ଝାରସୁଗୁଡା, ରବିବାର: ଜିଲ୍ଲାରେ ଅବୈଧ ଭାବେ ଫ୍ଲାଇଏଶ ଡମ୍ପିଂକୁ ରୋକିବା ପାଇଁ ଆଜି ଜିଲ୍ଲାପାଳ କୁଣାଲ ମୋତିରାମ ଚୌହାଣଙ୍କ ଅଧ୍ୟକ୍ଷତାରେ ଡିଏମ୍ ଅଫିସ ସମ୍ମିଳନୀ କକ୍ଷରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ବୈଠକରେ ପରିବେଶ ସୁରକ୍ଷା, ସାର୍ବଜନୀନ ସ୍ୱାସ୍ଥ୍ୟ ଓ ଅଞ୍ଚଳର ସ୍ୱଚ୍ଛତାକୁ ଦୃଷ୍ଟିରେ ରଖି ଅବୈଧ ଫ୍ଲାଇଏଶ ପରିଚାଳନା ବିରୋଧରେ କଠୋର ପଦକ୍ଷେପ ନେବାକୁ ସିଦ୍ଧାନ୍ତ ଗ୍ରହଣ କରାଯାଇଛି।
ଜିଲ୍ଲାପାଳ ଶ୍ରୀ ଚୌହାଣ ବୈଠକରେ କହିଥିଲେ ଯେ, ଜିଲ୍ଲାର ବିଭିନ୍ନ ସ୍ଥାନରେ କିଛି ଅସାଧୁ ବ୍ୟକ୍ତି ଓ ସଂସ୍ଥାମାନେ ଅବୈଧ ଭାବେ ଫ୍ଲାଇଏଶ ଡମ୍ପିଂ କରୁଥିବାରୁ ପରିବେଶ ଓ ସାଧାରଣ ଲୋକଙ୍କ ସ୍ୱାସ୍ଥ୍ୟ ପାଇଁ ଗଭୀର ବିପଦ ସୃଷ୍ଟି ହେଉଛି। ଏହାକୁ ରୋକିବା ପାଇଁ ଜିଲ୍ଲା ସ୍ତରରେ 24×7 କାର୍ଯ୍ୟକ୍ଷମ ବିଶେଷ ଟାସ୍କ ଫୋର୍ସ ଗଠନ କରାଯିବ ବୋଲି ସେ ଘୋଷଣା କରିଛନ୍ତି।
ଏହି ଟାସ୍କ ଫୋର୍ସରେ ପୋଲିସ ବିଭାଗ, ପ୍ରଦୂଷଣ ନିୟନ୍ତ୍ରଣ ବୋର୍ଡ, ରେଭେନ୍ୟୁ ବିଭାଗ ଓ ବିଭିନ୍ନ ଶିଳ୍ପ ସଂସ୍ଥାର ପ୍ରତିନିଧିମାନେ ସମ୍ମିଳିତ ହେବେ। ସେମାନେ ଦିନ-ରାତି ପ୍ରହରା ଦେଇ ଅବୈଧ ଡମ୍ପିଂ କାର୍ଯ୍ୟକୁ ଚିହ୍ନଟ କରି ତତ୍କ୍ଷଣାତ୍ କାନୁନଗତ ପଦକ୍ଷେପ ଗ୍ରହଣ କରିବେ।
ସେହିପରି, ଫ୍ଲାଇଏଶ ପରିବହନ କରୁଥିବା ସମସ୍ତ ଯାନବାହନକୁ ନିୟମିତ ନିରୀକ୍ଷଣ କରାଯିବା ସହ ନିୟମ ଉଲ୍ଲଂଘନ କଲେ କଠୋର ଜରିମାନା ଓ ଆଇନଗତ କାର୍ଯ୍ୟନୁଷ୍ଠାନ ନେବାକୁ ନିର୍ଦ୍ଦେଶ ଦିଆଯାଇଛି।
ବୈଠକରେ ସମସ୍ତ ସମ୍ପର୍କିତ ବିଭାଗଙ୍କୁ ସମନ୍ୱୟ ସହ କାମ କରିବା ସହ ଲୋକମାନଙ୍କ ମଧ୍ୟରେ ସଚେତନତା ବଢ଼ାଇବାକୁ ଆହ୍ୱାନ କରାଯାଇଛି। ସାଧାରଣ ଲୋକଙ୍କୁ ମଧ୍ୟ ଅବୈଧ ଫ୍ଲାଇଏଶ ଡମ୍ପିଂ ସମ୍ବନ୍ଧରେ ସୂଚନା ଦେଇ ପ୍ରଶାସନକୁ ସହଯୋଗ କରିବାକୁ ଅନୁରୋଧ କରାଯାଇଛି।
ଜିଲ୍ଲା ପ୍ରଶାସନ ଝାରସୁଗୁଡାକୁ ପରିବେଶମୂଳକ ଭାବରେ ସୁସ୍ଥ ଓ ସୁଚିତ୍ର ଜିଲ୍ଲାରେ ପରିଣତ କରିବା ପାଇଁ ପ୍ରତିବଦ୍ଧ ବୋଲି ଜଣାଇଛି।