ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ଗୁଣ୍ଡିଚା ବାଡି ପଡିଆ ଠାରେ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ଜିଲ୍ଲାସ୍ତରୀୟ ସାଇବର ସୁରକ୍ଷା ଅଭିଯାନ - ୨୦୨୫ ର ଉଦଘାଟନୀ ସମାରୋହ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।
ଏହି କାର୍ଯ୍ୟକ୍ରମରେ ମୁଖ୍ୟତଃ ଗଜପତି ଜିଲ୍ଲା ପୋଲିସ ପ୍ରଶାସନଙ୍କ ପ୍ରସ୍ତୁତ ଯୋଜନା ପ୍ରକାରେ ଉପସ୍ଥିତ ସମସ୍ତଙ୍କୁ ଅନଲାଇନ୍ ସୁରକ୍ଷା , ଠକେଇ ନିବାରଣ ଏବଂ ଜନସଚେତନତା ଉପରେ ଏବଂ ଏ ଦିଗରେ କଣ ସବୁ ପଦକ୍ଷେପ ରହିଛି , ସେ ସମ୍ପର୍କରେ ଉପସ୍ଥିତ ସମସ୍ତଙ୍କୁ ଜଣାଇବା ତାହାହିଁ ଏହି କାର୍ଯ୍ୟକ୍ରମର ମୁଖ୍ୟ ଆଭିମୁଖ୍ୟ ରହିଛି।
ଏହି ଅବସରରେ ଅନୁଷ୍ଠିତ ଏକ ସଚେତନତା ସଭା କାର୍ଯ୍ୟକ୍ରମରେ ଜିଲ୍ଲାପାଳ ଶ୍ରୀମତୀ ମଧୁମିତା ମୁଖ୍ୟଅତିଥି ଭାବେ ଯୋଗ ଦେଇ ଡିଜିଟାଲ ଯୁଗରେ ସାଇବର ଅପରାଧୀ ମାନେ ବେଶ ଚତୁର ହୋଇ ସେମାନଙ୍କ ଅପରାଧର କାୟା ବିସ୍ତାର କରି ଚାଲିଛନ୍ତି । ନିରୀହ ତଥା ଅସଚେତନ ଯୁବକ ଯୁବତୀ ଓ ବୟସ୍କ ଲୋକ ମାନଙ୍କୁ ମୋବାଇଲ ଫୋନ୍ ମାଧ୍ୟମରେ ବିଭିନ୍ନ ଉପାୟରେ ବିଭିନ୍ନ ମିଥ୍ୟା ପ୍ରଲୋଭନ ଦେଖାଇ ଠକିବାରେ ସଫଳ ହେଉଛନ୍ତି । ଏ ସବୁ ପ୍ରତି ସମସ୍ତେ ସଚେତନ ସାବଧାନତା ହେଲେ ଏବଂ ମୋବାଇଲ ଫୋନ୍ ର ଉଚିତ୍ ବ୍ୟବହାର କଲେ ସାଇବର ଅପରାଧୀ ମାନଙ୍କ ମିଥ୍ୟା ପ୍ରଲୋଭନ ଓ ଠକାମିର ଶିକାର ହେବେ ନାହିଁ ବୋଲି କହିଥିଲେ।
