କେନ୍ଦୁଝରରେ ଖୁବଶୀଘ୍ର ଚଳାଚଳ କରିବ ବିଦ୍ୟୁତଚାଳିତ ବସ

କେନ୍ଦୁଝର: କେନ୍ଦୁଝର ଜିଲ୍ଲା ପ୍ରଶାସନ, କ୍ୟାପିଟାଲ ରିଜିଅନ୍ ଅର୍ବାନ୍ ଟ୍ରାନ୍ସପୋର୍ଟ (ସିଆରୟୁଟି) ସହିତ ମିଳିତ ଭାବରେ, ଜିଲ୍ଲାର ସହରାଞ୍ଚଳରେ ଗମନାଗମନ ସୁବିଧାକୁ ଆହୁରି ବୃଦ୍ଧି କରିବା ପାଇଁ ପରିବେଶ ଅନୁକୂଳ ଏକ ବୈଦ୍ୟୁତିକ ବସ ସେବା ଆରମ୍ଭ କରିବାକୁ ଯାଉଛି। ଏହି ସେବାକୁ ଆଗାମୀ ଦୁଇ ମାସ ମଧ୍ୟରେ କାର୍ଯ୍ୟକ୍ଷମ କରିବା ପାଇଁ ଯୋଜନା କରାଯାଇଛି, ଯାହା ଓଡ଼ିଶା ସରକାରଙ୍କ ‘ବିକଶିତ ଓଡ଼ିଶା’ ଦୃଷ୍ଟିକୋଣ ଅଧୀନରେ ସବୁଜ ପରିବହନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହି ପଦକ୍ଷେପର ଏକ ଅଂଶ ଭାବରେ,ବୈଦ୍ୟୁତିକ ବସ୍ ସେବାକୁ ଜିଲ୍ଲାରେ ସଫଳ କରିବା ପାଇଁ ଜିଲ୍ଲା ଖଣିଜ ପ୍ରତିଷ୍ଠାନ ସହାୟତାରେ ଆବଶ୍ୟକୀୟ ଭିତ୍ତିଭୂମି ଗୁଡିକର ବିକାଶ କରାଯିବ, ଯାହାର ପ୍ରମୁଖ ହବ୍ କେନ୍ଦୁଝର ଏବଂ ବଡ଼ବିଲ ମ୍ୟୁନିସିପାଲିଟି ବସଷ୍ଟାଣ୍ଡରେ ଅବସ୍ଥିତ। ପ୍ରକଳ୍ପର ପ୍ରଥମ ପର୍ଯ୍ୟାୟ ଅଧୀନରେ, ପ୍ରାୟ ୩୦ଟି ବୈଦ୍ୟୁତିକ ବସ୍ କ୍ରୟ ପାଇଁ ଯୋଜନା କରାଯାଇଛି ଏବଂ ଏହା ନିମ୍ନଲିଖିତ ପାଞ୍ଚଟି ପ୍ରମୁଖ ସ୍ଥାନ ମଧ୍ୟରେ ଚଳାଚଳ କରିବ:
୧. ଧରଣୀଧର ବିଶ୍ୱବିଦ୍ୟାଳୟ କ୍ୟାମ୍ପସ୍ – ବେବର୍ତ୍ତାପୋଷୀ
୨. ସାନଘାଘରା ପାର୍କ – ଚକ ଡ୍ୟାମ୍
୩. ଧରଣୀଧର ବିଶ୍ବବିଦ୍ୟାଳୟ କ୍ୟାମ୍ପସ୍ – ଜିଲ୍ଲା ମୁଖ୍ୟ ଚିକିତ୍ସାଳୟ
୪. କେନ୍ଦୁଝର ବସ୍ ଷ୍ଟାଣ୍ଡ – ବୋଦାପଳସା ବସ୍ ଷ୍ଟପ୍
୫. କେନ୍ଦୁଝର ବସ୍ ଷ୍ଟାଣ୍ଡ – ଝୁମ୍ପୁରା ବସ୍ ଷ୍ଟାଣ୍ଡ
ପ୍ରଥମ ପର୍ଯ୍ୟାୟର ସଫଳ କାର୍ଯ୍ୟାନ୍ୱୟନ ପରେ, ଦ୍ଵିତୀୟ ପର୍ଯ୍ୟାୟ ଅଧୀନରେ ଏହି ସେବାକୁ ଅନ୍ୟ ପ୍ରମୁଖ ସ୍ଥାନ ଗୁଡିକ ପର୍ଯ୍ୟନ୍ତ ବିସ୍ତାରିତ କରାଯିବ।ଏହି ପଦକ୍ଷେପର ଲକ୍ଷ୍ୟ ହେଉଛି ସ୍ୱଚ୍ଛ, ଦକ୍ଷ ଏବଂ ସୁଲଭ ସାର୍ବଜନୀନ ପରିବହନ ପ୍ରଦାନ କରିବା, ଜିଲ୍ଲାର କାର୍ବନ ନିର୍ଗମନ ହ୍ରାସ କରିବା ଏବଂ ସହରାଞ୍ଚଳର ଗତିଶୀଳତା ସହ ତାଳ ଦେଇ ସାର୍ବଜନୀନ ପରିବହନକୁ ଉନ୍ନତ କରିବା।
ରାଜ୍ୟ ସରକାରଙ୍କ ଦୃଷ୍ଟିକୋଣ ସହିତ ସମନ୍ୱୟ ରଖି କେନ୍ଦୁଝର ଜିଲ୍ଲା ପ୍ରଶାସନ ସ୍ଥାୟୀ ବିକାଶକୁ ପ୍ରୋତ୍ସାହିତ କରିବା ଏବଂ କେନ୍ଦୁଝର ଜିଲ୍ଲାବାସୀ ମାନଙ୍କ ପାଇଁ ସୁବିଧାଜନକ ପରିବହନ ଉପଲବ୍ଧତାକୁ ସୁନିଶ୍ଚିତ କରିବା ପାଇଁ ପ୍ରତିବଦ୍ଧ।