ଭୁବନେଶ୍ୱର( ଗିରିଜା ଶଙ୍କର ଦାଶ)
ନେତାଜୀ ସୁଭାଷ ବୋଷଙ୍କ ନେତୃତ୍ୱାଧୀନ ଆଜାଦ ହିନ୍ଦ ଫୌଜ ଜାପାନୀଙ୍କ ସହ ମିଶି ବ୍ରିଟିଶ ଫୌଜଙ୍କୁ ପରାସ୍ତ କରି ଡିସେମ୍ବର ୩୦ ତାରିଖ ୧୯୪୩ରେ ଆଣ୍ଡାମାନ ନିକୋବର ଦ୍ଵୀପପୁଞ୍ଜକୁ ଦାଖଲକୁ ନେଇଥିଲେ | ସେହି ସମୟରେ ନେତାଜୀ ଆଣ୍ଡାମାନ ନିକୋବର ଆଇଲାଣ୍ଡସର ନାମ ସ୍ୱରାଜ ଆଇଲାଣ୍ଡସ ଘୋଷଣା କରିଥିଲେ | ଏହି ବିଜୟର ୭୫ ତମ ବର୍ଷପୂର୍ତ୍ତି କାର୍ଯ୍ୟକ୍ରମ ଉପଲକ୍ଷେ ଡିସେମ୍ବର ୩୦ ତାରିଖରେ ପୋର୍ଟ ବ୍ଲେୟାର ଠାରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗ ଦେଇ ଆଣ୍ଡାମାନ ଦ୍ଵୀପପୁଞ୍ଜର କେତେକ ଦ୍ବୀପର ନାମ ପରିବର୍ତ୍ତନ ଘୋଷଣା କରିବେ | ଆଣ୍ଡାମାନ ଓ ନିକୋବରର ରସ ଆଇଲାଣ୍ଡକୁ ନେତାଜୀ ସୁଭାଷ ଚନ୍ଦ୍ର ବୋଷ ଆଇଲାଣ୍ଡ , ନେଲ ଆଇଲାଣ୍ଡକୁ ଶହୀଦ ଦ୍ବୀପ ଓ ହାଭେଲକ ଆଇଲାଣ୍ଡକୁ ସ୍ୱରାଜ ଦ୍ବୀପ ଭାବେ ଘୋଷଣା କରିବେ ବୋଲି ଜଣାଶୁଣା ସାମାଜିକ ଓ ରାଜନୈତିକ ଚିନ୍ତକ ତଥା ଶ୍ରୀମତୀ ନନ୍ଦିନୀ ଶତପଥୀ ମେମୋରିଆଲ ଟ୍ରଷ୍ଟର ଅଧ୍ୟକ୍ଷ ସୁପର୍ନ୍ନୋ ଶତପଥୀ ଏକ ଟ୍ୱିଟ ମାଧ୍ୟମରେ ସୂଚନା ଦେଇଛନ୍ତି | ସେହିଦିନ ସେଠାରେ ନିର୍ମିତ ୧୫୦ ମିଟର ଉଚ୍ଚ ପୋଷ୍ଟ ଉପରୁ ଜାତୀୟ ପତାକା ଉତ୍ତୋଳନ କରିବା ସହ ସ୍ମାରକୀ ଡାକ ଟିକଟ ଓ ଏକ ମୁଦ୍ରା ମଧ୍ୟ ଲୋକାର୍ପଣ କରିବେ |