ସନ୍ଦେହଜନକ ବସ୍ତୁ କିମ୍ବା ବ୍ୟକ୍ତି ଦେଖିଲେ ତୁରନ୍ତ ୧୧୨କୁ ସୂଚନା ଦେବାକୁ ଏସପିଙ୍କ ଆହ୍ୱାନ
ପୁରୀ, ୮/୭: ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥ ମହାପ୍ରଭୁଙ୍କ ରଥଯାତ୍ରା-୨୦୨୬କୁ ସୁରକ୍ଷିତ, ଶୃଙ୍ଖଳିତ ଓ ସୁବ୍ୟବସ୍ଥିତ ଭାବେ ସମ୍ପନ୍ନ କରିବା ଲକ୍ଷ୍ୟରେ ପୁରୀ ପୋଲିସ ପକ୍ଷରୁ ମଙ୍ଗଳବାର ପୁରୀ ସହରର ହୋଟେଲ ତାଜ ଏବଂ ଶ୍ରୀଜଗନ୍ନାଥ ମନ୍ଦିର ନିକଟସ୍ଥ ବାଗେଡ଼ିଆ ଧର୍ମଶାଳା ପରିସରରେ ବହୁ ବିଭାଗର ସମନ୍ୱିତ ସୁରକ୍ଷା ମକ୍ ଡ୍ରିଲ୍ ସଫଳତାର ସହ ଆୟୋଜନ କରାଯାଇଥିଲା। ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ଯେକୌଣସି ଜରୁରୀ ପରିସ୍ଥିତିରେ ତ୍ୱରିତ ପ୍ରତିକ୍ରିୟା ଓ ବିଭିନ୍ନ ବିଭାଗ ମଧ୍ୟରେ ସୁଦୃଢ଼ ସମନ୍ୱୟ ସୁନିଶ୍ଚିତ କରିବା ଏହି ଅଭ୍ୟାସର ମୁଖ୍ୟ ଉଦ୍ଦେଶ୍ୟ ଥିଲା।
ବାସ୍ତବ ପରିସ୍ଥିତିକୁ ଆଧାର କରି ବିଭିନ୍ନ କଳ୍ପିତ ଜରୁରୀ ଘଟଣାର ଦୃଶ୍ୟପଟ ସୃଷ୍ଟି କରାଯାଇ ସମ୍ପୃକ୍ତ ବିଭାଗଗୁଡ଼ିକର ପ୍ରସ୍ତୁତି, ତ୍ୱରିତ ପ୍ରତିକ୍ରିୟା, ଉଦ୍ଧାର କାର୍ଯ୍ୟ ଓ ପରସ୍ପର ସମନ୍ୱୟ କ୍ଷମତାକୁ ପରଖା ଯାଇଥିଲା।
ଏହି ମକ୍ ଡ୍ରିଲ୍ରେ ଓଡ଼ିଶା ପୋଲିସର ବିଶେଷ ଟାକ୍ଟିକାଲ୍ ୟୁନିଟ୍, ବମ୍ ନିଷ୍କ୍ରିୟକରଣ ଦଳ (BDDS), ଡଗ୍ ସ୍କ୍ୱାଡ୍, ଅଗ୍ନିଶମ ଓ ଜରୁରୀ ସେବା ବିଭାଗ, ଓଡ୍ରାଫ୍, ସ୍ୱାସ୍ଥ୍ୟ ବିଭାଗ, ଆମ୍ବୁଲାନ୍ସ ସେବା, ଷ୍ଟ୍ରେଚର ରେସ୍ପନ୍ସ ଟିମ୍ ଏବଂ ଜିଲ୍ଲା ପ୍ରଶାସନର ବିଭିନ୍ନ ବିଭାଗ ସକ୍ରିୟ ଭାବେ ଅଂଶଗ୍ରହଣ କରିଥିଲେ। ପ୍ରତ୍ୟେକ ବିଭାଗ ନିଜ ନିଜ ଦାୟିତ୍ୱ ସଫଳତାର ସହ ପାଳନ କରିବା ସହ ଆନ୍ତଃବିଭାଗୀୟ ସମନ୍ୱୟର ଉତ୍କୃଷ୍ଟ ଦୃଷ୍ଟାନ୍ତ ପ୍ରଦର୍ଶନ କରିଥିଲେ।
