ପାରଳାଖେମୁଣ୍ଡି / ବାଳକୃଷ୍ଣ ପାଣିଗ୍ରାହୀ : ଗଜପତି ଜିଲ୍ଲା ଗୋଷାଣୀ ବ୍ଲକର ରମ୍ପା ପଞ୍ଚାୟତ ଅନ୍ତର୍ଗତ ଏସ୍.ଉରୁଡା ଗ୍ରାମ ସ୍ଥିତ ବିବେକାନନ୍ଦ ଅନାଥାଶ୍ରମ ପରିସରରେ ବିଶ୍ବହିନ୍ଦୁ ପରିଷଦ ପକ୍ଷରୁ ଗୋଷ୍ଠାଷ୍ଟମୀ ତଥା ଗୋ-ପୂଜନ ଉତ୍ସବ ପାରମ୍ପରିକ ରୀତିନୀତିରେ ପାଳିତ ହୋଇଯାଇଛି। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଆଚାର୍ଯ୍ୟ ବିନୋଦ ଚନ୍ଦ୍ର ଜେନା ଯୋଗଦେଇ ଗୋ-ପୂଜନ ଉତ୍ସବରେ ଉପସ୍ଥିତ ରହି ଗୋ-ମାତା ମାନଙ୍କୁ ପୂଜାର୍ଚ୍ଚନା କରି କଦଳୀ ଘାସ ଓ ଅନ୍ୟାନ୍ୟ ଖାଦ୍ୟ ଖୁଆଇଥିଲେ ।
ପରେ ଆୟୋଜିତ ସଭା କାର୍ଯ୍ୟକ୍ରମରେ ଆଶ୍ରମର ଅନ୍ତେବାସୀ ମାନଙ୍କୁ ଗୋ-ପାଳନ ଓ ପୂଜନ ମହତ୍ଵର ବିଭିନ୍ନ ଦିଗ ଉପରେ ଅବଗତ କରାଇବା ସହ ସଂପ୍ରତ୍ତି ସମାଜରେ ଜୀବମାନଙ୍କ ପ୍ରତି କିଭଳି ଅତ୍ୟାଚାର କରାଯାଇ ଆମ ପରିବେଶରେ ବିଷମ ପରିସ୍ଥିତି ସୃଷ୍ଟି ହେବାର ଲାଗିଛି ବୋଲି କହି ସଚେତନ କରାଇଥିଲେ ।
ଅନ୍ୟପକ୍ଷରେ ଗାଈକୁ ଗୋ-ମାତା ଭାବେ ପୂଜନ କରିବା ସହ ଆବର୍ତ୍ତମାନ ପରମ୍ପରାକୁ ଆମେ ଚଳାଇବାକୁ ହେବ ବୋଲି କହିଥିଲେ।
ଏହି ଉତ୍ସବରେ ଏସ୍-ଉରୁଡା ଗ୍ରାମର ମହିଳା ମାନଙ୍କ ସମେତ ଆଶ୍ରମର ସମ୍ପାଦକ ଶ୍ରୀ ନାରାୟଣ ପଢ଼ିଆରୀ ଓ ପରିଚାଳକ ଶ୍ରୀ କରୁଣାକର ଶବର ପ୍ରମୁଖ ଯୋଗଦେଇ ସମସ୍ତ କାର୍ଯ୍ୟକ୍ରମକୁ ପରିଚାଳନା କରିଥିଲେ ।