ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ସେଞ୍ଚୁରିଅନ୍ ୟୁନିଭର୍ସିଟି ଅଫ୍ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟ ଏବଂ ନୂଆଦିଲ୍ଲୀର ଆଇପିଏଲ୍ ଫାଉଣ୍ଡେସନ୍ ସହଯୋଗରେ ଆଜି ବିଶ୍ୱବିଦ୍ୟାଳୟ ପରିସର ଅଡିଟୋରିୟମଠାରେ ‘ଆଇପିଏଲ୍-ଅମୃତ ଇଣ୍ଟର୍ନସିପ୍ ପ୍ରୋଗ୍ରାମ୍ ୨୦୨୬’ର ପ୍ରଥମ ବ୍ୟାଚ୍‌ର ଉଦ୍‌ଘାଟନୀ ତଥା ଓରିଏଣ୍ଟେସନ୍ କାର୍ଯ୍ୟକ୍ରମ ସଫଳତାର ସହ ଆୟୋଜିତ ହୋଇଯାଇଛି। ଏହି ଦୂରଦୃଷ୍ଟିସମ୍ପନ୍ନ ଅଭିଯାନ ଅଧୀନରେ, ବି.ଏସସି. (ଅନର୍ସ) କୃଷି ଏବଂ ବି.ଏଫ୍‌.ଏସସି. (ମତ୍ସ୍ୟ ବିଜ୍ଞାନ)ର ୭୫ ଜଣ ଶେଷ ବର୍ଷର ଛାତ୍ରଛାତ୍ରୀଙ୍କୁ ଗଜପତି ଜିଲ୍ଲାର ବିଭିନ୍ନ ଗ୍ରାମରେ ୩ ମାସିଆ ଗ୍ରାମୀଣ ପ୍ରସାର କାର୍ଯ୍ୟ ପାଇଁ ଚୟନ କରାଯାଇଛି।
ଭଗବାନ ଜଗନ୍ନାଥଙ୍କ ସମ୍ମୁଖରେ ପ୍ରଦୀପ ପ୍ରଜ୍ୱଳନ ଏବଂ ଓଡ଼ିଶାର ରାଜ୍ୟ ସଙ୍ଗୀତ ‘ବନ୍ଦେ ଉତ୍କଳ ଜନନୀ’ ଗାନ ସହିତ କାର୍ଯ୍ୟକ୍ରମ ଆରମ୍ଭ ହୋଇଥିଲା। କୃଷି ଓ ଆନୁଷଙ୍ଗିକ ବିଜ୍ଞାନ ବିଭାଗର ଡିନ୍ (ପ୍ରଶାସନ) ଡ. ଏସ. ପି. ନନ୍ଦ ମଞ୍ଚାସୀନ ଓ ଅନ୍ୟାନ୍ୟ ଅତିଥିମାନଙ୍କୁ ସ୍ୱାଗତ କରିଥିଲେ। ସିୟୁଟିଏମ୍ ର ନୋଡାଲ୍ ଅଫିସର ଡ. ଆଶୀର୍ବଚନ ମହାପାତ୍ର କାର୍ଯ୍ୟକ୍ରମର ଏକ ବିସ୍ତୃତ ରୂପରେଖ ପ୍ରଦାନ କରି କହିଥିଲେ ଯେ ପ୍ରତ୍ୟେକ ଇଣ୍ଟର୍ନ ୧୦୦ଟି ଗ୍ରାମୀଣ ପରିବାର ସହ ଯୋଡ଼ିହୋଇ ଜିଲ୍ଲାର ୭,୫୦୦ ଚାଷୀ ପରିବାରକୁ ସଠିକ୍ ତଥ୍ୟ ସଂଗ୍ରହ ଏବଂ ପ୍ରଯୁକ୍ତିବିଦ୍ୟା ବିଷୟରେ ସଚେତନ କରାଇବେ।
ମୁଖ୍ୟ ଅତିଥି ଭାବେ ଆଇପିଏଲ୍ ଫାଉଣ୍ଡେସନର ବରିଷ୍ଠ ପରାମର୍ଶଦାତା ତଥା ଆଇସିଆରଓ ର ନିର୍ଦ୍ଦେଶକ ଡ. ରାଜୀବ ରଞ୍ଜନ ଜେନା , ଆଇଏଏସ୍ (ଅବସରପ୍ରାପ୍ତ) ଯୋଗଦେଇ ଚାଷୀମାନଙ୍କର ସ୍ଥିତି ଏବଂ ସେମାନଙ୍କର ଅର୍ଥନୈତିକ ବ୍ୟବସ୍ଥା ବିଷୟରେ ବୁଝାଇ ଛାତ୍ରଛାତ୍ରୀମାନଙ୍କୁ ଗଭୀର ଭାବେ ଅନୁପ୍ରାଣିତ କରିଥିଲେ। ମୁଖ୍ୟ ଜିଲ୍ଲା କୃଷି ଅଧିକାରୀ ଶ୍ରୀ ଏମ୍. ପ୍ରକାଶ ରାଓ ଏବଂ ଜିଲ୍ଲା ମତ୍ସ୍ଯ ଅଧିକାରୀ ଶ୍ରୀ ଅରୁଣ କୁମାର ସାହୁ ଛାତ୍ରଛାତ୍ରୀମାନଙ୍କୁ ସ୍ଥାନୀୟ କୃଷି ପରିବେଶ ଏବଂ ବିଭିନ୍ନ ସରକାରୀ ଯୋଜନା ବିଷୟରେ ସବିଶେଷ ସୂଚନା ଦେଇଥିଲେ। ବିଶ୍ବବିଦ୍ୟାଳୟ ର ମାନ୍ୟବର କୁଳପତି ପ୍ରଫେସର ସୁପ୍ରିୟା ପଟ୍ଟନାୟକ ଏବଂ କୁଳସଚିବ ପ୍ରଫେସର ଅନିତା ପାତ୍ର ଛାତ୍ରଛାତ୍ରୀମାନଙ୍କ ଭବିଷ୍ୟତ ଗଠନରେ ଏହି କ୍ଷେତ୍ର ପରିଦର୍ଶନର ଗୁରୁତ୍ୱ ଉପରେ ଆଲୋକପାତ କରିବା ସହ ଛାତ୍ରଛାତ୍ରୀଙ୍କୁ ଏହି ସୁଯୋଗ ଦେଇଥିବାରୁ ଆଇପିଏଲ୍ ଫାଉଣ୍ଡେସନକୁ ଧନ୍ୟବାଦ ଜଣାଇଥିଲେ।
ଏହି କାର୍ଯ୍ୟକ୍ରମରେ ଶ୍ରୀମତୀ ନନ୍ଦିନୀ ରାୟ (ମେଣ୍ଟର, ଆଇପିଏଲ୍ ଫାଉଣ୍ଡେସନ୍), ଡ. ସ୍ମିତା ମିଶ୍ର ପଣ୍ଡା (ନିର୍ଦ୍ଦେଶକ-ଗବେଷଣା , ସିୟୁଟିଏମ୍), ଡ. ଗିରୀଶ କୁମାର ମହାନ୍ତି (ସହଯୋଗୀ ଡିନ୍-ଏକ୍ସଟେନସନ) , ଡ. ଦୁର୍ଗା ପ୍ରସାଦ ପାଢ଼ୀ (ନିର୍ଦ୍ଦେଶକ-ପ୍ରଶାସନ) , ଡ. କେ. ସର୍ଜନ ରାଓ (ନିର୍ଦ୍ଦେଶକ-କୃଷି ଓ ଆନୁଷଙ୍ଗିକ ବିଦ୍ୟାଳୟ) , ଡ. ସାଗର ମୈତ୍ର (ଡିନ୍, କୃଷି ବିଦ୍ୟାଳୟ) , ଡ. ସମ୍ବିଦ ସ୍ୱାଇଁ (ସହଯୋଗୀ ଡିନ୍, ମତ୍ସ୍ୟ ବିଜ୍ଞାନ ବିଦ୍ୟାଳୟ) , ଡ. ଅଶୋକ କୁମାର (ରେଡି ପ୍ରୋଗ୍ରାମ ସଂଯୋଜକ) , ସୁଶ୍ରୀ ଦିଶା କନ୍ନନ (ପ୍ରୋଗ୍ରାମ ମ୍ୟାନେଜର , ଆଇପିଏଲ୍ ଫାଉଣ୍ଡେସନ୍) ଏବଂ ଶ୍ରୀ ହ୍ରିତିକ ରଞ୍ଜନ ସିଂ (କୃଷି ବିଜ୍ଞାନୀ , ଆଇପିଏଲ୍ ଫାଉଣ୍ଡେସନ୍) ପ୍ରମୁଖ ସକ୍ରିୟ ଅଂଶଗ୍ରହଣ କରିଥିଲେ। ପ୍ରକଳ୍ପ ସଂଯୋଜକ ଡ. ପି. ଏନ୍. ହର୍ଷ ବର୍ଦ୍ଧନ , ଡ. ବିଶାଲ୍ କୁମାର ଗୁପ୍ତା , ଶ୍ରୀ ବିଶ୍ୱଜିତ ସାହୁ ଏବଂ ଶ୍ରୀ ଚିନ୍ମୟ ନନ୍ଦଙ୍କ ଦ୍ୱାରା ଏହି କାର୍ଯ୍ୟକ୍ରମଟି ଭୂମି ସ୍ତରରେ ସଫଳତାର ସହ ପରିଚାଳିତ ହୋଇଥିଲା। ଶ୍ରୀମତୀ ଉପାସନା ସାହୁ କାର୍ଯ୍ୟକ୍ରମ ର ପରିଚାଳନା କରିଥିଲେ।
ଏକ ପ୍ରଶ୍ନୋତ୍ତର କାର୍ଯ୍ୟକ୍ରମ ମଧ୍ୟ ଅନୁଷ୍ଠିତ ହୋଇଥିଲା , ଯେଉଁଠାରେ ଇଣ୍ଟର୍ନମାନେ କ୍ଷେତ୍ର ସର୍ବେକ୍ଷଣର ନିୟମାବଳୀ ସମ୍ପର୍କରେ ସ୍ପଷ୍ଟ ହେବା ପାଇଁ ଆଇପିଏଲ୍ ଫାଉଣ୍ଡେସନର ଜାତୀୟ ବୈଷୟିକ ପ୍ରତିନିଧି ଏବଂ ଡ. ଅଶୋକ କୁମାର ଓ ଡ. ପି. ଏନ୍. ହର୍ଷ ବର୍ଦ୍ଧନଙ୍କ ସହ ସିଧାସଳଖ ଆଲୋଚନା କରିଥିଲେ। ଶେଷରେ ଶ୍ରୀ ବିଶ୍ୱଜିତ ସାହୁ ଆନୁଷ୍ଠାନିକ ଧନ୍ୟବାଦ ଅର୍ପଣ କରିଥିଲେ।