ତିର୍ତ୍ତୋଲ ବାଇଁଗୋଳ ବିଦ୍ୟାଳୟରୁ ପ୍ରଧାନ ଶିକ୍ଷୟିତ୍ରୀ ମଧ୍ୟାହ୍ନଭୋଜନ ଚାଉଳ ହଡ଼ପ!!!
ତିର୍ତ୍ତୋଲ/ପାରାଦ୍ବୀପ:ରମେଶ ମହାନ୍ତି -ତିର୍ତ୍ତୋଲ ବ୍ଳକ ଅନ୍ତର୍ଗତ ତେନ୍ତୁଳିପଦା ପଞ୍ଚାୟତ ସ୍ଥିତ ବାଇଁଗୋଳ ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ନିଜ ବିଦ୍ୟାଳୟରୁ ମଧ୍ୟାହ୍ନ ଭୋଜନ ଚାଉଳ ସମେତ ଅନ୍ୟାନ୍ୟ ସାମଗ୍ରୀ ହଡପ କରିଥିବା ନେଇ ଗ୍ରାମବାସୀ ତିର୍ତ୍ତୋଲ ଶିକ୍ଷାଧିକାରୀଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି।ସୂଚନାନୁଯାୟୀ ଚଳିତ ମାସ ୧୫ତାରିଖ ଅପରାହ୍ନ ସମୟରେ ଉକ୍ତ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସ୍ମିଗ୍ଧାରାଣୀ ଲେଙ୍କାଙ୍କ ପୁଅ ଏକ ଧଳା ରଙ୍ଗର କାର୍ ନଂ ଓ ଆର ୦୨.ବି ଡବ୍ଲ୍ୟୁ ୫୨୪୨କୁ ବିଦ୍ୟାଳୟ ପରିସର ମଧ୍ୟରେ ପୁରାଇ ବିଦ୍ୟାଳୟରେ ଥିବା ମଧ୍ୟାହ୍ନଭୋଜନ ଚାଉଳ ବସ୍ତା ସହିତ ଅନ୍ୟାନ୍ୟ ସାମଗ୍ରୀ ହଡପ କରିବା ଉଦ୍ଦେଶ୍ୟରେ କାର୍ ଡିକିରେ ଲୋଡ୍ କରୁଥିବା ବେଳେ ଗ୍ରାମବାସୀ ଘଟଣା ସ୍ଥଳରେ ପହଞ୍ଚି ଉକ୍ତ କାର୍ କୁ ଅଟକାଇବା ସହ ତିର୍ତ୍ତୋଲ ଶିକ୍ଷାଧିକାରୀଙ୍କ କାର୍ଯ୍ୟାଳୟର ଉଚ୍ଚ ପଦାଧିକାରୀଙ୍କୁ ଫୋନ୍ କରି ଘଟଣା ସମ୍ପର୍କରେ ଅବଗତ କରାଇବା ପରେ ଉଚ୍ଚ ପଦାଧିକାରୀମାନେ ଘଟଣା ସ୍ଥଳରେ ପହଞ୍ଚି ଘଟଣାର ଅନୁଧ୍ୟାନ କରିଥିଲେ ବୋଲି ଜଣାପଡିଛି।ଏ ସମ୍ପର୍କରେ ୧୬ତାରିଖ ଦିନ ତିର୍ତ୍ତୋଲ ଶିକ୍ଷାଧିକାରୀଙ୍କ ନିକଟରେ ଗ୍ରାମର ଶତାଧିକ ବ୍ୟକ୍ତିଙ୍କ ସ୍ୱାକ୍ଷର ସମ୍ବଳିତ ଅଭିଯୋଗ କରାଯାଇଥିବା ଜଣାପଡିଛି।ବିଦ୍ୟାଳୟର ସି.ଆର.ସି.ସି ଅକ୍ଷୟ କୁମାର ନାୟକଙ୍କ ନିଜ ଗ୍ରାମରେ ଏମିତିକି ଘର ପାଖରେ ଥିବା ଏହି ବିଦ୍ୟାଳୟରେ ଏଭଳି ଏକ ଘଟଣା ଘଟିବାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।ଏପରିକି ଅର୍ଥ କାରବାର କରାଯାଇ ଏଭଳି ଏକ ଘଟଣାକୁ ଚପାଇ ଦିଆଯିବାକୁ ଚେଷ୍ଟା କରାଯାଉଛି ବୋଲି ଚର୍ଚ୍ଚା ହେଉଛି।
