ନେପାଳ ପ୍ରଳୟଙ୍କରୀ ବିପର୍ଯ୍ୟୟ : ମୃତକଙ୍କ ସଦ୍ଗତି ଓ ବିଶ୍ୱ ଶାନ୍ତି ପାଇଁ ବାଳ-ମୁକୁନ୍ଦ କେନ୍ଦ୍ର ତରଫରୁ ସାମୂହିକ ପ୍ରାର୍ଥନା
ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ପଡ଼ୋଶୀ ରାଷ୍ଟ୍ର ନେପାଳରେ ଅକସ୍ମାତ ଘଟିଯାଇଥିବା ପ୍ରଳୟଙ୍କରୀ ପ୍ରାକୃତିକ ବିପର୍ଯ୍ୟୟରେ ପ୍ରାଣ ହରାଇଥିବା ଶତାଧିକ ନିରୀହ ଲୋକଙ୍କ ଆତ୍ମାର ସଦ୍ଗତି ତଥା ସମଗ୍ର ମାନବ ଜାତିର ସୁରକ୍ଷା ପାଇଁ ପାରଳାଖେମୁଣ୍ଡି ସହରର ବିଭିନ୍ନ ଅନୁଷ୍ଠାନରେ ସାମୂହିକ ପ୍ରାର୍ଥନା ଅନୁଷ୍ଠିତ ହୋଇଯାଇଛି।
ବିନା କୌଣସି ପୂର୍ବ ସୂଚନାରେ ଆସିଥିବା ଏହି ଭୟଙ୍କର ବନ୍ୟା ଓ ଭୂସ୍ଖଳନର ପ୍ରବାହିତ ସ୍ରୋତ କଂକ୍ରିଟ୍ ପୋଲ ସମେତ ଗାଁ ଗଣ୍ଡାକୁ କିଛି ମିନିଟ୍ ମଧ୍ୟରେ ଧ୍ୱଂସ କରିଦେଇଛି , ଯାହା ସମଗ୍ର ବିଶ୍ୱବାସୀଙ୍କୁ ଗଭୀର ମର୍ମାହତ କରିଛି। ଏହି ଦୁଃଖଦ ଘଟଣାରେ ପ୍ରାଣ ହରାଇଥିବା ଆତ୍ମାଙ୍କ ଶାନ୍ତି ନିମନ୍ତେ ପ୍ରବଚକ ସ୍ୱାମୀ ମୁକୁନ୍ଦାନନ୍ଦଜୀଙ୍କ ଆହ୍ୱାନ କ୍ରମେ ବାଳ-ମୁକୁନ୍ଦ କେନ୍ଦ୍ରର ସଂଯୋଜକ ଶ୍ରୀ ନିତ୍ୟାନନ୍ଦ ଚୌଧୁରୀଙ୍କ ନେତୃତ୍ୱରେ ଏକ ବିଶେଷ ପ୍ରାର୍ଥନା ସଭା ଆୟୋଜିତ ହୋଇଥିଲା।
ସ୍ଥାନୀୟ ‘ନବ ଜୀବନ ଟ୍ରଷ୍ଟ’ (ଅନାଥ ବାଳିକା ଆଶ୍ରମ), ଆର୍ବାନ୍ ହଷ୍ଟେଲ, ଡ଼ଃ ସତ୍ୟନାରାୟଣ ରାଜଗୁରୁ ଉଚ୍ଚ ପ୍ରାଥମିକ ବିଦ୍ୟାଳୟ ଏବଂ ମହାରାଜା ବାଳକ ଉଚ୍ଚ ବିଦ୍ୟାଳୟର ଛାତ୍ରବାସ ପରିସରରେ କୋମଳମତି ଶିଶୁ ଓ ଛାତ୍ରଛାତ୍ରୀମାନେ ନୀରବ ପ୍ରାର୍ଥନା ଓ ଶାନ୍ତି ପାଠ କରିଥିଲେ। ଦୁର୍ଘଟଣାରୁ ବର୍ତ୍ତିଯାଇ କଷ୍ଟ ଭୋଗୁଥିବା ଏବଂ ନିଜ ଆତ୍ମୀୟସ୍ୱଜନଙ୍କୁ ହରାଇଥିବା ପରିବାରଗୁଡ଼ିକୁ ଏହି ବିପଦର ମୁକାବିଲା କରିବା ପାଇଁ ଈଶ୍ୱର ଧୈର୍ଯ୍ୟ ପ୍ରଦାନ କରନ୍ତୁ ବୋଲି ସମସ୍ତେ ପ୍ରାର୍ଥନା କରିଥିଲେ। ଏଥିସହ ପ୍ରତିକୂଳ ପରିସ୍ଥିତିରେ ଲୋକଙ୍କ ଜୀବନ ରକ୍ଷା କରୁଥିବା ଉଦ୍ଧାରକାରୀ ଦଳ , ସେନାବାହିନୀ ଓ ପ୍ରଶାସନର ଅକ୍ଳାନ୍ତ ପ୍ରୟାସକୁ ଶ୍ରଦ୍ଧା ଓ କୃତଜ୍ଞତା ଜଣାଯାଇଥିଲା।
ମାନବତା ପ୍ରକୃତି ମାତାର ସଙ୍କେତଗୁଡ଼ିକୁ ଧ୍ୟାନ ଦେବାର ସମୟ ଆସିଛି। ଏହିପରି ବିପର୍ଯ୍ୟୟ ପଛରେ ଅନେକ ଜଟିଳ କାରଣ ରହିଛି। ସମସ୍ତ ଦିଗ ଏବଂ ପ୍ରଭାବରେ ଆମର ନିଜସ୍ୱ ବ୍ୟକ୍ତିଗତ ଦାୟିତ୍ୱ ଉପରେ ପ୍ରତିଫଳନ କରିବା ହେଉଛି ପ୍ରକୃତ ପରିବର୍ତ୍ତନ ଆରମ୍ଭ ହୁଏ – ଅନ୍ୟଥା , ଦୋଷ ଖେଳ କେବେ ଶେଷ ହୁଏ ନାହି।
ଏହା ଆଗାମୀ ପିଢ଼ି ପାଇଁ ଏକ ସୁରକ୍ଷିତ , ସ୍ଥାୟୀ ଭବିଷ୍ୟତ ବିଷୟରେ ପ୍ରକୃତରେ ଚିନ୍ତା କରୁଥିବା ଯେକୌଣସି ବ୍ୟକ୍ତିଙ୍କ ପାଇଁ ଏକ ଜାଗ୍ରତ ଆହ୍ବାନ।