ବାତ୍ୟା ‘ଅର୍ଣ୍ଣବ’ର ପ୍ରଭାବ ମଧ୍ୟରେ ଟିପିଡବ୍ଲୁଓଡିଏଲ୍ ପକ୍ଷରୁ ୭.୬୨ ଲକ୍ଷରୁ ଅଧିକ ଉପଭୋକ୍ତାଙ୍କ ବିଦ୍ୟୁତ୍ ଯୋଗାଣକୁ ପୁନରୁଦ୍ଧାର କରାଗଲା
ଅକ୍ଟୋବର ୨୯ ଅପରାହ୍ଣ ୩ଟା ସୁଦ୍ଧା ପ୍ରାୟ ୯୧% ପୁନରୁଦ୍ଧାର କାର୍ଯ୍ୟ ସମ୍ପୂର୍ଣ୍ଣ;
ଦିନ ଶେଷ ସୁଦ୍ଧା ସମସ୍ତ ଅଞ୍ଚଳରେ ବିଦ୍ୟୁତ୍ ସେବା ସ୍ୱାଭାବିକ କରିବାକୁ ୪୧୦ ଜଣ କର୍ମଚାରୀ ନିୟୋଜିତ
ବୁର୍ଲା, ଅକ୍ଟୋବର ୨୯, ୨୦୨୬: ବାତ୍ୟା ‘ଅର୍ଣ୍ଣବ’ ଯୋଗୁଁ ବଲାଙ୍ଗୀର, ସୋନପୁର, ନୂଆପଡ଼ା ଓ କଳାହାଣ୍ଡି ଜିଲ୍ଲାରେ ବିଦ୍ୟୁତ୍ ସେବା ପ୍ରଭାବିତ ହୋଇଥିବା ୮,୩୮,୪୦୫ ଜଣ ଉପଭୋକ୍ତାଙ୍କ ମଧ୍ୟରୁ ୭,୬୨,୦୪୯ ଜଣଙ୍କ ଘରକୁ ବିଦ୍ୟୁତ୍ ଯୋଗାଣକୁ ଟିପି ୱେଷ୍ଟର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍ (ଟିପିଡବ୍ଲୁଓଡିଏଲ୍) ପକ୍ଷରୁ ପୁନରୁଦ୍ଧାର କରାଯାଇଅଛି । କମ୍ପାନୀ ପକ୍ଷରୁ ଅକ୍ଟୋବର ୨୯ ଅପରାହ୍ଣ ୩ଟା ସୁଦ୍ଧା ପ୍ରାୟ ୯୧% ପୁନରୁଦ୍ଧାର କାର୍ଯ୍ୟ ଶେଷ ହୋଇଥିବାବେଳେ, ଦିନ ଶେଷ ସୁଦ୍ଧା ସମସ୍ତ ପ୍ରଭାବିତ ଅଞ୍ଚଳରେ ବିଦ୍ୟୁତ୍ ସେବା ସ୍ୱାଭାବିକ କରିବା ପାଇଁ ୪୧୦ ଜଣ କର୍ମଚାରୀ ନିରନ୍ତର କାର୍ଯ୍ୟ କରୁଛନ୍ତି ।
ଅକ୍ଟୋବର ୨୮ ତାରିଖରୁ ବାତ୍ୟା ଓ ପ୍ରତିକୂଳ ପାଣିପାଗ ଯୋଗୁଁ ଏହି ଚାରିଟି ଜିଲ୍ଲାର ବିଦ୍ୟୁତ୍ ବିତରଣ ନେଟୱର୍କର ବିଭିନ୍ନ ସ୍ଥାନରେ ବିଦ୍ୟୁତ୍ ବିଭ୍ରାଟ ଦେଖାଦେଇଥିଲା । ଏହାର ମୁକାବିଲା ପାଇଁ ଟିପିଡବ୍ଲୁଓଡିଏଲ୍ ତୁରନ୍ତ କ୍ଷେତ୍ରୀୟ ଦଳଗୁଡ଼ିକୁ ନିୟୋଜିତ କରିବା ସହ କ୍ଷୟକ୍ଷତିର ଆକଳନ ଏବଂ ମରାମତି କାର୍ଯ୍ୟ ଆରମ୍ଭ କରିଥିଲା । ଯଥାଶୀଘ୍ର ଓ ସୁରକ୍ଷିତ ଭାବେ ବିଦ୍ୟୁତ୍ ଯୋଗାଣ ସ୍ୱାଭାବିକ କରିବା ଉପରେ କମ୍ପାନୀ ଗୁରୁତ୍ୱ ଦେଇଥିଲା ।