ଗଜପତି ଜିଲ୍ଲା ଆରକ୍ଷୀ ଅଧିକ୍ଷକ ଶ୍ରୀ ଯତୀନ୍ଦ୍ର କୁମାର ପଣ୍ଡା କାର୍ଯ୍ୟକ୍ରମରେ ସଭାପତିତ୍ବ କରି କାର୍ଯ୍ୟକ୍ରମର ଆଭିମୁଖ୍ୟ ସମ୍ପର୍କରେ କହି ସାଇବର ଅପରାଧ କଣ ଓ କେମିତି ହୋଇଥାଏ , ଲୋକେ କିଭଳି ସେମାନଙ୍କ ମିଥ୍ୟା ପ୍ରଲୋଭନ କଥାରେ ପଡି ନିଜର କଷ୍ଟ ଉପାର୍ଜିତ ଧନ ହରାଇ ବସିଥାନ୍ତି ଏବଂ ଏଥି ପ୍ରତି କିଭଳି ସଚେତନ ହେବା ଆବଶ୍ୟକତା ରହିଛି , ସେ ସମ୍ପର୍କରେ ବିଭିନ୍ନ ଉଦାହରଣ ସବୁ ଦେଇ ଉପସ୍ଥିତ ଜନସାଧାରଣଙ୍କୁ ସଚେତନ କରାଇଥିଲେ।
ଅନ୍ୟମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ ୟୁନିଅନ ବ୍ୟାଙ୍କ ର ରେଜିଓନାଲ ଉପନିର୍ଦ୍ଦେଶକ ଆର୍.ସାରକା , ବନଖଣ୍ଡ ଅଧିକାରୀ , ପାରଳାଖେମୁଣ୍ଡି କେ. ନାଗାରାଜୁ , ଜିଲ୍ଲା ଶିକ୍ଷାଧିକାରୀ ଡ଼.ମାୟାଧର ସାହୁ , ଶ୍ରୀ କୃଷ୍ଣଚନ୍ଦ୍ର ଗଜପତି ସ୍ୱୟଂ ଶାସିତ ମହାବିଦ୍ୟାଳୟ ର ଅଧ୍ୟକ୍ଷ ରାଧାକାନ୍ତ ଭୂୟାଁ , ମହିଳା ମହାବିଦ୍ୟାଳୟର ଅଧ୍ୟକ୍ଷ ଡ଼. ମହେନ୍ଦ୍ର ଏବଂ ସେଞ୍ଚୁରିଆନ ବିଶ୍ଵ ବିଦ୍ୟାଳୟର ନିର୍ଦ୍ଦେଶକ ଡ଼.ଦୁର୍ଗା ପ୍ରାସାଦ ପାଢ଼ୀ ପ୍ରମୁଖ ମଞ୍ଚାସୀନ ଅତିଥି ଭାବେ ଯୋଗଦେଇ ସାଇବର ଠକେଇ , ସାଇବର ଅପରାଧୀ , ସାଇବର ସଚେତନତା ଓ ସୁରକ୍ଷା ଉପାୟର ବିଭିନ୍ନ ଦିଗ ଉପରେ କହିଥିଲେ।
ସାଇବର ଅପରାଧକୁ ରୋକିବା ପାଇଁ ସମାଜ ପାଇଁ ଏକ ବଡ଼ ଚ୍ୟାଲେଞ୍ଜ ହୋଇ ପଡ଼ିଥିବା ବେଳେ ଏ ଦିଗରେ ସଚେତନତା ହେଉଛି ସବୁଠାରୁ ଏକ ବଡ଼ ଶକ୍ତିଶାଳୀ ଅସ୍ତ୍ର ।
ବିଶ୍ବରେ ଇଣ୍ଟରନେଟ ବ୍ୟବହାର କ୍ଷେତ୍ରରେ ଭାରତର ସ୍ଥାନ ଦ୍ଵିତୀୟରେ ରହିଥିବା ବେଳେ ଆମ ଦୈନନ୍ଦିନ ଜୀବନରେ ସମସ୍ତେ ଡିଜିଟାଲ ବ୍ୟବସ୍ଥା ସହିତ ସମ୍ପୂର୍ଣ୍ଣ ଭାବେ ନିର୍ଭରଶୀଳ ହୋଇ ପଡିଛନ୍ତି। ଯାହାଫଳରେ ଏହି ଇଣ୍ଟରନେଟ ଓ ଟେକ୍ନୋଲୋଜି ଆମ ସମସ୍ତଙ୍କ ପାଇଁ ଏକ ଅପରିହାର୍ଯ୍ୟ ହୋଇପଡିଛି। ବର୍ତ୍ତମାନ୍ ଯୁଗରେ ଇଣ୍ଟରନେଟ ବ୍ୟବହାରକାରୀ ମାନଙ୍କୁ ସାଇବର