ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ଗଜପତି ଷ୍ଟାଡିୟମ୍ ଠାରେ ଚାଲୁଥିବା ଜିଲ୍ଲାସ୍ତରୀୟ ସୁଭଦ୍ରା ଶକ୍ତି ମେଳା ଚତୁର୍ଥ ଦିନରେ ଉତ୍ସାହ ଓ ଉତ୍ସବମୁଖର ଭାବରେ ଅନୁଷ୍ଠିତ ହୋଇଯାଇଛି।
ଏହି ଅବସରରେ ସମ୍ମାନିତ ଅତିଥି ଭାବେ ଜିଲ୍ଲା ମଙ୍ଗଳ ଅଧିକାରୀ , ଗଜପତି ଶ୍ରୀ ସୋଲମନ ରାଇକା ଉପସ୍ଥିତ ଥିବା ବେଳେ ପ୍ରକଳ୍ପ ପ୍ରଶାସକ , ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା , ପାରଳାଖେମୁଣ୍ଡି ଶ୍ରୀ ଅଂଶୁମାନ ମହାପାତ୍ର , ଜିଲ୍ଲା ସଂସ୍କୃତି ଅଧିକାରୀ ସୁଶ୍ରୀ ଅର୍ଚ୍ଚନା କୁମାରୀ ମଙ୍ଗରାଜ , ଡିପିଏମ , ଓଏଲଏମ ଶ୍ରୀ ଟିମନ୍ ବାରା ପ୍ରମୁଖ ମଞ୍ଚାସୀନ ରହି ମେଳାର ଉଦ୍ଦେଶ୍ୟ ଓ ମହିଳା ସଶକ୍ତିକରଣ ବିଷୟରେ ମତ ପ୍ରକାଶ କରିଥିଲେ। ଅନ୍ୟାନ୍ୟ ଜିଲ୍ଲାସ୍ତରୀୟ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ। ପରେ ଭୁବନେଶ୍ବର ର ଏ.ଆର୍. ଆରଧନଙ୍କ ସଂଯୋଜନାରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମରେ ପାରଳାଖେମୁଣ୍ଡି ର ନଟରାଜ ନୃତ୍ୟ କଳା କ୍ଷେତ୍ରମ୍ , ସମଲେଇ ନୃତ୍ୟକଳା ପରିଷଦ , ଏଜେ କ୍ରାଉ , ଶ୍ରୀ ଜଗନ୍ନାଥ ଓଡିଶୀ କଳା କେନ୍ଦ୍ର , ପି.ଡି.ସି ଗ୍ରାଫି ଡାନ୍ସ ରାୟଗଡା ର ଡ଼ଙ୍ଗରିଆ ନୃତ୍ୟ , ପରିଜା ଆଦିବାସୀ ନୃତ୍ୟ ଦଳ କୋରାପୁଟ ର ପରାଜା ନୃତ୍ୟ କଳାକାରମାନଙ୍କ ଦ୍ୱାରା ନୃତ୍ୟ ପରିବେଷଣ କରିଥିବା ବେଳେ ଓଡିଶାର କଣ୍ଠ ଶିଳ୍ପୀ ଡ.ଅର୍ଚ୍ଚନା ପାଢ଼ୀ ଓ ଗୃପ ସଙ୍ଗୀତ ପରିବେଷଣ ଦର୍ଶକମାନଙ୍କୁ ମନୋମୁଗ୍ଧ କରାଇଥିଲା।
ମେଳା ପ୍ରାଙ୍ଗଣରେ ଦର୍ଶକମାନଙ୍କ ଭିଡ଼ ଉତ୍ସବମୁଖର ପରିବେଶ ସୃଷ୍ଟି କରିଥିଲା। ମହିଳା ଶକ୍ତିକୁ ମଜବୁତ କରୁଛି ମେଳା , ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା ସ୍ୱୟଂ ସହାୟକ ଗୋଷ୍ଠୀମାନେ ନିଜେ ଉତ୍ପାଦିତ ହସ୍ତତନ୍ତ୍ର , ହସ୍ତଶିଳ୍ପ , ଖାଦ୍ୟ ପଦାର୍ଥ ଓ ଗୃହସଜ୍ଜା ସାମଗ୍ରୀ ପ୍ରଦର୍ଶନ ଓ ବିକ୍ରି କରୁଛନ୍ତି। ବ୍ରାଣ୍ଡିଂ ଓ ପ୍ୟାକେଜିଂ ବିଷୟରେ ପ୍ରଶିକ୍ଷଣ କର୍ମଶାଳା ସହ ପ୍ରତିଦିନ ମାଗଣା ଚକ୍ଷୁ ପରୀକ୍ଷା ଶିବିର ଆୟୋଜିତ ହେଉଛି। ମିଶନ ଶକ୍ତିର ଏହି ପଦକ୍ଷେପ ମାଧ୍ୟମରେ ମହିଳାମାନେ ବୃହତ୍ ବଜାର ସହିତ ସଂଯୋଗ ସୃଷ୍ଟି କରି ଆୟ ବୃଦ୍ଧି କରୁଛନ୍ତି ଓ ଆତ୍ମନିର୍ଭରତାର ଦିଗରେ ଆଗୁଆଁ ବଢ଼ୁଛନ୍ତି। “ଲକ୍ଷପତି ଦିଦି” ହେବାର ସ୍ଵପ୍ନ ସାକାର କରିବାରେ ଏହି ମେଳା ଗୁରୁତ୍ୱପୂର୍ଣ୍ଣ ଭୂମିକା ନେଉଛି।
୭ ଦିନ ଧରି ଆୟୋଜିତ ଏହି ସୁଭଦ୍ରା ଶକ୍ତି ମେଳା ଆସନ୍ତା ୨୪ ତାରିଖ ପର୍ଯ୍ୟନ୍ତ ଜାରି ରହିବ। ଚତୁର୍ଥ ସନ୍ଧ୍ୟା କାର୍ଯ୍ୟକ୍ରମରେ ସମସ୍ତ ଲାଇନ୍ ବିଭାଗର ଜିଲ୍ଲାସ୍ତରୀୟ ଅଧିକାରୀମାନେ ଉପସ୍ଥିତ ଥିଲେ।