ଅକ୍ଟୋବର ୨୮ ମଧ୍ୟରାତ୍ରିରୁ ଅକ୍ଟୋବର ୨୯ ଅପରାହ୍ଣ ୩ଟା ପର୍ଯ୍ୟନ୍ତ ମିଳିଥିବା ତଥ୍ୟ ଅନୁଯାୟୀ, ପ୍ରଭାବିତ ୧୧୮ଟି ୩୩ କେଭି ଫିଡର୍ ମଧ୍ୟରୁ ୧୧୦ଟିରେ ବିଦ୍ୟୁତ୍ ଯୋଗାଣ ପୁନରୁଦ୍ଧାର ହୋଇସାରିଛି । ସେହିପରି, ପ୍ରଭାବିତ ୯୯୫ଟି ୧୧ କେଭି ଫିଡର୍ ମଧ୍ୟରୁ ୮୭୯ଟିକୁ କାର୍ଯ୍ୟକ୍ଷମ କରାଯାଇଛି । ପ୍ରଭାବିତ ୧୯ଟି ୩୩/୧୧ କେଭି ସବ୍ଷ୍ଟେସନ୍ ମଧ୍ୟରୁ ୧୪ଟିରେ ମଧ୍ୟ ବିଦ୍ୟୁତ୍ ସେବା ପୁନରୁଦ୍ଧାର ହୋଇଛି ।
ବାତ୍ୟା ଯୋଗୁଁ ୨୭,୮୩୦ଟି ବିତରଣ ଟ୍ରାନ୍ସଫର୍ମର ପ୍ରଭାବିତ ହୋଇଥିବାବେଳେ, ସେଥିମଧ୍ୟରୁ ୨୭,୧୮୫ଟିକୁ ପୁନର୍ବାର କାର୍ଯ୍ୟକ୍ଷମ କରାଯାଇଛି । ଏହା ବ୍ୟତୀତ ୧୧ଟି ବିଦ୍ୟୁତ୍ ଖୁଣ୍ଟ କ୍ଷତିଗ୍ରସ୍ତ ହୋଇଥିବା, ୩୪ଟି ସ୍ଥାନରେ ବିଦ୍ୟୁତ୍ ତାର ଛିଣ୍ଡିଥିବା ଏବଂ ପ୍ରାୟ ୪୩୦ ମିଟର ଲୋ-ଟେନ୍ସନ୍ (LT) କେବୁଲ୍ କ୍ଷତିଗ୍ରସ୍ତ ହୋଇଥିବା ରିପୋର୍ଟ ମିଳିଛି । ଏହି ସବୁ ସ୍ଥାନରେ ମରାମତି କାର୍ଯ୍ୟ ଜାରି ରହିଛି ।
ଟିପିଡବ୍ଲୁଓଡିଏଲ୍ର କଣ୍ଟ୍ରୋଲ୍ ରୁମ୍ଗୁଡ଼ିକ ପରିସ୍ଥିତି ଉପରେ ନିରନ୍ତର ନଜର ରଖିବା ସହ କ୍ଷେତ୍ରସ୍ତରୀୟ କର୍ମଚାରୀ, ସ୍ଥାନୀୟ ପ୍ରଶାସନ ଓ ଜରୁରୀକାଳୀନ ସେବା ସଂସ୍ଥାଗୁଡ଼ିକ ସହ ସମନ୍ୱୟ ରକ୍ଷା କରୁଛନ୍ତି । ସୁରକ୍ଷା ଉପକରଣ ଓ ଆବଶ୍ୟକ ମରାମତି ସାମଗ୍ରୀ ସହ କର୍ମଚାରୀମାନେ ଅବଶିଷ୍ଟ ଅଞ୍ଚଳରେ ବିଦ୍ୟୁତ୍ ଯୋଗାଣ ସ୍ୱାଭାବିକ କରିବା ପାଇଁ କାର୍ଯ୍ୟରତ ଅଛନ୍ତି ।
ବିଦ୍ୟୁତ୍ ଖୁଣ୍ଟ ଭାଙ୍ଗି ପଡ଼ିଥିଲେ, ତାର ଛିଣ୍ଡି ଯାଇଥିଲେ କିମ୍ବା ଅନ୍ୟ କୌଣସି ବିଦ୍ୟୁତ୍ ଉପକରଣ କ୍ଷତିଗ୍ରସ୍ତ ହୋଇଥିଲେ, ସେଥିଠାରୁ ଦୂରେଇ ରହିବାକୁ ଟିପିଡବ୍ଲୁଓଡିଏଲ୍ ପକ୍ଷରୁ ଜନସାଧାରଣଙ୍କୁ ଅନୁରୋଧ କରାଯାଇଅଛି । ଏପରି ସ୍ଥିତିରେ ନିଜେ ମରାମତି କରିବାକୁ ଚେଷ୍ଟା ନକରି କମ୍ପାନୀର ଅଧିକୃତ ଗ୍ରାହକ ସେବା ମାଧ୍ୟମରେ ସୂଚନା ଦେବାକୁ କୁହାଯାଇଛି ।
ବାତ୍ୟା ପରବର୍ତ୍ତୀ ପରିସ୍ଥିତିରେ ସମସ୍ତ ପ୍ରଭାବିତ ଉପଭୋକ୍ତାଙ୍କୁ ସୁରକ୍ଷିତ ଓ ନିର୍ଭରଯୋଗ୍ୟ ବିଦ୍ୟୁତ୍ ଯୋଗାଣକୁ ପୁନରୁଦ୍ଧାର କରିବା ପାଇଁ ଟିପିଡବ୍ଲୁଓଡିଏଲ୍ ସଦା ପ୍ରତିବଦ୍ଧ ରହିଛି ।