ଜିଲ୍ଳା ସ୍ତରୀୟ ପ୍ରତିଯୋଗୀଙ୍କୁ ଦିଆଯିବ ସ୍ଵତନ୍ତ୍ର ତାଲିମ୍ : ବିଇଓ
ବେଲଗୁଣ୍ଠା,-(ଶିବରାମ ଚୌଧୁରୀ )-, ତୃଣମୂଳ ସ୍ତରରୁ କ୍ରୀଡ଼ା ତଥା କ୍ରୀଡାବିତ୍ ଙ୍କୁ ପ୍ରୋତ୍ସାହିତ କରିବା ନିମନ୍ତେ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ଆଜି ବେଲଗୁଣ୍ଠା ବ୍ଲକ୍ ଅନ୍ତର୍ଗତ ନାଟଙ୍ଗା ଦୀନବନ୍ଧୁ ବିଦ୍ୟାପୀଠରେ ନାଟଙ୍ଗା ମଣ୍ଡଳ ସ୍ତରୀୟ ବିଦ୍ୟାଳୟ ସମୂହ ଦୌଡ଼କୁଦ ପ୍ରତିଯୋଗିତା ଉଦଘାଟିତ ହୋଇଯାଇଛି I ଆଜିର ଉଦ୍ଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବେଲଗୁଣ୍ଠା ଗୋଷ୍ଠୀ ଶିକ୍ଷା ଅଧିକାରିଣୀ ଲୋପାମୁଦ୍ରା ରଥ ଯୋଗ ଦେଇ କ୍ରୀଡ଼ା ପ୍ରତିଯୋଗୀମାନଙ୍କୁ ଉତ୍ସାହିତ କରିବା ସହିତ ଖେଳୁଆଡ଼ ମନୋଭାବ ନେଇ ଶୃଙ୍ଖଳିତ କ୍ରୀଡ଼ା ପ୍ରଦର୍ଶନ ନିମନ୍ତେ ପରାମର୍ଶ ଦେଇଥିଲେ I ଏହା ସହିତ ଜିଲ୍ଲା ସ୍ତରରେ ବେଲଗୁଣ୍ଠା ବ୍ଳକ୍ ର ପ୍ରତିଯୋଗୀଙ୍କ ଉନ୍ନତ ପ୍ରଦର୍ଶନ ନିମନ୍ତେ ଜିଲ୍ଳା ସ୍ତରୀୟ ପ୍ରତିଯୋଗିତାକୁ ମନୋନୀତ ହୋଇଥିବା ପ୍ରତିଯୋଗୀଙ୍କ ପାଇଁ ବ୍ଳକ୍ ସ୍ତରରେ ଏକ ସ୍ଵତନ୍ତ୍ର ତାଲିମ୍ ଶିବିର ଆୟୋଜନ କରାଯିବ ବୋଲି ପ୍ରକାଶ,କରିଥିଲେ ବିଇଓ ଶ୍ରୀମତୀ ରଥ I କାର୍ଯ୍ୟକ୍ରମରେ ସମ୍ମାନିତ ଅତିଥି ରୂପେ ଅବସରପ୍ରାପ୍ତ କ୍ରୀଡା ଶିକ୍ଷକ ସୁରେନ୍ଦ୍ର ବିଶ୍ୱାଳ ଏବଂ ନାଟଙ୍ଗା ଦୀନବନ୍ଧୁ ବିଦ୍ୟାପୀଠ ପ୍ରଧାନ ଶିକ୍ଷକ ମନୋଜ କୁମାର ଘଡାଇ ଯୋଗ ଦେଇ ଛାତ୍ରଛାତ୍ରୀଙ୍କ ଶୃଙ୍ଖଳିତ ତଥା ସୁସ୍ଥ ଜୀବନ ପାଇଁ କ୍ରୀଡ଼ା ଏକ ଅପରିହାର୍ଯ୍ୟ ବିଷୟ ବୋଲି ବକ୍ତବ୍ୟ ପ୍ରଦାନ କରିଥିଲେ I ଆଜିର ପ୍ରତିଯୋଗିତାରେ ବ୍ଲକ୍ ର ଗାଙ୍ଗପୁର,କ୍ଷତ୍ରିୟବରପୁର,ଏନ୍.ପି ଶାସନ, ଗୋବରା ଏବଂ ନାଟଙ୍ଗା କ୍ଲଷ୍ଟର ଅଧୀନସ୍ଥ ବିଦ୍ୟାଳୟ ଗୁଡିକରୁ ପ୍ରାୟ ତିନିଶହ ଜଣ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ I ବେଲଗୁଣ୍ଠା ବ୍ଲକ୍ କ୍ରୀଡ଼ା ସମ୍ପାଦକ ଆଶୁତୋଷ ସ୍ୱାଇଁଙ୍କ ତତ୍ତ୍ୱାବଧାନରେ ସମସ୍ତ କ୍ରୀଡ଼ା ଶିକ୍ଷକ ପ୍ରତିଯୋଗିତାକୁ ପରିଚାଳନା କରିଥିଲେ I
