ପୁରୀ, (ଅନିମେଶ ପଟ୍ଟନାୟକ): ପୁରୀର ନୂତନ ଆରକ୍ଷୀ ଅଧିକ୍ଷକ ପ୍ରତୀକ ସିଂ ଦାୟିତ୍ୱ ଗ୍ରହଣ କରିବା ପରେ ଗୋବର୍ଦ୍ଧନ ପୀଠରେ ପୂଜ୍ୟପାଦ ଜଗଦଗୁରୁ ଶଙ୍କରାଚାର୍ଯ୍ୟ ଗୁରୁଦେବଙ୍କୁ ଦର୍ଶନ କରି ଆଶୀର୍ବାଦ ଓ ମାର୍ଗଦର୍ଶନ ଗ୍ରହଣ କରିଛନ୍ତି।
ଏହି ଅବସରରେ ପୂଜ୍ୟ ଗୁରୁଜୀ ମହାରାଜା କହିଛନ୍ତି, ପୁରୀ କେବଳ ଧାର୍ମିକ କ୍ଷେତ୍ର ନୁହେଁ, ବରଂ ବିଶ୍ୱର ଆଧ୍ୟାତ୍ମିକ ରାଜଧାନୀ । ଶ୍ରୀଜଗନ୍ନାଥ ମନ୍ଦିର ସଦାସର୍ବଦା ବିଧର୍ମୀ ଓ କୁଚକ୍ରୀମାନେଙ୍କ ନଜରରେ ରହୁଥିବାରୁ ଏହାର ସୁରକ୍ଷା ବହୁତ ବଡ଼ ଚାଲେଞ୍ଜ। ସେଥିପାଇଁ କଡ଼ା ଅନୁଶାସନ ଆବଶ୍ୟକ।ଆହୁରି ମଧ୍ଯ କହିଛନ୍ତି, ମହୋଦଧିର ବିସ୍ତୀର୍ଣ୍ଣ ବେଳାଭୂମି କେବଳ ପର୍ଯ୍ୟଟନ ଓ ବିନୋଦନର କେନ୍ଦ୍ର ନୁହେଁ, ତୀର୍ଥଯାତ୍ରୀଙ୍କ ସୁରକ୍ଷା ଓ ସୁବିଧା ନିଶ୍ଚିତ କରିବା ସହିତ ସେଥିରେ ମାଦକଦ୍ରବ୍ୟ ସେବନକୁ ବନ୍ଦ କରିବାରେ ପୋଲିସ ଦୃଢ଼ ହେବା ଦରକାର।
ଏହି ସମୟରେ ଜିଲ୍ଲା ପୋଲିସ ପ୍ରଶାସନର ବରିଷ୍ଠ ଅଧିକାରୀ ଓ ବିଭିନ୍ନ ଥାନାର ଅଧିକାରୀମାନେ ଉପସ୍ଥିତ ଥିଲେ। ଏହାସହ ପୀଠର ବିଭିନ୍ନ ବିଭାଗର ପ୍ରମୁଖ କର୍ମକର୍ତ୍ତାଙ୍କ ସହିତ ଏସପି ପ୍ରତୀକ ସିଂଙ୍କ ଆଲୋଚନା ହୋଇଥିବା ସୂଚନା ପୀଠର ଗଣମାଧ୍ୟମ ସଚିବ ଦେବାଶିଷ ମିଶ୍ର ଦେଇଛନ୍ତି।
