ରାୟଗଡା -ବିଶ୍ୱ ରକ୍ତଦାତା ଦିବସ ଅବସରରେ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟ ସ୍ଥିତ ଓଡିଶା ବ୍ଲଡ୍ ସେଣ୍ଟର ଏବଂ ଡିଏସଏସ୍ ରାୟଗଡା ପକ୍ଷରୁ ସମାଜସେବୀ ତଥା ସାମ୍ବାଦିକ ବୈକୁଣ୍ଠ ଦୁରିଆଙ୍କୁ ସମ୍ମାନିତ କରାଯାଇଛି। ରକ୍ତଦାନ କ୍ଷେତ୍ରରେ ତାଙ୍କର ନିରନ୍ତର ଅବଦାନ ଓ ମାନବିକ ସେବାଭାବକୁ ସ୍ୱୀକୃତି ଦେଇ ଏହି ସମ୍ମାନ ପ୍ରଦାନ କରାଯାଇଥିଲା।
ବୈକୁଣ୍ଠ ଦୁରିଆ କେବଳ ଜଣେ ସାମ୍ବାଦିକ ନୁହେଁ, ବରଂ ଜଣେ ସକ୍ରିୟ ସମାଜସେବୀ ଭାବେ ଜିଲ୍ଲାରେ ପରିଚିତ। ଜରୁରୀ ସମୟରେ ରୋଗୀଙ୍କ ପାଇଁ ରକ୍ତର ଆବଶ୍ୟକତା ପଡ଼ିଲେ ସେ ନିଜେ ରକ୍ତଦାନ କରିବା ସହିତ ଅନ୍ୟମାନଙ୍କୁ ମଧ୍ୟ ରକ୍ତଦାନ ପାଇଁ ପ୍ରେରିତ କରିଆସୁଛନ୍ତି। ତାଙ୍କର ଏହି ନିଷ୍ଠା ଓ ସେବା ମନୋଭାବ ଅନେକ ଲୋକଙ୍କ ଜୀବନ ବଞ୍ଚାଇବାରେ ସହାୟକ ହୋଇଛି।
ସମ୍ମାନ ଗ୍ରହଣ କରି ବୈକୁଣ୍ଠ ଦୁରିଆ କହିଥିଲେ ଯେ, “ରକ୍ତଦାନ ହେଉଛି ସର୍ବଶ୍ରେଷ୍ଠ ମାନବ ସେବା। ଜଣେ ବ୍ୟକ୍ତିଙ୍କର ସାମାନ୍ୟ ପ୍ରୟାସ ଅନ୍ୟ ଜଣଙ୍କ ଜୀବନ ବଞ୍ଚାଇପାରେ। ତେଣୁ ସମସ୍ତ ସୁସ୍ଥ ଯୁବକ ଓ ଯୁବତୀ ନିୟମିତ ରକ୍ତଦାନ କରିବା ଉଚିତ।”
ଏହି ଅବସରରେ ବ୍ଲଡ୍ ସେଣ୍ଟର ପକ୍ଷରୁ ରକ୍ତଦାନର ମହତ୍ତ୍ୱ ସମ୍ପର୍କରେ ସଚେତନତା ବାର୍ତ୍ତା ଦିଆଯାଇଥିଲା। ସମାଜ ପାଇଁ ନିରବଚ୍ଛିନ୍ନ ସେବା ଓ ରକ୍ତଦାନ କ୍ଷେତ୍ରରେ ଅବଦାନ ରଖୁଥିବା ବୈକୁଣ୍ଠ ଦୁରିଆଙ୍କ ସମ୍ମାନନା ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି। ବିଶ୍ୱ ରକ୍ତଦାତା ଦିବସରେ ତାଙ୍କୁ ମିଳିଥିବା ଏହି ସମ୍ମାନ ରାୟଗଡା ଜିଲ୍ଲା ପାଇଁ ଗର୍ବର ବିଷୟ ବୋଲି ଉପସ୍ଥିତ ଅତିଥିମାନେ ମତ ପ୍ରକାଶ କରିଥିଲେ।
