ବିଡିଓଙ୍କୁ ବାରମ୍ବାର ଜଣାଇଲା ପରେ ବି ଚମ୍ପାକୁ ମିଳିଲାନି ଘର
ଆବାସ ଯୋଜନା କାହାପାଇଁ ? ଗରିବଙ୍କ ପାଇଁ “ନା’’ ଧନୀ ଲୋକଙ୍କ ପାଇଁ
ରେଢାଖୋଲ ପ୍ରତିନିଧି ଯଶୋବନ୍ତ ନାରାୟଣ ସାହୁ : ସରକାର ଗରୀବ ଶ୍ରେଣୀର ଲୋକମାନଙ୍କର ଉନ୍ନତି ପାଇଁ ନାନା ପ୍ରକାର ଯୋଜନା କାର୍ଯ୍ୟକାରୀ କରିଛନ୍ତି । ଯାହାର ରହିବା ପାଇଁ ବାସଗୃହ ନାହିଁ ସେମାନଙ୍କ ପାଇଁ ସରକାର ପ୍ରଧାନମନ୍ତ୍ରୀ ଆବାସ ଯୋଜନା , ବିଜୁ ପକ୍କାଘର ଯୋଜନା ରେ ଘର ଯୋଗାଇ ଦେଉଛନ୍ତି । ଏଥିପାଇଁ ସରକାର ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ପ୍ରକୃତ ହିତାଧିକାରୀ ଏହି ଯୋଜନାର ଫାଇଦା ପାଇ ପାରୁ ନାହାନ୍ତି । କିଛି କୁଜୀନେତାଙ୍କ ପ୍ରଲୋଭନରେ ସରକାରୀବାବୁମାନେ ଧନୀ ଲୋକ ମାନଙ୍କ ଠାରୁ ମୋଟା ଅଙ୍କର ଫାଇଦା ପାଇ ଆବାସ ଘର ଦେଉଥିବା ନଜିର ରହିଛି । ସଠିକ୍ ସର୍ଭେ ହେଉ ନ ଥିବାରୁ ଯୋଗ୍ୟ ହିତାଧିକାରୀ ଏଇ ସବୁ ଯୋଜନାର ସୁଳ ପାଇ ପାରୁନାହାନ୍ତି । ଏପରିକି ଗୋଟିଏ ଘରୁ ଦୁଇ ଦୁଇ ଟି ଘର ହାତେଇବାର ମଧ୍ୟ ନଜିର ରହିଛି । ଯାହାକି ଅନୁସନ୍ଧାନ କଲେ ସମସ୍ତ ତଥ୍ୟ ମିଳିପାରିବ ।
ସରକାରଙ୍କ ଏଇ ଆବାସ ଯୋଜନାରେ ଫାଇଦା ନ ପାଇ ଝାଟି ମାଟିର ପଲିଥିନ ଛପର ଘର ତଳେ ଦୀର୍ଘ ବର୍ଷ ହେଲା ଜୀବନ ବିତାଉଛନ୍ତି ରେଢାଖୋଲ ଉପଖଣ୍ଡ ନାକଟିଦେଉଳ ବ୍ଲକ ଡଇଁଚା ପଂଚାୟତ ଗ୍ରାମର ଚମ୍ପା ପ୍ରଧାନ ଓ ସ୍ଵାମୀ ଶେଷଦେବ ପ୍ରଧାନ ତାଙ୍କ ଦୁଇ ପୁଅ । ତାଙ୍କର ଜମିବାଡି କିଛି ନାଇଁ । କେବଳ ରାସନ୍ କାର୍ଡ ମିଳିଛି । ଅସହାୟ ଅବସ୍ଥାରେ ଚମ୍ପାଙ୍କ ପରିବାର ଜୀବନ ବିତୁଛି । ମୂଲ ମଜୁରୀ କରି ପେଟ ପୋଷନ୍ତି ସେ । ମଜୁରୀ ନ କଲେ ସେ ଦିନ ଭୋକରେ ଦିନ କାଟିବାକୁ ପଡୁଛି ତାଙ୍କୁ ଘର ମରାମତି ପାଇଁ ଆବଶ୍ୟକ ସମ୍ବଳ ଅଭାବରୁ ବର୍ଷା ଦିନରେ ଘର ଭିତରେ ପାଣି ପଶିଯାଉଛି । ସରକାରୀ ସହାୟତା ପାଇଁ ଦାରିଦ୍ର୍ୟ ସୀମାରେଖାର ମାନଦଣ୍ଡ ଚମ୍ପା ପରିବାର ଙ୍କ ପାଇଁ ଅବୁଝା ହୋଇରହିଛି । ନାକଟିଦେଉଳ ବିଡିଓ ଙ୍କୁ ଏ ସଂପର୍କରେ ଗତ ଆଗଷ୍ଟ୧୮ ତାରିଖ ଚମ୍ପା ଲିଖିତ ଭାବରେ ଜଣାଇଥିଲେ ମଧ୍ୟ ହଁ ହଁ ରେ ହଜିଯାଇଛି ଚମ୍ପାଙ୍କ ପରିବାରର ଭାଗ୍ୟ । ତେବେ ଏହି ପରିବାର ସମସ୍ୟା ନେଇ ବିଡିଓଙ୍କୁ ଜଣାଇଥିବାର ୧ମାସ ଅଧିକ ବିତିଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନାହିଁ ଓ ସରକାରୀ ସହାୟତା ତାଙ୍କ ପାଇଁ ଅପହଂଚ ହୋଇ ରହିଛି । ଭଙ୍ଗାଘର ଓ ଝାଟି ମାଟିର ପଲିଥିନ ଛପର ଘର ତଳେ ଜୀବନ ବିତାଉଥିବା ଏକ ବେସାହାରା ପରିବାର ପାଇଁ ସରକାରୀ ସହାୟତା ଉପହାସ ସଦୃଶ ହୋଇଛି । ପୀଡିତ ପରିବାରକୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଘଟଣାର ତଦନ୍ତ ପାଇଁ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହେଉଛି ।
