ଖାଦ୍ୟ ଯୋଗାଣ ବିଭାଗକୁ ଆନ୍ତର୍ଜାତୀୟ ପୁରସ୍କାର
ଭୁବନେଶ୍ୱର,:ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗକୁ ଆନ୍ତର୍ଜାତୀୟ “ଗ୍ଲୋବାଲ ପ୍ଲାନେଟ୍ ପର୍ପୋସ ଆୱାର୍ଡ : ଡ୍ରାଇଭ ଫର୍ ରେଜଲ୍ଟ” ପୁରସ୍କାର ମିଳିଛି । ଯୁକ୍ତରାଷ୍ଟ୍ର ଆମେରିକାର ୱାସିଂଟନ୍ ଡିସି ଠାରେ ଆୟୋଜିତ “ଏକ୍ସପ୍ଲୋର ୨୦୨୩-ଟ୍ରାନ୍ସପରେନ୍ସି ଟୁ ଆକ୍ସନ” ସମ୍ମିଳନୀରେ ରାଜ୍ୟକୁ ଏହି ସମ୍ମାନ ମିଳିଛି । ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପ୍ରମୁଖ ସଚିବ ଭି.ଭି.ୟାଦବ ସମ୍ମିଳନୀରେ ଉପସ୍ଥିତ ରହି ଏହି ପୁକସ୍କାର ଗ୍ରହଣ କରିଛନ୍ତି ।
ଏହି ସମ୍ମାନ ମିଳିବା ପରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ଟୁଇଟ୍ ଯୋଗେ ଶୁଭେଚ୍ଛା ବାର୍ତା ପ୍ରଦାନ କରାଯାଇଛି । ଧାନ ସଂଗ୍ରହ ପ୍ରକ୍ରିୟାରେ ପ୍ରଯୁକ୍ତି ବିଦ୍ୟାର ପ୍ରୟୋଗ କରି ଓଡିଶା ଆଜି ଗର୍ବିତ । ଚାଷୀ କଲ୍ୟାଣ ନିମନ୍ତେ ରାଜ୍ୟ ସରକାର ପ୍ରଯୁକ୍ତି ବିଦ୍ୟାଯୁକ୍ତ ସରକାରୀ ବ୍ୟବସ୍ଥା କରିଛନ୍ତି । ରିଅଲଟାଇମ୍ ସାଟେଲାଇଟ୍ ଇମେଜକୁ ବ୍ୟବହାର କରି ଚାଷୀଙ୍କ ଚାଷ ସଂପର୍କିତ ସୂଚନା ପ୍ରାପ୍ତ ହେଉଛି । ଯାହା ଫଳରେ ପାରଦର୍ଶିତା ରକ୍ଷା କରି ଚାଷୀଙ୍କ ଠାରୁ ଧାନ ସଂଗ୍ରହ କରାଯିବା ସହ ସର୍ବ ନିମ୍ନ ସହାୟକ ମୂଲ୍ୟ ପ୍ରଦାନ କରିବା ସମ୍ଭବପର ହୋଇପାରିଛି । ୫-ଟି ଉପକ୍ରମରେ ଧାନ ସଂଗ୍ରହ ବ୍ୟବସ୍ଥା ସୁଦୃଢ ହୋଇ ପାରିଥିବା ବେଳେ ସର୍ବ ନିମ୍ନ ସହାୟକ ମୂଲ୍ୟ ଯ୍ଧେକ୍ସନାରେ ଚାଷୀଙ୍କ ସହଯୋଗ ବୃଦ୍ଧି ପାଇଛି । ବିଭାଗ ତରଫରୁ କୁହା ଯାଇଛି ଯେ ରିଅଲ ଚାଇମ୍ ସାଟେଲାଇଟ୍ ଇମେଜ୍କୁ ବ୍ୟବହାର କରାଯାଇ ଧାନ କ୍ରୟ ପ୍ରକ୍ରିୟାକୁ ସୁବ୍ୟବସ୍ଥିତ କରାଯାଇ ପାରିଛି । ଓଡିଶା ସ୍ପେସ୍ ଆପ୍ଲିକେସନ୍ କେନ୍ଦ୍ର ସହାୟତାରେ ଏହି ଅଟୋମେସନ୍ ଯାଂଚ ବ୍ୟବସ୍ଥା କାର୍ଯ୍ୟକ୍ଷମ ହୋଇଛି ।
ଏହି ଆନ୍ତର୍ଜାତୀୟ ପୁରସ୍କାର ନିମନ୍ତେ ଖାଦ୍ୟଯୋଗାଣ ଓ ଖାଉଟି କଲ୍ୟାଣ , ସମବାୟ ମନ୍ତ୍ରୀ ଅତନୁ ସବ୍ୟସାଚୀ ନାୟକ ବିଭାଗକୁ ଶୁଭେଚ୍ଛା ଜଣାବା ସହ କହିଛନ୍ତି ଯେ ରାଜ୍ୟ ସରକାରଙ୍କ ଅତ୍ୟାଧୁନିକ ବ୍ୟବସ୍ଥା ଦ୍ୱାରା ପ୍ରକୃତ ଚାଷୀମାନଙ୍କୁ ଚିହ୍ନଟ କରିବା ସହଜ ହୋଇ ପାରିଛି । ଫଳରେ ସରକାର ଧାନ ସଂଗ୍ରହକୁ ନେଇ ରଖିଥିବା ଲକ୍ଷ୍ୟ ପୁରଣ ହେବା ସହ ଚାଷୀମାନେ ସଠିକ ମୂଲ୍ୟ ପାଇ ପାରୁଛନ୍ତି ।
