ପିଲାଦିନରୁ ହିଁ ଚରିତ୍ର ନିର୍ମାଣରେ ନୈତିକତା ଓ ପାରିବାରିକ ସଂସ୍କାରର ଭୂମିକା ଗୁରୁତ୍ୱପୂର୍ଣ୍ଣ
ଶ୍ରୀଜଗନ୍ନାଥ ସଂସ୍କୃତି ଓ ଶିଶୁ ସଂସ୍କାର ସମ୍ପର୍କରେ ବାଳ-ମୁକୁନ୍ଦ କେନ୍ଦ୍ରର ସଚେତନତା କାର୍ଯ୍ୟକ୍ରମ
ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଆଜି ସକାଳେ ସ୍ଥାନୀୟ ଡ଼. ସତ୍ୟନାରାୟଣ ରାଜଗୁରୁ ଉଚ୍ଚ ପ୍ରାଥମିକ ବିଦ୍ୟାଳୟ ଛାତ୍ରବାସ ପରିସରରେ ଏବଂ ଅପରାହ୍ନରେ ଗୋଷାଣି ବ୍ଲକ ଅନ୍ତର୍ଗତ ଡକ୍ଟର ବେଞ୍ଜରୀ ଗ୍ରାମର ଶବର ସମାଜ ସତସଙ୍ଗ ଗୃହରେ ବାଳ-ମୁକୁନ୍ଦ କେନ୍ଦ୍ର ତରଫରୁ ସ୍ୱତନ୍ତ୍ର ନୈତିକ ଶିକ୍ଷା ତଥା ସଂସ୍କାର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କେନ୍ଦ୍ରର ସଂଯୋଜକ ଶ୍ରୀ ନିତ୍ୟାନନ୍ଦ ଚୌଧୁରୀ ଏଥିରେ ମୁଖ୍ୟ ମାର୍ଗଦର୍ଶକ ଭାବେ ଯୋଗ ଦେଇଥିଲେ।
ଛାତ୍ରବାସରେ ଆୟୋଜିତ କାର୍ଯ୍ୟକ୍ରମରେ ଶ୍ରୀ ଚୌଧୁରୀ ‘ନୈତିକ ଶିକ୍ଷା ଗ୍ରହଣ ଓ ଦୈନନ୍ଦିନ ଜୀବନରେ ଏହାର ବ୍ୟବହାରିକ ପ୍ରୟୋଗ’ ଶୀର୍ଷକ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ ପୁସ୍ତକଗତ ଜ୍ଞାନ ସହ ସତ୍ଆଚରଣ , ସତ୍ୟବାଦିତା ଏବଂ କର୍ତ୍ତବ୍ୟନିଷ୍ଠା ଯୋଡ଼ି ହେଲେ ହିଁ ପ୍ରକୃତ ଚରିତ୍ର ଗଠନ ସମ୍ଭବ। ଏହି ଅବସରରେ ଛାତ୍ରଛାତ୍ରୀଙ୍କ ଏକାଗ୍ରତା ଓ ମାନସିକ ସ୍ଥିରତା ବୃଦ୍ଧି ପାଇଁ ଧ୍ୟାନ ଏବଂ ପ୍ରାଣାୟାମ ପ୍ରଶିକ୍ଷଣ ଦିଆଯାଇଥିଲା। ଏଥିସହ ପବିତ୍ର ଶ୍ରୀକୃଷ୍ଣ ଜନ୍ମାଷ୍ଟମୀର ଅଧର୍ମ ବିନାଶୀ ବାର୍ତ୍ତା ଏବଂ ଗୁରୁ ଦିବସର ତାତ୍ପର୍ଯ୍ୟ ସମ୍ପର୍କରେ ବିସ୍ତୃତ ଆଲୋଚନା ହୋଇଥିଲା।
ଅପରାହ୍ନରେ ଡକ୍ଟର ବେଞ୍ଜରୀ ଗ୍ରାମର ଶବର ସମାଜ ସତସଙ୍ଗ ଗୃହରେ ଅନୁଷ୍ଠିତ ବୈଠକରେ ଗ୍ରାମର ଅଭିଭାବକ ଓ ଗ୍ରାମବାସୀ ଏକତ୍ରିତ ହୋଇଥିଲେ। ଶ୍ରୀଜଗନ୍ନାଥ ସଂସ୍କୃତିରେ ଶବର ସମାଜର ମହାନ ଅବଦାନ ଓ ଭକ୍ତିର ଅନନ୍ୟ ଇତିହାସ ବିଷୟରେ ଶ୍ରୀ ଚୌଧୁରୀ ଆଲୋଚନା କରିଥିଲେ। ସେ ପ୍ରଭୁ ଶ୍ରୀକୃଷ୍ଣଙ୍କ ବାଳଲୀଳାର ମହତ୍ତ୍ୱ ବର୍ଣ୍ଣନା କରି କହିଥିଲେ ଯେ, ପରିବାର ହିଁ ଶିଶୁର ପ୍ରଥମ ବିଦ୍ୟାଳୟ। ତେଣୁ ବାଲ୍ୟକାଳରୁ ପିଲାମାନଙ୍କୁ ସଂସ୍କାରବାନ , ଧର୍ମପରାୟଣ ତଥା ଶୃଙ୍ଖଳିତ କରି ଗଢ଼ିତୋଳିବା ପାଇଁ ସେ ପିତାମାତାମାନଙ୍କୁ ଆହ୍ୱାନ ଜଣାଇଥିଲେ।
ଉଭୟ କାର୍ଯ୍ୟକ୍ରମରେ ଛାତ୍ରବାସର ଅନ୍ତେବାସୀ , ଗ୍ରାମବାସୀ ତଥା ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ରହି ସକ୍ରିୟ ସହଯୋଗ କରିଥିଲେ। ଶାନ୍ତି ପାଠ ପୂର୍ବକ ସଭା ସାଙ୍ଗ ହୋଇଥିଲା।