ଡାବୁଗାଁ -ଯଶବନ୍ତ ପରିଛା (ଶାସକ ପ୍ରଶାସକ ) ତା ୨୪/୦୮/୨୫ ନବରଙ୍ଗପୁର ଜିଲ୍ଲା ଡାବୁଗାଁ ବ୍ଲକ ରେ ଆଜି ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିର ଥିଲା। ତେବେ ଅଭିଯୋଗ ଶିବିର ଆରମ୍ଭ ର କିଛି ସମୟ ମଧ୍ୟରେ ବ୍ଲକ ର ଶହ ଶହ ଚାଷୀ ବ୍ଲକ ରେ ଉତ୍କଟ ସାର ସମସ୍ୟା ନେଇ ପହଞ୍ଚି ଥିଲେ। ଠିକ୍ ଚାଷ କାର୍ଯ୍ୟ ସମୟରେ ଚାଷୀଙ୍କୁ ସାର ମିଳୁ ନ ଥିବାରୁ ଚାଷୀ ମାନେ ପୂର୍ବରୁ ଅସନ୍ତୋଷ ଥିଲେ। ଯୁଗ୍ମ ଅଭିଯୋଗ ଶୁଣାଣି ଶିବିରରେ ଜିଲ୍ଲାପାଳ ସହ ଜିଲ୍ଲା କୃଷି ଅଧିକାରୀ ଆସିଲେ ତାଙ୍କୁ ଅଭିଯୋଗ କରିବାକୁ ଚାଷୀ ଆଶା ବାନ୍ଧି ଆସିଥିବା ବେଳେ ଆଜି କୌଣସି କାରଣ ବଶତଃ ଜିଲ୍ଲାପାଳ ଅଭିଯୋଗ ଶିବିର କୁ ଆସି ନ ଥିଲେ । ତେବେ ଉତ୍ୟକ୍ତ ଚାଷୀ ଜିଲ୍ଲା କୃଷି ଅଧିକାରୀଙ୍କୁ ଘେରାଉ କରିବା ସହ ଚାଷୀ ଙ୍କୁ ଆବଶ୍ୟକ ସାର ଯୋଗାଇ ଦେବାକୁ ଅଡି ବସିଥିଲେ। ପ୍ରଶାସନ ବିରୁଦ୍ଧରେ ନାରାବାଜି କରିବା ସହ ସାର ଦେଲେ ଆମେ ଏଠାରୁ ଉଠିବୁ ବୋଲି ଜିଦ୍ କରିଥିଲେ।ଶେଷରେ ଜିଲ୍ଲା କୃଷି ଅଧିକାରୀ ସୁଧୀର ବେହେରା ଡାବୁଗାଁ ବ୍ଲକ ପାଇଁ ଅତିରିକ୍ତ ୧୫୦୦ ପକେଟ ସାର ଯୋଗାଇ ଦେବାକୁ ନିର୍ଭର ପ୍ରତିଶୃତି ପରେ ଚାଷୀ ମାନେ ଅଭିଯୋଗ ଶିବିର ରେ ଧାରଣା ରୁ ଉଠିଥିଲେ।ଆଜି ଡାବୁଗାଁ ଲ୍ୟାମ୍ପ ତରଫରୁ ଚାଷୀ ଙ୍କୁ ଆସିଥିବା ୪୫୦ ପ୍ୟାକେଟ ସାର ଦେବା ପାଇଁ ଘୋଷଣା କରିଥିବା ବେଳେ ୨୦୦୦ ରୁ ଉର୍ଦ୍ଧ ଚାଷୀ ସାର ନେବା ପାଇଁ ଲ୍ୟାମ୍ପ ଗୋଦାମ ରେ ପହଞ୍ଚିଥିଲେ। ଏତେ ସଂଖ୍ୟକ ଚାଷୀ ଙ୍କୁ ସାର ଦେବା ସମ୍ଭବ ନ ଥିବା ତଥା ବିଶୃଙ୍ଖଳା ଦେଖା ଦେବା ସମ୍ଭାବନା ଥିବାରୁ କୃଷି ବିଭାଗ ତରଫରୁ ଆଜି ସାର ଯୋଗାଣ ବନ୍ଦ କରାଯାଇଥିଲା। ଆସନ୍ତା କାଲି ସାର ଆସିଲେ ଚାଷୀଙ୍କୁ ବ୍ଲକ କୃଷି ଅଧିକାରୀ ସୁଦେଶ୍ନା ଧଳ ଙ୍କ ଉପସ୍ଥିତିରେ ସାର ଯୋଗାଇ ଦିଆଯିବ। ସୂଚନା ଥାଉ କି ଡାବୁଗାଁ ବ୍ଲକ ରେ ୧୩ ରୁ ୧୫ ହଜାର ମଧ୍ୟରେ ଚାଷୀ ଥିବା ବେଳେ ଗତ ଏପ୍ରିଲ ରୁ ଅଗଷ୍ଟ ୫ ମାସ ମଧ୍ୟରେ ପ୍ରାୟ ୪୦ ହଜାର ପ୍ୟାକେଟ ୟୁରିଆ ସାର ଆସିଥିବା କୃଷି ବିଭାଗ ତରଫରୁ ଜଣା ପଡ଼ିଛି।ବ୍ଲକ ରେ ୨୩ ଟି ପଞ୍ଜୀକୃତ ସାର ବିକ୍ରେତା ସହ ଲ୍ୟାମ୍ପ କୁ ଏହି ସାର ଆସିଥିବା ବେଳେ ଡାବୁଗାଁ ବ୍ଲକ ରେ ଧାନ ଚାଷ ସହ ଅଧିକ ପରିମାଣର ମକା ଚାଷ କରାଯାଉ ଥିବାରୁ ଚାଷୀ ଙ୍କୁ ୟୁରିଆ ସାର ର ଅଧିକ ଆବଶ୍ୟକତା ପଡୁଛି। ଏହି ଧାରଣା ସମୟରେ ବ୍ଲକ କଂଗ୍ରେସ ସଭାପତି ଜି ସାଇ ରାଜୁ,ବ୍ଲକ ବିଜେଡି ସଭାପତି ସୁରେନ୍ଦ୍ର ମିଶ୍ର ,ଜିଲ୍ଲା ପରିଷଦ ସଭ୍ୟ ଗୁପ୍ତ ବିଶୋଇ, ବିଜେପି ଜିଲ୍ଲା ଯୁବ ମୋର୍ଚ୍ଚା ସଭାପତି ଶୁଭଜିତ୍ ପାଣିଗ୍ରାହୀ,ବ୍ଲକ କୃଷକ ମହାସଂଘ ଉପ ସଭାପତି ରାଜେନ୍ଦ୍ର ମିଶ୍ର,କୁର୍ଷ ପନକା,କେଶବ ରେଲି ସହ ବ୍ଲକ ର ଶତାଧିକ ଚାଷୀ ଉପସ୍ଥିତ ଥିଲେ।