ଝାରସୁଗୁଡ଼ା, : କୋଲାବିରା ତହସିଲ ଅଧୀନ ବଡବାହାଲ ଅଞ୍ଚଳରେ ପ୍ରସ୍ତାବିତ ଏକ ମଦ୍ରାସା ସ୍ଥାପନକୁ ନେଇ ସ୍ଥାନୀୟ ଗ୍ରାମବାସୀ ଓ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ବିରୋଧ ଦେଖାଦେଇଛି। ଏହି ପ୍ରସଙ୍ଗରେ ଶନିବାର ଦିନ ଅଞ୍ଚଳର ବିଭିନ୍ନ ଗ୍ରାମବାସୀ କୋଲାବିରା ତହସିଲଦାରଙ୍କ ନାମରେ ଏକ ଅଭିଯୋଗ ପତ୍ର ଦାଖଲ କରିଛନ୍ତି।
ଅଭିଯୋଗ ଅନୁଯାୟୀ, ଏକ ନିର୍ଦ୍ଦିଷ୍ଟ ଟ୍ରଷ୍ଟ ପକ୍ଷରୁ ବଡବାହାଲ ଅଞ୍ଚଳରେ ଧର୍ମୀୟ ଶିକ୍ଷାନୁଷ୍ଠାନ ଭାବେ ମଦ୍ରାସା ସ୍ଥାପନ ପାଇଁ ପ୍ରଶାସନିକ ଅନୁମତି ପ୍ରକ୍ରିୟା ଆରମ୍ଭ କରାଯାଇଛି। କିନ୍ତୁ ସ୍ଥାନୀୟ ଲୋକଙ୍କ ମତାମତ ଅନୁସାରେ, ଏହି ଅଞ୍ଚଳରେ ସମ୍ପୃକ୍ତ ସମ୍ପ୍ରଦାୟର ଜନସଂଖ୍ୟା ନିମ୍ନ ଥିବାରୁ ଏପରି ଏକ ପ୍ରତିଷ୍ଠାନର ଆବଶ୍ୟକତା ନାହିଁ।
ଗ୍ରାମବାସୀମାନେ ଏହା ମଧ୍ୟ ଆଶଙ୍କା ପ୍ରକାଶ କରିଛନ୍ତି ଯେ, ମଦ୍ରାସା ସ୍ଥାପନ ପ୍ରୟାସ ପଛରେ ଥିବା କିଛି ବ୍ୟକ୍ତିଙ୍କ ପୃଷ୍ଠଭୂମି ସନ୍ଦେହଜନକ ଥିବାରୁ ଏହା ଅଞ୍ଚଳର ଶାନ୍ତି ଓ ସାମ୍ପ୍ରଦାୟିକ ସମ୍ମିଳନକୁ ବ୍ୟାହତ କରିପାରେ। ସେମାନଙ୍କ କହିବା ଅନୁସାରେ, ଯଦି ସ୍ଥାନୀୟ ଲୋକଙ୍କ ଇଚ୍ଛା ବିପରୀତ ଭାବେ ଏହି ପ୍ରକଳ୍ପକୁ ଆଗକୁ ବଢ଼ାଯାଏ, ତେବେ ଭବିଷ୍ୟତରେ ଆଇନ-ଶୃଙ୍ଖଳା ସମସ୍ୟା ସହ ସାମ୍ପ୍ରଦାୟିକ ଉତ୍ତେଜନା ସୃଷ୍ଟି ହେବାର ଆଶଙ୍କା ରହିଛି।
ସମାସିଂହା ପ୍ରଗତି ସଂଘ ପକ୍ଷରୁ ଦାଖଲ ହୋଇଥିବା ଏହି ଅଭିଯୋଗ ପତ୍ର ତହସିଲଦାରଙ୍କ ଅନୁପସ୍ଥିତିରେ ଅତିରିକ୍ତ ତହସିଲଦାର କୌଶିକ ମେହେରଙ୍କୁ ପ୍ରଦାନ କରାଯାଇଥିଲା। ଏହି ସମୟରେ ସଂଘର ସଭାପତି ଆଇନଜୀବୀ ମନୋଜ କୁମାର କାଲୋ, ସମ୍ପାଦକ ପ୍ରକାଶ କୁମାର ସାହୁ, ପୂର୍ବତନ ସରପଞ୍ଚ ଦୁଲାରାମ ସେନାପତି ଓ କରୁଣାକର ସେଟ, ଗ୍ରାମ୍ୟ ଉନ୍ନୟନ କମିଟି ସଭାପତି ବୀରେନ୍ଦ୍ର କୁମାର ମହାପାତ୍ର, ସମାଜସେବୀ ଦ୍ଵିବେନ୍ଦୁ ଦାସ, ଯୋଗେଶ୍ୱର ସେନାପତି, ରିତେଶ ସାହୁ, ବରିଷ୍ଠ ନାଗରିକ ମଦନ ମୋହନ ପଟେଲ, ଅବସରପ୍ରାପ୍ତ ଶିକ୍ଷା ଅଧିକାରୀ ତୁଲେଶ୍ୱର ପଟେଲ ଓ ସୁନନ୍ଦ ପଟେଲ ସହ ଅନେକ ଲୋକ ଉପସ୍ଥିତ ଥିଲେ।
ଗ୍ରାମବାସୀମାନେ ପ୍ରଶାସନଙ୍କୁ ପ୍ରକଳ୍ପ ସମ୍ପର୍କିତ ପାଣ୍ଠିର ଉତ୍ସ, ଟ୍ରଷ୍ଟ ସଦସ୍ୟମାନଙ୍କ ପୃଷ୍ଠଭୂମି ଓ ପ୍ରକୃତ ଆବଶ୍ୟକତା ବିଷୟରେ ନିରପେକ୍ଷ ତଦନ୍ତ କରିବାକୁ ଦାବି କରିଛନ୍ତି। ତଦନ୍ତ ସମାପ୍ତ ହେବା ପର୍ଯ୍ୟନ୍ତ ମଦ୍ରାସା ସମ୍ପର୍କିତ ସମସ୍ତ ଅନୁମତି ପ୍ରକ୍ରିୟାକୁ ସ୍ଥଗିତ ରଖିବା ପାଇଁ ମଧ୍ୟ ଅନୁରୋଧ କରାଯାଇଛି।
ଏହି ବିରୋଧ ଅଭିଯାନକୁ ଗ୍ରାମ୍ୟ ଉନ୍ନୟନ କମିଟି, ସହିଦ ଭଗତ ସିଂ କ୍ଲବ ଓ ସହିଦ ବୀର କରୁଣାକର ସିଂହ ନାଏକ ସ୍ମୃତି ଟ୍ରଷ୍ଟ ପକ୍ଷରୁ ସମର୍ଥନ ମିଳିଛି।
ଏପରିକି, ଅତିରିକ୍ତ ତହସିଲଦାର କୌଶିକ ମେହେର କହିଛନ୍ତି ଯେ ଅଭିଯୋଗ ପତ୍ର ଗ୍ରହଣ କରାଯାଇଛି ଓ ଏହା ସମ୍ବନ୍ଧରେ ତହସିଲଦାରଙ୍କୁ ଅବଗତ କରାଯାଇ ଆବଶ୍ୟକିୟ ପଦକ୍ଷେପ ଗ୍ରହଣ କରାଯିବ।