ଅଭ୍ୟାସ ସମୟରେ ପୋଲିସ ମୁତୟନ, ସନ୍ଦେହଜନକ ସ୍ଥାନର ଯାଞ୍ଚ, ବମ୍ ନିଷ୍କ୍ରିୟକରଣ ପ୍ରକ୍ରିୟା, ଡଗ୍ ସ୍କ୍ୱାଡ୍ର ସର୍ଚ୍ଚ ଅପରେସନ୍, ଆହତଙ୍କ ଉଦ୍ଧାର, ଚିକିତ୍ସା ସହାୟତା, ସୁରକ୍ଷିତ ସ୍ଥାନକୁ ସ୍ଥାନାନ୍ତରଣ ଏବଂ କମାଣ୍ଡ ଓ କଣ୍ଟ୍ରୋଲ୍ ବ୍ୟବସ୍ଥାର କାର୍ଯ୍ୟକାରିତାକୁ ସୂକ୍ଷ୍ମ ଭାବେ ମୂଲ୍ୟାଙ୍କନ କରାଯାଇଥିଲା।
ଏହି ଅଭ୍ୟାସ ମାଧ୍ୟମରେ ସୁରକ୍ଷା ଓ ଜରୁରୀ ସେବା ବିଭାଗଗୁଡ଼ିକ ମଧ୍ୟରେ ଯୋଗାଯୋଗ ବ୍ୟବସ୍ଥା, ସମନ୍ୱୟ ଏବଂ ଜରୁରୀ ପ୍ରତିକ୍ରିୟା କ୍ଷମତାକୁ ଆହୁରି ସୁଦୃଢ଼ କରାଯାଇଛି। ମକ୍ ଡ୍ରିଲ୍ରୁ ମିଳିଥିବା ଅନୁଭୂତି ଓ ପର୍ଯ୍ୟବେକ୍ଷଣକୁ ଆଧାର କରି ରଥଯାତ୍ରା ସୁରକ୍ଷା ବ୍ୟବସ୍ଥାରେ ଆବଶ୍ୟକ ସୁଧାର ଓ ପରିମାର୍ଜନ କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।
ଏହି ଅବସରରେ ପୁରୀ ଏସପି ପ୍ରତୀକ ସିଂ କହିଥିଲେ ଯେ, ଏପରି ନିୟମିତ ଅଭ୍ୟାସ ମାଧ୍ୟମରେ ସୁରକ୍ଷା ଓ ଜରୁରୀ ସେବା ସଂସ୍ଥାଗୁଡ଼ିକର କାର୍ଯ୍ୟଦକ୍ଷତା ବୃଦ୍ଧି ପାଇଥାଏ ଏବଂ ପରସ୍ପର ସମନ୍ୱୟ ଅଧିକ ସୁଦୃଢ଼ ହୁଏ। ଯାହା ବୃହତ୍ ଧାର୍ମିକ ସମାବେଶରେ ଯେକୌଣସି ଜରୁରୀ ପରିସ୍ଥିତିର ସଫଳ ପରିଚାଳନାରେ ସହାୟକ ହୋଇଥାଏ।
ସେ ଭକ୍ତ, ପର୍ଯ୍ୟଟକ ଓ ସାଧାରଣ ଜନତାଙ୍କୁ ଆହ୍ୱାନ ଦେଇ କହିଥିଲେ ଯେ, ରଥଯାତ୍ରା ସମୟରେ କୌଣସି ସନ୍ଦେହଜନକ ବସ୍ତୁ, ବ୍ୟକ୍ତି କିମ୍ବା ଅସ୍ୱାଭାବିକ କାର୍ଯ୍ୟକଳାପ ନଜରକୁ ଆସିଲେ ତୁରନ୍ତ ନିକଟସ୍ଥ ପୋଲିସ କର୍ମଚାରୀଙ୍କୁ କିମ୍ବା ଜରୁରୀ ସେବା ୧୧୨ ନମ୍ବରରେ ସୂଚନା ଦିଅନ୍ତୁ। ସହରର ବିଭିନ୍ନ ସ୍ଥାନରେ ପୋଲିସ ସହାୟତା ଓ ସୂଚନା କେନ୍ଦ୍ର କାର୍ଯ୍ୟକ୍ଷମ ରହିବ ବୋଲି ସେ କହିଥିଲେ।