ଅପରାଧ ଓ ଅନଲାଇନ୍ ଠକେଇ ଭଳି ଅପରାଧର ଘୋର ଶିକାର ହେବାକୁ ପଡୁଛି। ସାଇବର ଅପରାଧ ଦୃତ ଗତିରେ ଘଟୁଥିବା ଯୋଗୁଁ ଇଣ୍ଟରନେଟ ବ୍ୟବହାର କରୁଥିବା ପ୍ରତ୍ୟେକ ବ୍ୟକ୍ତି ଅତ୍ୟନ୍ତ ସତର୍କ ତାର ସହ ଏହାକୁ ପରିଚାଳନା କରିବାକୁ ପଡ଼ିବ , କାରଣ ସାଇବର ଅପରାଧ ବିଶ୍ୱର ଯେ କୌଣସି ସ୍ଥାନରୁ ଅପରାଧୀ ମାନେ ନିୟନ୍ତ୍ରଣ କରୁଥିବା ଯୋଗୁଁ ଏହା ସମାଜ ପାଇଁ ଏକ ବଡ଼ ଆହ୍ବାନ ତଥା ଚ୍ୟାଲେଞ୍ଜ।
ତେଣୁକରି ଏ ଦିଗରେ ସମ୍ପୂର୍ଣ୍ଣ ଭାବେ ସମସ୍ତେ ସଚେତନ ଓ ସତର୍କ ରହିବା ସହ କିଛି ଯଦି ଘଟିଯାଏ ତା ହେଲେ ତୁରନ୍ତ ପୋଲିସ ଓ ସାଇବର ଥାନାର ସହାୟତା ନେବାକୁ ଅନୁରୋଧ କରାଯାଇଛି।
ସାଇବର ବିଶେଷଜ୍ଞ ଡକ୍ଟର ଡି. ଈଶ୍ୱର ରାଓ କହିଛନ୍ତି ଯେ ଯେଉଁମାନେ ସାଇବର ଠକେଇର ଶିକାର ହୋଇଛନ୍ତି ସେମାନେ ତୁରନ୍ତ ଟୋଲ୍-ଫ୍ରି ନମ୍ବର 1930 ରେ କଲ୍ କରି ଅଭିଯୋଗ କରିବା ଉଚିତ।
ଏହି ଅବସରରେ ସାଇବର ସୁରକ୍ଷା ସନ୍ଦେଶର ପ୍ରଚାର ପାଇଁ ସାଇବର ମାସକଟ ଉପସ୍ଥିତ ଥିଲେ।
ଏହି ଉଦଘାଟନୀ ସମାରୋହର ସଚେତନତା ସଭା କାର୍ଯ୍ୟକ୍ରମକୁ ହାବିଲଦାର ଶ୍ରୀ କନ୍ଦର୍ପ ପାତ୍ର ସଞ୍ଚାଳନ ତଥା ପରିଚାଳନା କରିଥିବା ବେଳେ ସମସ୍ତ କାର୍ଯ୍ୟକ୍ରମକୁ ପାରଳା ଆଦର୍ଶ ଥାନାର ଥାନାଧିକାରୀ ଶ୍ରୀ ପ୍ରଶାନ୍ତ କୁମାର ଭୂପତି ଓ ଏସଡିପିଓ ଶ୍ରୀ ମାଧବାନନ୍ଦ ନାୟକ ପରିଚାଳନା କରିଥିଲେ ଏବଂ ଶେଷରେ ଡିଏସପି (ହେଡକ୍ୱାଟର) ଶ୍ରୀ ଅମିତାଭ ପଣ୍ଡା ଉପସ୍ଥିତ ସମସ୍ତଙ୍କୁ ଧନ୍ୟବାଦ୍ ଅର୍ପଣ କରିଥିଲେ ।
ଏହି କାର୍ଯ୍ୟକ୍ରମରେ ଜିଲ୍ଲାର ସମସ୍ତ ଥାନାର ଥାନାଧିକାରୀ , ବିଭିନ୍ନ ବିଭାଗୀୟ ଅଧିକାରୀ ଏବଂ ମାନ୍ୟଗଣ୍ୟ ବ୍ୟକ୍ତି ମାନେ ବହୁ ସଂଖ୍ୟାରେ ଉପସ୍ଥିତ ଥିଲେ।