋଜନ ସହ ସମାଜର ଏକତା ଓ ସାମାଜିକ କାର୍ଯ୍ୟକଳାପକୁ ଅଧିକ ସକ୍ରିୟ କରିବା ଉପରେ ଆଲୋଚନା ହୋଇଥିଲା।

ବୈଠକରେ ସର୍ବସମ୍ମତିକ୍ରମେ ଆସନ୍ତା ନଭେମ୍ବର ୧୧ ତାରିଖରେ ସ୍ଥାନୀୟ କାଳୀ ମନ୍ଦିର ପରିସରରେ ଶ୍ରୀ ଚିତ୍ରଗୁପ୍ତ ମହାରାଜଙ୍କ ପୂଜାର୍ଚ୍ଚନା ଆୟୋଜନ କରିବାକୁ ସ୍ଥିର ହୋଇଛି। ଏଥିସହ ଜିଲ୍ଲା କାୟସ୍ଥ-କରଣ ସମାଜର ଏକ ନୂତନ କାର୍ଯ୍ୟକାରିଣୀ କମିଟି ଗଠନ ପାଇଁ ପ୍ରସ୍ତାବ ଗୃହୀତ ହୋଇଛି। ଜିଲ୍ଲାର ସମସ୍ତ କାୟସ୍ଥ ଓ କରଣ ସମାଜର ସଦସ୍ୟଙ୍କୁ ଏକତ୍ରିତ କରି ପୂଜା ଉତ୍ସବରେ ସାମିଲ କରିବା ସହ ସାମୂହିକ ଏକତାକୁ ସୁଦୃଢ଼ କରିବା ଉପରେ ମତପ୍ରକାଶ ପାଇଥିଲା।

ସେହିପରି ସମାଜର ମେଧାବୀ ଛାତ୍ରଛାତ୍ରୀ ଏବଂ ଶିକ୍ଷା, କ୍ରୀଡ଼ା ସମେତ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରି ସମାଜର ଗୌରବ ବୃଦ୍ଧି କରିଥିବା ପ୍ରତିଭାବାନ ପିଲାମାନଙ୍କୁ ସମ୍ମାନିତ କରିବା ପାଇଁ ମଧ୍ୟ ପ୍ରସ୍ତାବ ରଖାଯାଇଥିଲା। ସମାଜର ସାଂଗଠନିକ ଶକ୍ତି ବୃଦ୍ଧି, ପରସ୍ପର ମଧ୍ୟରେ ସମନ୍ୱୟ ରକ୍ଷା ଏବଂ ଭବିଷ୍ୟତରେ ବିଭିନ୍ନ ସାମାଜିକ କାର୍ଯ୍ୟକ୍ରମ ହାତକୁ ନେବା ସମ୍ପର୍କରେ ମଧ୍ୟ ବିଚାରବିମର୍ଶ କରାଯାଇଥିଲା। ଏହି ସମସ୍ତ ବିଷୟରେ ଆଗାମୀ ଅକ୍ଟୋବର ୨୩ ତାରିଖରେ ପରବର୍ତ୍ତୀ ବୈଠକ ଆୟୋଜନ କରିବାକୁ ନିଷ୍ପତ୍ତି ହୋଇଛି।

ଏହି ବୈଠକରେ ସମାଜର ସଭାପତି ଡାକ୍ତର ଦିଲୀପ କୁମାର ପଟ୍ଟନାୟକ, ମହାସଚିବ ପ୍ୟାରେ ଲାଲ ଶ୍ରୀବାସ୍ତବ, କାର୍ଯ୍ୟକାରିଣୀ ସଚିବ ପ୍ରବୀଣ ଶ୍ରୀବାସ୍ତବ, ପୂର୍ବତନ ମହାସଚିବ ଜୀବନ କୁମାର ମହାନ୍ତି, ଶିଶିର ରଞ୍ଜନ ପଟ୍ଟନାୟକ, ମହେନ୍ଦ୍ର ନାୟକ, କୋଷାଧ୍ୟକ୍ଷ ସନ୍ୟାସୀ ପଟ୍ଟନାୟକ, ନେତାଜୀ ପଟ୍ଟନାୟକ, ବରୁଣ ବୋହିଦାର, ଦୀପକ ପଟ୍ଟନାୟକ, ଦିବ୍ୟଚରଣ କୁମାର, କିଶୋର ଚନ୍ଦ୍ର ପଟ୍ଟନାୟକ, ନୀରଜ ଶ୍ରୀବାସ୍ତବ, ଅମରଜ୍ୟୋତିଙ୍କ ସମେତ ସମାଜର ବହୁ ସଦସ୍ୟ ଉପସ୍ଥିତ ଥିଲେ।